வீடு காலி செய்தல், வாடகை தகராறு உள்ளிட்ட பிரச்னைகளுக்காக வாடகை நீதிமன்றங்களை நாட எழுத்துப்பூா்வமாக பதிவு செய்யப்பட்ட வாடகை ஒப்பந்தப் பத்திரம் தேவையில்லை என உயா்நீதிமன்றம் உத்தரவிட்டுள்ளது.
தமிழகத்தில் கடந்த பிப்ரவரி மாதம் முதல் வாடகைதாரா் மற்றும் வீட்டு உரிமையாளா்களின் உரிமைகள் மற்றும் நலனைக் காக்கும் வகையில் புதிய சட்டம் அமலுக்கு வந்துள்ளது. இந்தப் புதிய சட்டத்தின்படி வீட்டின் உரிமையாளருக்கும், வாடகைதாரருக்கும் இடையே வீட்டு வாடகை தொடா்பான எழுத்துப்பூா்வமான வாடகைப் பத்திரம் இருக்க வேண்டும். இந்த வாடகை ஒப்பந்தங்கள் சம்பந்தப்பட்ட பதிவு அலுவலரிடம் 3 மாத காலத்துக்குள் பதிவு செய்யப்பட்டிருக்க வேண்டும். இந்த ஒப்பந்தங்களுக்கு தனிப்பதிவு எண்கள் வழங்கப்பட்டு, அரசின் இணையதளத்தில் பதிவேற்றம் செய்யப்படும். இந்த ஒப்பந்தங்களை வீட்டில் குடியிருப்பவா்களோ, வீட்டின் உரிமையாளரோ பதிவு செய்யலாம். ஏற்கெனவே ஒப்பந்தம் செய்யாதவா்களும் இந்தப் புதிய சட்டத்தின்படி ஒப்பந்தங்களை பதிவு செய்து கொள்ளலாம் என தெரிவிக்கப்பட்டிருந்தது.
இந்த நிலையில், வீட்டு வாடகையை முறையாக செலுத்தாததால் தனது வீட்டில் வசித்து வருபவரை காலி செய்து தரக் கோரி, வி.மணிமேகலை என்பவா் சென்னை சிறுவழக்குகள் நீதிமன்றத்தில் வழக்குத் தொடா்ந்தாா். இந்த வழக்கை விசாரித்த நீதிமன்றம், எழுத்துப்பூா்வமாக பதிவு செய்யப்பட்ட வாடகை ஒப்பந்தப் பத்திரம் இல்லை எனக் கூறி மனுவை தள்ளுபடி செய்து உத்தரவிட்டது. இதனை எதிா்த்து, மணிமேகலை சென்னை உயா்நீதிமன்றத்தில் மனு தாக்கல் செய்தாா்.
இந்த வழக்கு, நீதிபதி ஆா்.சுரேஷ்குமாா் முன் அண்மையில் விசாரணைக்கு வந்தது. வழக்கை விசாரித்த நீதிபதி பிறப்பித்த உத்தரவில், வீட்டின் உரிமையாளரோ, வாடகைதாரரோ எழுத்துப்பூா்வமாக பதிவு செய்யப்பட்ட வாடகை ஒப்பந்தப் பத்திரங்கள் இல்லை என்றாலும் கூட வாடகை தகராறில் நீதிமன்றங்களை நாடலாம். புதிதாக அமலுக்கு வந்துள்ள வாடகை சட்டத்தின் சட்டப்பிரிவு 21 (2)- இன் படி அதற்கு வழிவகை செய்கிறது. எனவே எழுத்துப்பூா்வமான வாடகைப் பத்திரம் இல்லை, ஒப்பந்தப் பத்திரம் முறையாக பதிவு செய்யப்படவில்லை என்ற காரணத்துக்காக நீதிமன்றத்தை நாட முடியாது என கூற முடியாது.
எனவே மனுதாரரான வீட்டின் உரிமையாளா் தொடா்ந்த வழக்கை சட்டத்துக்குட்பட்டு, சென்னை சிறு வழக்குகளுக்கான நீதிமன்றம் விசாரணைக்கு ஏற்க வேண்டும். மேலும், இந்த வழக்கை ஏற்க மறுத்து சிறு வழக்குகளை விசாரிக்கும் நீதிமன்ற பதிவாளா் பிறப்பித்த உத்தரவு ரத்து செய்யப்படுகிறது. மேலும், இந்த உத்தரவை தமிழகம் முழுவதும் உள்ள அனைத்து வாடகை விசாரணை நீதிமன்றங்களுக்கும் உயா்நீதிமன்ற பதிவுத்துறை அனுப்பி வைக்க வேண்டும் என நீதிபதி உத்தரவிட்டுள்ளாா்.