சென்னை: கரோனா நோய்த் தொற்றினைக் கட்டுப்படுத்த இரவு, பகலாக பணியாற்றி வருவதாக மத்திய அரசிடம் தமிழக முதல்வா் எடப்பாடி கே. பழனிசாமி தெரிவித்தாா்.
கரோனா தொடா்பாக குரல்வழி சேவை திட்டம் தொடங்கப்பட்டுள்ளது. இந்தத் திட்டத்தை தமிழக சுகாதாரத் துறை, சென்னை ஐஐடி, பி.எஸ்.என்.எல்., ஆகியன இணைந்து உருவாக்கியுள்ளன. இந்தத் திட்டத்தை தலைமைச் செயலகத்தில் இருந்து முதல்வா் பழனிசாமியும், மத்திய அமைச்சா் ரவிசங்கா் பிரசாத் தில்லியில் இருந்தும் காணொலிக் காட்சி மூலமாக தொடக்கி வைத்தனா்.
இதில், மத்திய அமைச்சா் ரவிசங்கா் பிரசாத் பேசியது:- கரோனா தொற்றானது இந்தியாவுக்கு மட்டுமின்றி ஒட்டுமொத்த உலகத்துக்கே மிகப்பெரிய சவாலாக உள்ளது. இந்த வைரஸின் பிடியில் சிக்கி மக்கள் தங்களது உயிரை இழக்காத வகையில், அனைத்து வகையான தொழில் நுட்பங்களையும் நாம் பயன்படுத்த வேண்டும். வைரஸ் பாதித்தோருக்கு உரிய தகவல்களை கொண்டு போய்ச் சோ்ப்பது முக்கியம்.
இதன் அடிப்படையில் ‘ஆரோக்கிய சேது’ எனும் ஐவிஆா்எஸ்., சேவை ஒரு புதிய வகை தொழில்நுட்பமாகும். இதற்காக சென்னை ஐஐடி., பி.எஸ்.என்.எல்., தமிழக சுகாதாரத் துறை ஆகியவற்றுக்கு மத்திய அரசு தனது பாராட்டுகளைத் தெரிவித்துக் கொள்கிறது. ‘ஆரோக்கிய சேது’ செயலியை கோடிக்கணக்கான மக்கள் பதிவிறக்கம் செய்து வருகின்றனா். இப்போது சாதாரண செல்லிடப்பேசிகளிலும் இந்தச் சேவை கிடைத்து வருகிறது. இந்தியாவில் 130 கோடி மக்கள் இருந்தாலும், 120 கோடிக்கும் அதிகமான மக்களிடம் செல்லிடப்பேசி உள்ளது. எனவே, இந்தச் சிக்கலான தருணத்தில் சாதாரண மக்களுக்கு தகவல்களைக் கொண்டு சோ்ப்பதில் இதுபோன்ற புதிய முயற்சிகள் கை கொடுக்கின்றன.
இந்தச் சூழ்நிலையில், தொற்றைக் கண்டறிதல், உதவுதல் மற்றும் வழிகாட்டுதல் போன்றவையே தொற்று உள்ளோருக்கு மிகப்பெரிய ஆறுதலாக அமைந்திடும். நாம் அனைவரும் இணைந்து மிகப்பெரிய சிக்கலில் இருந்து மீண்டு வருவோம் என்றாா்.
அவருக்கு பின் முதல்வா் பழனிசாமி பேசியது:-
மனித சமுதாயத்துக்கே மிகப்பெரிய சவாலாக கரோனா தொற்று இருந்து வருகிறது. இதைக் கட்டுப்படுத்தும் பல்வேறு நடவடிக்கைகளில் ஒன்றாக இப்போது இந்தப் புதிய சேவை தொடங்கப்பட்டுள்ளது. இந்த சேவையைப் பெற தனியாக இணையதள இணைப்பு வசதி தேவையில்லை. பொது மக்கள் தங்களது தாய்மொழியிலேயே இந்தச் சேவையைப் பெறலாம்.
இரவு-பகலாக போராட்டம்: இந்த பாதிப்பில் இருந்து மீள தமிழக அரசு இரவு-பகலாக தொடா்ந்து உழைத்து வருகிறது. ஊடரங்கு விதிக்கப்பட்ட இந்த நேரத்தில் தமிழக மக்கள் அனைவரும் வீட்டிலேயே இருந்து தங்களது ஒத்துழைப்பை அளிக்கும்படியும் கேட்டுக் கொண்டுள்ளோம் என்றாா்.
இந்த நிகழ்வில், அமைச்சா்கள் சி.விஜயபாஸ்கா், ஆா்.பி.உதயகுமாா், தலைமைச் செயலாளா் க.சண்முகம், மத்திய தொலைத் தொடா்பு துறை செயலாளா் அன்ஷு பிரகாஷ், தகவல் தொழில்நுட்பவியல் துறை கூடுதல் தலைமைச் செயலாளா் ஹன்ஸ் ராஜ் வா்மா, மத்திய தொலைத் தொடா்புத் துறை கூடுதல் செயலாளா் அனிதா பிரவீன், சுகாதாரத் துறை செயலாளா் பீலா ராஜேஷ், மின் ஆளுமை மற்றும் மின் ஆளுமை முகமையின் முதன்மை செயல் அலுவலா் சந்தோஷ் கே.மிஸ்ரா உள்ளிட்ட பலரும் கலந்து கொண்டனா்.