கரோனா பாதித்தவா்களை உடனடியாக கண்டறியும் வகையில் பிரத்யேக செல்லிடப்பேசி செயலியை பெருநகர சென்னை மாநகராட்சி அறிமுகம் செய்துள்ளது.
இந்த செயலியைப் பயன்படுத்தி கரோனா அறிகுறி உள்ளவா்கள் செல்ஃபி எடுத்து பதிவிட்டால், அவா்கள் இருப்பிடத்துக்கே சென்று மருத்துவ உதவிகளை மாநகராட்சி அதிகாரிகள் மேற்கொள்வாா்கள் என ஆணையா் கோ.பிரகாஷ் தெரிவித்தாா்.
சென்னையில் கரோனாவால் பாதிக்கப்பட்டவா்களின் எண்ணிக்கை 26-ஆக உயா்ந்துள்ளது. இதைத் தொடா்ந்து, கரோனாவால் பாதிக்கப்பட்டவா்களை உடனடியாக கண்டறியும் வகையில் செல்லிடப்பேசி செயலியை சென்னை மாநகராட்சி அறிமுகம் செய்துள்ளது.
இந்த செயலியை புதன்கிழமை அறிமுகம் செய்து வைத்து ஆணையா் கோ.பிரகாஷ் செய்தியாளா்களிடம் கூறியது:
வெளிநாட்டில் இருந்து சென்னை திரும்பிய சுமாா் 20 ஆயிரம் போ் வீடுகளில் தனிமைப்படுத்தப்பட்டு தொடா் கண்காணிப்பில் உள்ளனா். கரோனா தொடா்பான சந்தேகங்கள் மற்றும் தகவல்களை தெரிந்துகொள்ள 044 25384520 என்ற தொலைபேசி எண்ணிலும், தனிமைப்படுத்தப்பட்டவா்கள் மருத்துவம் மற்றும் உளவியல் ரீதியான ஆலோசனைகளுக்கு 044 46122300 என்ற தொலைபேசி எண்களிலும் தொடா்பு கொள்ளலாம்.
பொதுமக்கள் கரோனா தொடா்பான தகவல்களை பகிா்ந்துகொள்ள ஏதுவாக மாநகராட்சியின் சாா்பில் கரோனா கண்காணிப்பு செல்லிடப்பேசி செயலி அறிமுகப்படுத்தப்பட்டுள்ளது. இணையதளத்தில் இந்த செயலியைப் பதிவிறக்கம் செய்து கொள்ளலாம்.
சென்னை மாநகராட்சிக்குட்பட்ட பகுதிகளில் கரோனா அறிகுறிகள், வீடுகளில் தனிமைப்படுத்தப்பட்டுள்ளவா்கள் மற்றும் சளி, இருமல், காய்ச்சல் உள்ளவா்கள் தங்கள் இருப்பிடங்களில் இருந்து செல்ஃபி எடுத்து செயலி மூலம் பதிவேற்றம் செய்தால் அவா்களின் முகவரி மாநகராட்சி கட்டுப்பாட்டு அறையில் சேகரித்து வைத்துக் கொள்ளப்படுவதுடன், ஜிபிஎஸ் வசதியைப் பயன்படுத்தி அவா்களின் இருப்பிடத்துக்கே சென்று மருத்துவ உதவி செய்யப்படும். இந்த செயலி மூலம் கரோனா பாதிப்பு ஆரம்ப கட்டத்திலேயே கண்டறியப்படும் என்றாா்.