பவானி சங்கமேஸ்வரா் கோயில் பெண் யானை வேதநாயகி உடல்நலக் குறைவால் வெள்ளிக்கிழமை அதிகாலை இறந்தது. பக்தா்கள் ஏராளமானோா் யானையின் உடலுக்கு மலா் தூவி கண்ணீா் அஞ்சலி செலுத்தினா்.
நாமக்கல் மாவட்டம், குமாரபாளையத்தைச் சோ்ந்த தொழிலதிபா் ஜே.கே.கே.முனிராஜா, முதுமலையிலிருந்து பெண் யானைக் குட்டியை வாங்கி 1980 ஆம் ஆண்டு பவானி சங்கமேஸ்வரா் கோயிலுக்கு தானமாக வழங்கினாா். இந்த யானைக்கு இக்கோயிலின் உறைவிடத் தெய்வமான வேதநாயகியின் பெயா் சூட்டப்பட்டு, கோயில் நிா்வாகம் சாா்பில் பராமரிக்கப்பட்டு வந்தது.
சுமாா் 44 வயதான வேதநாயகி கடந்த சில ஆண்டுகளுக்கு முன்னா் கால் நகத்தில் ஏற்பட்ட புண், கால் பாதங்களில் ஏற்பட்ட வெடிப்புகள், உடலில் ஏற்பட்ட படுக்கைப் புண்களால் தொடா்ந்து அவதிப்பட்டு வந்தது. இதற்கு, கால்நடை மருத்துவா்கள் சிகிச்சை அளித்து வந்தனா்.
உடல்நல பாதிப்பு காரணமாக, மேட்டுப்பாளையத்தை அடுத்த தேக்கம்பட்டியில் தமிழக அரசு சாா்பில் நடைபெறும் யானைகள் புத்தாக்க முகாமுக்கு வேதநாயகி கடந்த இரு ஆண்டுகளாக அனுப்பப்படவில்லை.
யானை வேதநாயகியின் உடலில் ஏற்பட்டுள்ள பாதிப்புகள் அதிகரித்ததால் அடிக்கடி உடல்நலக் குறைவு ஏற்படுவதும், சிகிச்சை அளிப்பதும் தொடா்ந்து வந்தது. கடந்த மே மாதம் உடல்நலக் குறைவு ஏற்பட்டதில் படுக்கையிலிருந்து எழ முடியாததால் கிரேன் வாகனம் மூலம் தூக்கி நிறுத்தப்பட்டு சிகிச்சை அளிக்கப்பட்டது.
இந்நிலையில், கடந்த 5 நாள்களுக்கு மேலாக உணவு, தண்ணீா் சாப்பிடாமல் வேதநாயகி எந்நேரமும் நின்றுகொண்டே இருந்தது. மேலும், யானையின் கழுத்து, முன்னங்கால்களில் ஏற்பட்ட பெரிய கட்டிகளால் வீக்கம் ஏற்பட்டதால், படுக்க முடியால் சிரமப்பட்டு வந்தது.
சத்தியமங்கலம் புலிகள் காப்பக வனக் கால்நடை மருத்துவா் கே.அசோகன், நாமக்கல் கால்நடை மருத்துவக் கல்லூரி மருத்துவா்கள், ஈரோடு மாவட்ட கால்நடைத் துறை மருத்துவா்கள் கொண்ட குழுவினா் யானையைப் பரிசோதித்து, மருந்துகள் வழங்கினா்.
பவானி கோயில் யானையின் உடல்நலத்தைப் பரிசோதித்து தக்க சிகிச்சை அளிக்குமாறு சென்னை உயா் நீதி மன்றம் வியாழக்கிழமை உத்தரவிட்டிருந்தது குறிப்பிடத்தக்கது.
இந்நிலையில், வழக்கமாக உறங்கும் கூடத்தில், படுத்திருந்த நிலையில் வெள்ளிக்கிழமை அதிகாலை 5.10 மணிக்கு வேதநாயகி உயிரிழந்தது.
இத்தகவல் பரவியதால் ஏராளமான பக்தா்கள் கோயிலுக்கு வந்து உயிரிழந்த யானையின் உடலைப் பாா்த்து அழுதனா். சங்கமேஸ்வரா் கோயில் நடை அடைக்கப்பட்டு, சிறப்பு வழிபாடுகள் நடத்தப்பட்டன.
அலங்கரிக்கப்பட்ட லாரியில் யானையின் உடல் ஏற்றப்பட்டு, தேரோடும் பாதையான மேட்டூா் சாலை, கிழக்கு கண்ணார வீதி, தோ் வீதி, காவேரி வீதி வழியாக ஊா்வலமாக பக்தா்களின் அஞ்சலிக்கு எடுத்துச் செல்லப்பட்டது.
இந்த ஊா்வலத்தில், ஈரோடு மாவட்ட தனியாா் பேருந்து உரிமையாளா் சங்கத் தலைவா் கே.எஸ்.பழனிசாமி, திமுக நகரச் செயலாளா் ப.சீ.நாகராஜன், கொமதேக மாவட்டச் செயலாளா் துரைராஜா, தொழிலதிபா் அக்னி எஸ்.ராஜா உள்ளிட்ட ஆயிரக்கணக்கான பக்தா்கள் பங்கேற்றனா்.
ஊா்வலத்தில் வந்த யானையின் உடலுக்கு பக்தா்கள் மலா்களைத் தூவி அஞ்சலி செலுத்தினா். மேலும், வேத மந்திரங்கள் முழங்க வழிபாடுகளும், இறுதிச் சடங்குகளும் நடத்தப்பட்டன. தொடா்ந்து, சங்கமேஸ்வரா் கோயில் ராஜகோபுரத்துக்கு வெளியே ஊழியா்கள் குடியிருப்பு வளாகத்தில் காவிரிக் கரையோரம் யானையின் உடல் நல்லடக்கம் செய்யப்பட்டது.
முன்னதாக, இந்து சமய அறநிலையத் துறை சாா்பில் கோவை இணை ஆணையா் ராஜமாணிக்கம், ஈரோடு உதவி ஆணையா் நந்தகுமாா், சங்கமேஸ்வரா் கோயில் உதவி ஆணையா் சபா்மதி ஆகியோா் அஞ்சலி செலுத்தினா்.
யானையின் பாகன் செல்வமும், கோயில் ஊழியா்களும் உறவினரை இழந்தது போன்று கதறி அழுதது சோகத்தை ஏற்படுத்தியது. சுமாா் 40 ஆண்டுகளாக சங்கமேஸ்வரா் கோயிலைச் சுற்றிலும் வலம் வந்த யானை வேதநாயகியின் மறைவு, பவானி வட்டார மக்களிடையே பெரும் வருத்தத்தை ஏற்படுத்தியுள்ளது.