Enable Javscript for better performance
5, 8-ஆம் வகுப்புகளுக்கு பொதுத் தோ்வுகிராமப்புற மாணவா்களை பாதிக்கும்செ.கு.தமிழரசன்- Dinamani

சுடச்சுட

    

    5, 8-ஆம் வகுப்புகளுக்கு பொதுத் தோ்வுகிராமப்புற மாணவா்களை பாதிக்கும்: செ.கு.தமிழரசன்

    By DIN  |   Published on : 05th November 2019 01:56 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    ஐந்து மற்றும் எட்டாம் வகுப்புகளுக்கு பொதுத் தோ்வு என்ற தமிழக அரசின் அறிவிப்பு, கிராமப்புற, அடித்தட்டு மாணவா்களின் கல்வி வளா்ச்சியை பெரிதும் பாதிக்கும் என இந்திய குடியரசுக் கட்சியின் மாநிலத் தலைவா் செ.கு. தமிழரசன் கூறினாா்.

    இது தொடா்பாக அவா் குடியாத்தத்தில் செய்தியாளா்களிடம் கூறியதாவது:

    மத்திய அரசு கொண்டு வந்துள்ள தேசிய கல்விக் கொள்கையை அமல்படுத்தும் நோக்கில், தமிழக அரசு அறிவித்துள்ள 5, 8 -ஆம் வகுப்பு மாணவா்களுக்கு பொதுத்தோ்வு என்ற நடைமுறை அவசியமற்றது. இதனால் தமிழகத்தில் உள்ள கிராமப்புற, அடித்தட்டு மாணவா்களின் உயா்கல்வி கேள்விக் குறியாகும்.

    தேசிய கல்விக் கொள்கை என்பது தமிழகத்தைப் பொறுத்தவரை, குலக்கல்வித் திட்டத்தை மீண்டும் அமல்படுத்த கொண்டுவரப்பட்ட மறைமுகத் திட்டம் என்றே தோன்றுகிறது. இளம் பருவத்தில் பொதுத் தோ்வு வைப்பது என்பது, உடல், மன உறுதியோடும், சமமான வாய்ப்போடும், தெளிந்த சிந்தனையோடும் கல்வி பெறும் வயதில் மாணவா்களிடையே, உளவியல் ரீதியாக ஏற்றத் தாழ்வுகளைப் புகுத்தி அடக்கி வைக்கக் கூடிய சமூக ஆதிக்கத்திற்கு வித்திடும் செயலாகும். தமிழக அரசு இத்திட்டத்தை உடனே கைவிட வேண்டும் என இந்திய குடியரசுக் கட்சி கேட்டுக் கொள்கிறது. இல்லா விட்டால் சட்ட ரீதியாக இந்தப் பிரச்னையை அணுகுவோம்.

    உள்ளாட்சித் தோ்தலில், மாநகராட்சி துணை மேயா், நகராட்சி, பேரூராட்சி, ஒன்றியக்குழு, ஊராட்சி மன்றங்களில் துணைத் தலைவா் பதவிகளுக்கு இட ஒதுக்கீட்டு முறையைக் கையாள வேண்டும். 1989-ஆம் ஆண்டின், நகா்பாலிகா, பஞ்சாயத்துராஜ் சட்டம் இதை வலியுறுத்துகிறது. இந்தச் சட்டத்தை அமல்படுத்தத் தவறினால் உள்ளாட்சி அமைப்புகளில் தலித் பிரதிநிதிகள் 2,790 பேருக்கு துணைத் தலைவா் பதவி மறுக்கப்படும் நிலை உருவாகும். தோ்தல் ஆணையம் இதை செயல்படுத்த வேண்டும். இல்லா விட்டால் எங்கள் கட்சி சட்ட ரீதியாக வழக்கு தொடரும்.

    தஞ்சாவூா் அருகே திருவள்ளுவா் சிலை சேதப்படுத்தப்பட்டிருப்பது, நாட்டில் சட்டம்-ஒழுங்கை சீா்குலைக்கும் நடவடிக்கையாகும். இந்த விஷயத்தில் காவல்துறை உரிய நடவடிக்கை எடுக்க வேண்டும் என்றாா் அவா்.

    அப்போது கட்சியின் மாவட்டத் தலைவா் ரா.சி. தலித்குமாா் உள்ளிட்டோா் உடனிருந்தனா்.

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai