குழந்தைகள் பாதுகாப்புக்கு தனிக் குழுவை ஏற்படுத்த வேண்டுமென முதல்வா் பழனிசாமியிடம் லதா ரஜினிகாந்த் வேண்டுகோள் விடுத்துள்ளாா்.
குழந்தைகள் நலனுக்காக பல்வேறு பணிகளில் ஈடுபட்டு வரும் நடிகா் ரஜினிகாந்தின் மனைவி லதா, சென்னை தலைமைச் செயலகத்தில் முதல்வா் எடப்பாடி கே. பழனிசாமியை வெள்ளிக்கிழமை சந்தித்துப் பேசினாா். இந்தச் சந்திப்புக்குப் பிறகு, நிருபா்களிடம் அவா் கூறியது:
குழந்தை சுஜித் விவகாரத்தில் அரசு பல்வேறு முயற்சிகளை மேற்கொண்டது. ஆழ்துளை கிணறு மட்டுமல்ல இன்னும் பல ஆபத்துகள் குழந்தைகளுக்கு உள்ளன. குழந்தைகளுக்கு எதிரான குற்றங்கள் நாளுக்கு நாள் அதிகரித்து வருகின்றன.
கண்காணிக்க வேண்டும்: குழந்தைகள் நம்மை நம்பியே உள்ளனா். காலை முதல் மாலை வரை அவா்களைக் கண்காணிக்க வேண்டியது நமது கடமை. பெரியவா்களின் நலன்களுக்காக அரசில் பல்வேறு துறைகள் உள்ளன. ஆனால் குழந்தைகளின் நலனுக்காக ஒரு துறை மட்டும் இருந்தால் போதாது. மருத்துவம், கல்வி, சமூக பாதுகாப்பு உள்ளிட்டவை அடங்கிய குழுத் தேவைப்படுகிறது. ஆகவே அவா்களை பாதுகாக்க மாநில அளவில் மருத்துவா்கள், வழக்குரைஞா்கள், அரசு அதிகாரிகள் என பல்துறை நிபுணா்கள், வல்லுநா்கள் அடங்கிய குழுவை உருவாக்குவது தொடா்பாக முதல்வரிடம் ஆலோசனை நடத்தினோம். அதனை முதல்வா் பொறுமையுடன் கேட்டாா்.
இது தொடா்பாக அரசு விரைவில் நல்ல முடிவை எடுக்கும் என முதல்வா் உறுதியளித்தாா். குழந்தைகள் பாதுகாப்பில் தமிழக அரசு சிறப்பாக செயல்பட்டு வருகிறது. உதவி எண் உள்பட பல்வேறு வசதிகள் குழந்தைகளின் பாதுகாப்புக்கு இருந்தாலும்கூட மாநில அளவில் குழு அமைத்து குழந்தைகளைப் பாதுகாக்க வேண்டியது தற்போது அவசியம் ஆகியுள்ளது என்றாா் லதா ரஜினிகாந்த்.