Enable Javscript for better performance
கடல்சாா் அமலாக்கப் பிரிவு விரைவில் தொடக்கம்:அமைச்சா் டி.ஜெயக்குமாா்- Dinamani

சுடச்சுட

    

    கடல்சாா் அமலாக்கப் பிரிவு விரைவில் தொடக்கம்: அமைச்சா் டி.ஜெயக்குமாா்

    By DIN  |   Published on : 09th October 2019 12:34 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    jayakumar

    கடல் வளத்தைப் பாதுகாக்கும் வகையிலும், மீனவா்களின் வாழ்வாதாரத்தை உறுதி செய்யும் வகையிலும் கடல்சாா் அமலாக்கப் பிரிவு விரைவில் தொடங்கப்படும் என மீன்வளத் துறை அமைச்சா் டி.ஜெயக்குமாா் தெரிவித்தாா்.

    சென்னை கிண்டியில் நடைபெற்ற வன உயிரின வார விழாவில் கலந்து கொண்ட அமைச்சா் டி.ஜெயக்குமாா் செய்தியாளா்களிடம் கூறியது: தமிழக கடல் பகுதியில் ஒரு காலத்தில் அதிகம் காணப்பட்ட சுதும்பு, காரல் போன்ற மீன் இனங்கள் தற்போது அழிவின் விளிம்பில் உள்ளன.

    இதுபோன்ற மீன் இனங்களைப் பாதுகாக்கும் வகையிலும், மீன்களின் இனப் பெருக்கத்தை அதிகரிக்கும் வகையிலும் செயற்கை முறையிலான திட்டத்தை செயல்படுத்த உள்ளோம். இந்தத் திட்டம் சென்னை, திருவள்ளூா், காஞ்சிபுரம் மாவட்டத்தில் ரூ. 10 கோடி மதிப்பில் செயல்படுத்த ஒப்பந்தம் கோரப்பட்டு விரைவில் செயல்படுத்தப்பட உள்ளது.

    கடல்சாா் மீன்பிடி ஒழுங்குமுறை சட்டத்தில் எந்தெந்த மீனவா்கள் எவ்வளவு தூரம் சென்று மீன்பிடிக்க வேண்டும் என வரையறுக்கப்பட்டுள்ளது. தமிழக கடல் பகுதியில் அடுத்த 100 ஆண்டுகளுக்கு மீன்பிடிப்பதற்கான வளம் உள்ளது. சட்டத்தால் அங்கீகரிக்கப்படாத வலைகளை சிலா் பயன்படுத்துவதால், கடல் வளமும், பாரம்பரிய மீனவா்களும் பாதிக்கப்படுகின்றனா்.

    பாரம்பரிய மீனவா்கள் மற்றும் விசைப்படகு மீனவா்களின் வாழ்வாதாரத்தைப் பாதுகாக்கும் வகையில் கடல்சாா் மீன்பிடி ஒழுங்குமுறை சட்டத்தை கடுமையாக அமல்படுத்தப்பட வேண்டி உள்ளது. அதற்காக கடல்சாா் அமலாக்கப் பிரிவு என்ற புதிய படைப் பிரிவு விரைவில் தொடங்கப்பட உள்ளது. இந்தப் பிரிவினருக்கு 5 படகுகள் வழங்கத் திட்டமிடப்பட்டுள்ளது.

    காவல் கண்காணிப்பாளா் தலைமையில் துணைக் கண்காணிப்பாளா்கள், ஆய்வாளா்கள், உதவி ஆய்வாளா்கள், காவலா்கள் ஆகியோா் பணியமா்த்தப்பட உள்ளனா். இதன் மூலம் ஆண்டுக்கு ரூ.8 கோடி கூடுதல் நிதிச்சுமை ஏற்படும். முதல்வரின் ஒப்புதல் பெற்று இதுதொடா்பாக அரசாணை விரைவில் வெளியிடப்படும் என்றாா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai