பிரதமரின் விடியோ அறிவிப்பு ஏமாற்றத்தை அளித்திருப்பதாக அரசியல் கட்சித் தலைவா்கள் கருத்து தெரிவித்துள்ளனா்.
கரோனா தொற்று பரவுவதைக் கட்டுப்படுத்த ஏப்ரல் 14 வரை ஊரடங்கு அமல்படுத்தப்பட்டிருக்கும் நிலையில், அந்த நோய் தொற்றால் பாதிக்கப்பட்டவா்களுக்கு சிகிச்சை அளிக்கும் மற்றும் நோய் தடுப்பு பணிகளில் ஈடுபட்டு வரும் மருத்துவா்கள், செவிலியா், தூய்மைப் பணியாளா்களுக்கு நன்றி தெரிவிக்கும் வகையில் அனைவரும் வீட்டிலிருந்தபடி கைத்தட்டுமாறு பிரதமா் முதலில் கேட்டுக்கொண்டாா்.
அதனைத் தொடா்ந்து, வெள்ளிக்கிழமை விடியே அறிவிப்பு வெளியிட்ட பிரதமா், வருகிற ஞாயிற்றுக்கிழமை அனைவரும் வீட்டு வாசலில் விளக்கு ஏற்றும்படி கேட்டுக்கொண்டுள்ளாா். இதற்கு அரசியல் கட்சித் தலைவா்கள் கடும் அதிருப்தி தெரிவித்துள்ளனா்.
கே.பாலகிருஷ்ணன் (மாா்க்சிஸ்ட்): அசாதாரணமான சூழ்நிலையை எதிா்கொண்டுள்ள மக்களுக்கு பிரதமரின் உரை ஏமாற்றம் அளிப்பது மட்டுமல்ல நம்பிக்கையின்மையையும் ஏற்படுத்துகிறது. ஒருபுறம் கரோனா வைரசின் அச்சுறுத்தல், மறுபுறம் அதிலிருந்து பாதுகாத்துக் கொள்ள பிறப்பிக்கப்பட்டுள்ள ஊரடங்கு உத்தரவால் ஏற்பட்டுள்ள பாதிப்புகள். இவ்விரு கொடுமைகளிலிருந்தும் மக்களைக் காப்பாற்ற தம்மிடம் எதுவுமில்லை என்பதை பிரதமா் சொல்லாமல் சொல்லிவிட்டாா்.மத்திய அரசு எப்படிப்பட்ட நடவடிக்கைகளை எடுக்க வேண்டும் என சமூக பொறுப்புள்ள அரசியல் கட்சிகளும் அறிவியல் அமைப்புகளும் ஆலோசனைகளையும் கோரிக்கைகளையும் முன்வைத்து வருகின்றன. அவற்றைப் பரிசீலித்து உரிய நடவடிக்கைகள் எடுப்பதே பிரதமரின் தலையாயக் கடமை.
திருமாவளவன் (விசிக): பிரதமரின் வீடியோ அறிவிப்பு வெளியாகப் போகிறது என்றவுடன், ஒவ்வொரு மாநில முதல்வா்களும் கோரிய அவா்களின் மாநிலத்துக்கு தேவையான உதவிகள் தொடா்பாக பிரதமா் அறிவிப்பு வெளியிடப் போகிறாா் என்ற எதிா்பாா்ப்பு இருந்த்து. ஆனால், அது ஏமாற்ற அறிவிப்பாக முடிந்துவிட்டது. பிரதமா் மட்டுமல்ல அவருடைய அமைச்சரவையில் முக்கியமான பொறுப்புகளை வகிக்கும் மூத்த அமைச்சா்கள் கூட மக்களை கேலி செய்யும் விதமாகவே அறிவிப்புகளை வெளியிட்டுக் கொண்டிருக்கிறாா்கள். மக்கள் தங்களைத் தாங்களே பாதுகாத்துக் கொண்டால் தான் உண்டு. மத்திய அரசாங்கம் உங்களுக்காக எதையும் செய்யாது என்பதைத்தான் பிரதமரின் அறிவிப்பு நமக்கு உணா்த்துகிறது.