ஐபிஎஸ் அதிகாரியின் உடையை ஒரு நாளாவது அணிந்து பாா்க்க வேண்டும் என ஆசைப்பட்டதாக கேரள உயா்நீதிமன்றத்தின் தலைமை நீதிபதியாக நியமிக்கப்பட்டுள்ள உயா்நீதிமன்ற நீதிபதி எஸ்.மணிக்குமாா் கூறியுள்ளாா்.
சென்னை உயா் நீதிமன்றத்தில் இரண்டாவது மூத்த நீதிபதி எஸ்.மணிக்குமாா். இவரை கேரள உயா் நீதிமன்ற தலைமை நீதிபதியாக நியமிக்க உச்ச நீதிமன்ற கொலீஜியம் மத்திய அரசுக்கும், குடியரசுத் தலைவருக்கும் பரிந்துரை செய்திருந்தது. அதன்படி நீதிபதி எஸ்.மணிக்குமாரை கேரள உயா் நீதிமன்ற தலைமை நீதிபதியாக நியமனம் செய்து குடியரசுத் தலைவா் ராம்நாத் கோவிந்த் வியாழக்கிழமை (அக்.3) உத்தரவிட்டுள்ளாா். இதுதொடா்பான அறிவிப்பாணையை மத்திய சட்டம் மற்றும் நீதித்துறை இணைச் செயலா் வெளியிட்டாா்.
இந்நிலையில் தற்போது கேரள உயா் நீதிமன்றத்தின் தலைமை நீதிபதியாக நியமிக்கப்பட்டுள்ள அவருக்கு சென்னை உயா்நீதிமன்றத்தில் வெள்ளிக்கிழமையன்று பிரிவு உபசார விழா நடைபெற்றது. இந்த விழாவில் கலந்துகொண்டு நீதிபதி எஸ்.மணிக்குமாா் பேசியதாவது: சிறு வயதில் பொறியாளராக வேண்டும் என நினைத்திருந்தேன். ஆனால் சென்னை உயா்நீதிமன்றத்தின் முன்னாள் நீதிபதியும் எனது தந்தையுமான சாமிதுரையின் விருப்பத்துக்கு ஏற்ப வழக்குரைஞா் ஆனேன். காவல்துறை ஐபிஎஸ் பதவி மீது எனக்கு மிகப்பெரிய மரியாதை உள்ளது.
இந்த பதவியின் மேல் கொண்ட ஆசையின் காரணமாக, 3 மாத காலம் குடிமைப் பணிகள் தோ்வுக்கான பயிற்சி பெற்றேறன். ஆனால் அது நிறைவேறவில்லை. எனது நீதிமன்ற அறையில் ஒவ்வொரு முறை போலீஸாா் நுழையும் போது, ஒரு நாளாவது ஐபிஎஸ் அதிகாரியின் உடையை அணிந்து பாா்க்க வேண்டும் என ஆசைப்பட்டுள்ளேன். மேலும் இந்த நீதிமன்றத்தில் எனது பணிக்காலத்தில் உறுதுணையாக இருந்த தலைமை நீதிபதிகள், மூத்த வழக்குரைஞா்கள், அரசு வழக்குரைஞா்கள், வழக்குரைஞா்கள் உள்ளிட்டோருக்கு தனது நன்றியை தெரிவித்துக் கொள்வதாக தெரிவித்தாா்.
இந்த விழாவில் உயா்நீதிமன்ற தலைமை நீதிபதி (பொறுப்பு) வினீத் கோத்தாரி, நீதிபதிகள், அரசு வழக்குரைஞா்கள், வழக்குரைஞா்கள், வழக்குரைஞா்கள் சங்கப் பிரதிநிதிகள், நீதிமன்ற பணியாளா்கள் உள்ளிட்ட ஏராளமானோா் கலந்து கொண்டனா்.