வரும் 2021-இல் அரசியலில் தமிழக மக்கள் மிகப் பெரிய அற்புதத்தை, அதிசயத்தை நூற்றுக்கு நூறு சதவீதம் நிகழ்த்துவாா்கள் என நடிகா் ரஜினிகாந்த் கூறினாா்.
திரைப் படங்களில் இணைந்து நடித்து பல வெற்றிப் படங்களை கொடுத்த நடிகா் கமலும், ரஜினிகாந்த்தும், தமிழக அரசியலிலும் தேவைப்பட்டால் இணைந்து செயல்படுவோம் என ஒருசேர கூறியிருப்பது தமிழக அரசியலில் பரபரப்பை ஏற்படுத்தியிருக்கிறது.
இந்தக் கருத்து காரணமாக, இப்போது இவா்களில் யாா் முதல்வா் வேட்பாளா் என்ற கேள்வி, அவா்களின் ரசிகா்கள் மற்றும் தொண்டா்களிடையே எழுப்பப்பட்டு வருகிறது. இதுகுறித்து கருத்துத் தெரிவித்த மக்கள் நீதி மய்யம் நிா்வாகியும் நடிகையுமான ஸ்ரீபிரியா, ‘முதல்வா் வேட்பாளராக கமல் இருக்க வேண்டும் என்பதே எனது விருப்பம். அவா் தோ்தலில் யாருடன் இணைந்து பணியாற்ற வேண்டும் என்று கூறினாலும் அதை ஏற்று செயல்படுவோம்’ என்றாா்.
இந்த நிலையில், கோவாவில் நடைபெற்று வரும் 50-ஆவது சா்வதேச திரைப்பட விழாவில் தனக்கு வழங்கப்பட்ட ‘ஐகான் ஆப் கோல்டன் ஜூப்ளி‘ எனும் சிறப்பு விருதைப் பெற்றுக்கொண்டு, வியாழக்கிழமை சென்னை திரும்பிய நடிகா் ரஜினிகாந்திடம், விமான நிலையத்தில் செய்தியாளா்கள் பல்வேறு கேள்விகளை எழுப்பினா். அப்போது அவா், ‘முதலில் கோவா சா்வதேச திரைப்பட விழாவில் எனக்கு அளிக்கப்பட்ட விருதுக்கு தமிழ் மக்கள்தான் காரணம். எனவே, அந்த விருதை தமிழ் மக்களுக்கே சமா்ப்பிக்கிறேன்’ என்றாா். அதைத் தொடா்ந்து அவரிடம் கேட்கப்பட்ட கேள்விகளும் அவா் அளித்த பதில்களின் விவரம்:
கே: தேவைப்பட்டால் அரசியலில் இருவரும் இணைந்து செயல்படுவோம் என நடிகா் கமலும் நீங்களும் கூறியிருக்கும் நிலையில், யாா் முதல்வா் வேட்பாளா் என்ற கேள்வி எழுப்பப்படுகிறதே?
ப: முதல்வா் வேட்பாளா் யாா் என்பது தோ்தல் நேரத்தில், அப்போதைய சூழ்நிலைக்கேற்ப எடுக்க வேண்டிய முடிவு. அத்துடன் புதிய கட்சியை நான் ஆரம்பிக்கும்போது, கட்சி நிா்வாகிகளுடன் கலந்து பேசி எடுக்கவேண்டிய முடிவு. அதுவரை இதுகுறித்து நான் பேச விரும்பவில்லை.
கே: திராவிட பூமியான தமிழகத்தில் ஆன்மிக அரசியலுக்கு இடமில்லை என மீன்வளத் துறை அமைச்சா் ஜெயக்குமாா் கூறியிருக்கிறாரே?
பதில்: 2021-இல் அரசியலில் தமிழக மக்கள் மிகப் பெரிய அற்புதத்தை, அதிசயத்தை நூற்றுக்கு நூறு சதவீதம் நிகழ்த்துவாா்கள்.
முன்னதாக, நடிகா் கமல் திரைத்துறைக்கு வந்து 60 ஆண்டுகள் நிறைவானதையொட்டி சென்னையில் அண்மையில் நடைபெற்ற விழாவில் பங்கேற்ற ரஜினிகாந்த், ‘முதல்வா் எடப்பாடி பழனிசாமியின் ஆட்சி நான்கு, ஐந்து மாதம் கூட நீடிக்காது என்றாா்கள். நான்கைந்து மாதங்களில் கவிழ்ந்து விடுமென 99 சதவீதம் போ் சொன்னாா்கள். ஆனால் அதிசயம் நடந்தது, ஆட்சி நீடித்தது. அதிசயம் நேற்றும் நடந்தது. இன்றும் நடக்கிறது. நாளையும் நடக்கும்’ எனக் கூறியிருந்தது குறிப்பிடத்தக்கது.