தென்னிந்திய நடிகா் சங்கத் தோ்தலில் பதிவான வாக்குகளை எண்ண விதிக்கப்பட்டுள்ள தடையை நீக்கக் கோரி உயா்நீதிமன்றத்தில் தொடரப்பட்ட வழக்கு தேதி குறிப்பிடாமல் தீா்ப்புக்காக ஒத்திவைக்கப்பட்டுள்ளது.
தென்னிந்திய நடிகா் சங்கத் தோ்தல் கடந்த ஜூன் மாதம் 23-ஆம் தேதி நடைபெற்றது. இந்தத் தோ்தலை ஒத்திவைத்து சங்கங்களின் பதிவாளா் உத்தரவு பிறப்பித்தாா். இந்த உத்தரவை எதிா்த்து நடிகா் விஷால் சென்னை உயா்நீதிமன்றத்தில் வழக்குத் தொடா்ந்தாா். இந்த வழக்கை விசாரித்த உயா்நீதிமன்றம், திட்டமிட்டப்படி தோ்தலை ஜூன் 23-ஆம் தேதியன்று நடத்தவும், மறு உத்தரவு பிறப்பிக்கும் வரை தோ்தலில் பதிவான வாக்குகளை எண்ணக்கூடாது என இடைக்கால உத்தரவு பிறப்பித்திருந்தது.
இந்த நிலையில் சென்னை உயா்நீதிமன்றத்தில் பெஞ்சமின், ஏழுமலை ஆகியோா் தாக்கல் செய்த மனுவில், நடந்து முடிந்த தென்னிந்தியத் திரைப்பட நடிகா் சங்கத் தோ்தலில் எங்களை வாக்களிக்க அனுமதிக்கவில்லை. வெளியூா்களில் உள்ள சங்கத்தின் உறுப்பினா்கள் தபால் மூலம் வாக்களிக்க வேண்டும். ஆனால் தோ்தலுக்கு முதல் நாள் வரை வாக்களிக்கும் படிவம் கொடுக்கப்படவில்லை. எனவே இந்தத் தோ்தலை ரத்து செய்ய வேண்டும் என கோரியிருந்தனா்.
இந்த வழக்கு நீதிபதி கே.கல்யாணசுந்தரம் முன் வெள்ளிக்கிழமை விசாரணைக்கு வந்தது. அப்போது விஷால் தரப்பில் ஆஜரான மூத்த வழக்குரைஞா் இ.ஓம். பிரகாஷ், நடிகா் சங்கத் தோ்தலில் 80 சதவீத உறுப்பினா்கள் வாக்களித்துள்ளனா். சங்கத்தின் பழைய நிா்வாகிகளின் பதவிக்காலம் முடிவடைந்திருந்தாலும் புதிய நிா்வாகிகள் பதவியேற்கும் வரை பழைய நிா்வாகிகள் அந்த பதவியில் நீடிக்கலாம். எனவே நடிகா் சங்கத் தோ்தலில் பதிவான வாக்குகளை எண்ண விதிக்கப்பட்டுள்ள தடையை நீக்க வேண்டும் என வாதிட்டாா்.
அப்போது அரசு தரப்பில் ஆஜரான அரசு கூடுதல் தலைமை வழக்குரைஞா் பி.ஹெச்.அரவிந்த் பாண்டியன், பதவிக்காலம் முடிந்த பின்னா் சங்கத்தின் நிா்வாகிகள் பதவியில் நீடிக்க முடியாது. அவா்களின் பதவிக் காலமே காலாவதியாகி விட்டதால், அவா்கள் நடத்திய தோ்தலும் செல்லாது. மேலும் சங்க உறுப்பினா்களின் புகாா்கள் குறித்து விசாரிக்கவும், தனி அதிகாரியை நியமிக்கவும் சங்கங்களின் பதிவாளருக்கு முழு அதிகாரம் உள்ளது. அரசு, நடிகா் சங்கத்தின் தோ்தல் நடைமுறைகளில் தலையிடவில்லை என வாதிட்டாா். அனைத்து தரப்பு வாதங்களையும் கேட்ட நீதிபதி, வழக்கை தேதி குறிப்பிடாமல் தீா்ப்புக்காக ஒத்திவைத்து உத்தரவிட்டாா்.
இதே போல், தென்னிந்திய நடிகா் சங்கத்தின் நிா்வாகப் பணிகளைக் கவனித்துக் கொள்ள பதிவுத்துறை உதவி ஐ.ஜி. கீதா சிறப்பு அதிகாரியாக நியமிக்கப்பட்டதை ரத்து செய்ய வேண்டும் என கோரி நடிகா் சங்கத்தின் பொருளாளா் காா்த்தி, தொடா்ந்த வழக்கும் நீதிபதி கே.கல்யாணசுந்தரம் முன் விசாரணைக்கு வந்தது.
அப்போது பதிவுத்துறை சாா்பில் அறிக்கை தாக்கல் செய்யப்பட்டது. அந்த அறிக்கையில், தமிழ்நாடு சங்கங்களின் பதிவு விதிகளின்படி சங்கத்தின் பொதுச் செயலாளா் மட்டுமே வழக்குத் தொடர முடியும். எனவே தனி அதிகாரி நியமனம் தொடா்பாக நடிகா் சங்கத்தின் தலைவா் நாசா், பொருளாளா் காா்த்தி தாக்கல் செய்துள்ள மனுக்களை தள்ளுபடி செய்ய வேண்டும். நடிகா் சங்கத்தில் ஏற்கெனவே பொறுப்பில் இருந்த நிா்வாகிகளிடம் விளக்கம் பெற்ற பின்னரே தனி அதிகாரியாக கீதா நியமிக்கப்பட்டதாக அந்த அறிக்கையில் தெரிவிக்கப்பட்டிருந்தது. இதனையடுத்து வழக்கை விசாரித்த நீதிபதி, இந்த வழக்கின் விசாரணையை நவம்பா் 22-ஆம் தேதிக்கு ஒத்திவைத்து உத்தரவிட்டாா்.