திருச்சி நகைக்கடை கொள்ளை சம்பவம் தொடா்பாக 11 பேரிடம் விசாரணை நடைபெற்று வருகிறது.
திருச்சியில் உள்ள ஒரு பிரபல நகைக் கடையில் அண்மையில் பல கோடி மதிப்புள்ள நகைகள் கொள்ளையடிக்கப்பட்டன. சுவற்றில் துளையிட்டு, முகமூடி அணிந்து, கீழ்தளத்தில் உள்ள நகைகள் அனைத்தையும் கொள்ளையடித்துச் சென்ற சம்பவம் குறித்து, திருச்சி போலீஸாா் தனிப்படைகள் அமைத்து விசாரணை மேற்கொண்டுவருகின்றனா்.
இந்நிலையில், அண்மையில் திருவாரூா் விளமல் பகுதியில் நடைபெற்ற வாகன சோதனையில், இருசக்கர வாகனத்தில் வந்த இருவரை மடக்கி விசாரிக்கையில், ஒருவா் தப்பி ஓடினாா். ஒருவரை கைது செய்து விசாரித்தபோது, அவா் மடப்புரம் பகுதியைச் சோ்ந்த மணிகண்டன் என்பதும், தப்பி ஓடியவா் சீராத்தோப்பு பகுதியைச் சோ்ந்த சுரேஷ் என்பதும் தெரிய வந்தது. மேலும், திருச்சியில் நடைபெற்ற கொள்ளை சம்பவத்தில் அவா்களுக்குத் தொடா்பு இருப்பதும், இந்த கொள்ளைகளுக்கு மூலகாரணமாக முருகன் என்பவா் செயல்பட்டதும் தெரிய வந்தது. இதையடுத்து சுரேஷின் தாய் கனகவள்ளி உள்ளிட்ட 5 பேரிடம் விசாரணை நடத்தப்பட்டது. பின்னா், மணிகண்டன், கனகவள்ளி இருவரும் திருச்சி மத்திய சிறையில் அடைக்கப்பட்டனா்.
திருச்சி கொள்ளை சம்பவத்தில் தொடா்புடைய நபா்கள் திருவாரூரைச் சோ்ந்தவா்கள் என்பதால், திருச்சி தனிப்படை போலீஸாா் திருவாரூரில் முகாமிட்டு, விசாரணை நடத்தி வருகின்றனா். இதன்படி, திருவாரூா் சீராத்தோப்பு பகுதியைச் சோ்ந்த முருகனின் அண்ணன் மகனான முரளி என்பவரை, திருச்சி தனிப்படை போலீஸாா் கைது செய்ததோடு, மேலும் சிலரையும் விசாரித்து வந்தனா்.
இந்நிலையில், திருவாரூா் அருகேயுள்ள கொரடாச்சேரியில் திங்கள்கிழமை நடைபெற்ற வாகன சோதனையின்போது, ஆந்திரத்தைச் சோ்ந்த 3 போ் பிடிபட்டனா். அவா்களிடமும் தனிப்படை போலீஸாா் விசாரணை நடத்தி வருகின்றனா்.
அத்துடன், போலீஸாரின் விசாரணையில் உள்ள பிரதாபின் தாயாா் ராஜலெட்சுமி, மாரியப்பன் தாயாா் அமுதா ஆகியோரிடம் திருச்சி தனிப்படை போலீஸாா் விசாரணை மேற்கொண்டுள்ளனா். மேலும், இதுவரையிலும் சந்தேகத்தின் பேரில் 11 பேரிடம் விசாரணை நடைபெற்று வருவதாக காவல்துறை வட்டாரங்கள் தெரிவிக்கின்றன.