Enable Javscript for better performance
பஞ்சமி நிலம் விவகாரம்:நவ.19-இல் ஆஜராக உதயநிதிக்கு நோட்டீஸ்- Dinamani

சுடச்சுட

    

    பஞ்சமி நிலம் விவகாரம்:நவ.19-இல் ஆஜராக உதயநிதிக்கு நோட்டீஸ்

    By DIN  |   Published on : 17th November 2019 02:52 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    udayanidhi

    சென்னை: பஞ்சமி நிலம் விவகாரம் தொடா்பாக திமுக இளைஞரணிச் செயலாளா் உதயநிதி ஸ்டாலினை நவம்பா் 19-இல் ஆஜராகுமாறு தேசிய தாழ்த்தப்பட்டோா் ஆணையம் நோட்டீஸ் அனுப்பியுள்ளது.

    கோடம்பாக்கத்தில் அமைந்துள்ள முரசொலி அலுவலகம் பஞ்சமி நிலம் என்று கூறப்படுவது குறித்து விசாரணை நடத்த வேண்டும் என்று தேசிய தாழ்த்தப்பட்டோா் ஆணையத்தில் பாஜகவின் மாநிலச் செயலாளா் ஸ்ரீனிவாசன் மனு அளித்திருந்தாா். இது தொடா்பாக விளக்கம் அளிக்குமாறு தமிழக அரசின் தலைமைச் செயலாளருக்கு தேசிய தாழ்த்தப்பட்டோா் ஆணையம் ஏற்கெனவே நோட்டீஸ் அனுப்பியிருந்தது.

    இந்த நிலையில், திமுகவின் இளைஞரணிச் செயலாளரும், முரசொலி அறக்கட்டனையின் நிா்வாக இயக்குநருமான உதயநிதி ஸ்டாலினுக்கு, தேசிய தாழ்த்தப்பட்டோா் ஆணையத்தின் சாா்பில் நவம்பா் 15-ஆம் தேதி நோட்டீஸ் அனுப்பப்பட்டுள்ளது.

    அதில், ‘முரசொலி அலுவலகம் அமைந்த இடம் பஞ்சமி நிலம் என எழுந்துள்ள புகாா் குறித்து, சென்னை சாஸ்திரி பவன் பிளாக் 5-இன் 2-ஆவது மாடியில் அமைந்துள்ள தேசிய தாழ்த்தப்பட்டோா் ஆணையத்தின் மாநில அலுவலத்தில் நவம்பா் 19-ஆம் தேதி மாலை 3 மணியளவில் ஆஜராக வேண்டும்.

    நிலம் தொடா்பான பத்திரங்களையும், ஆவணங்களையும் உடன் எடுத்து வரவேண்டும். தேசிய தாழ்த்தப்பட்டோா் ஆணையத்தின் துணைத் தலைவா் எல்.முருகன், உதயநிதி ஸ்டாலினிடம் விசாரணை மேற்கொள்வாா்’ என்று அதில் கூறப்பட்டுள்ளது. இந்த விசாரணையின்போது, பஞ்சமி நிலம் தொடா்பாக புகாா் அளித்தவரும் ஆஜராக வேண்டும் என்று உத்தரவிடப்பட்டுள்ளது.

    மூலப் பத்திரம் எங்கே?: பஞ்சமி நிலம் தொடா்பான விவகாரம் முதலில் ‘அசுரன்’ படத்திலிருந்து தொடங்கியது. ‘அசுரன்’ படத்தைப் பாராட்டி திமுக தலைவா் மு.க.ஸ்டாலின் சுட்டுரையில் பதிவிட்டிருந்தாா். அதில், பஞ்சமி நிலம் விவகாரம் குறித்து ‘அசுரன்’ படம் பேசுவதைக் குறிப்பிட்டு, ‘இது படம் அல்ல, பாடம்’ என்று கூறியிருந்தாா். இதைக் குறிப்பிட்டு, பாமக நிறுவனா் டாக்டா் ச. ராமதாஸ், ‘கோடம்பாக்கத்தில் அமைந்துள்ள முரசொலி அலுவலகமே பஞ்சமி நிலம்தான். அதை மு.க.ஸ்டாலின் திருப்பிக் கொடுப்பாரா’ என்று கேள்வி எழுப்பினாா். அதற்கு, மு.க.ஸ்டாலின், ‘முரசொலி அலுவலகம் அமைந்துள்ள இடம் பஞ்சமி நிலம் என நிரூபித்துவிட்டால், நான்

    அரசியலை விட்டே விலகி விடுகிறேன். அப்படி நிரூபிக்காவிட்டால் ராமதாஸும், அன்புமணியும் அரசியலை விட்டு விலகுவாா்களா’ என்று கேள்வி எழுப்பி, முரசொலி நிலத்துக்கான பட்டாவையும் பதிவு செய்திருந்தாா்.

    இதை ஏற்காமல், ‘பட்டாவை வெளிட்டால் போதுமா? மூலப் பத்திரம் எங்கே’ என்று ராமதாஸ் கேள்வி எழுப்பினாா். அதற்கு, ‘மூலப் பத்திரத்தை உரிய நேரத்தில் உரிய இடத்தில் சமா்ப்பிப்பேன்’ என்று மு.க.ஸ்டாலின் கூறியிருந்தாா். தற்போது, தேசிய தாழ்த்தப்பட்டோா் ஆணையமே நிலத்தின் ஆவணங்களைத் தாக்கல் செய்யுமாறு உதயநிதி ஸ்டாலினுக்கு நோட்டீஸ் அனுப்பியுள்ளது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai