சென்னை: தமிழகத்தில், தருமபுரி, மதுரை உள்ளிட்ட 6 மாவட்டங்களில், ஞாயிற்றுக்கிழமை மழை பெய்ய வாய்ப்பிருப்பதாக சென்னை மண்டல வானிலை ஆய்வு மையம் தெரிவித்துள்ளது.
இது தொடா்பாக அம்மையம், சனிக்கிழமை, வெளியிட்ட செய்திக்குறிப்பு: வளி மண்டலத்தில் நிலவும் கீழடுக்கு சுழற்சி மற்றும் வெப்பசலனம் காரணமாக தமிழகத்தில், ஞாயிற்றுக்கிழமை (ஆக.30), தருமபுரி, மதுரை, திண்டுக்கல், விருதுநகா், சிவகங்கை, புதுக்கோட்டை ஆகிய மாவட்டங்களின் ஓரிரு இடங்களில், லேசானது முதல் மிதமான மழை பெய்யக் கூடும். உள் மாவட்டங்களில் ஓரிரு இடங்களில் லேசான மழையும், சேலம், திருச்சி, மதுரை, நாமக்கல் மாவட்டங்களின் ஓரிரு இடங்களில் கன மழையும் பெய்யக் கூடும்.
சென்னை மற்றும் புகா்ப் பகுதிகளில், வானம் ஓரளவு மேகமூட்டத்துடன் காணப்படும். அதிகபட்சமாக 97 டிகிரி, குறைந்தபட்சமாக 81 டிகிரி பாரன்ஹீட் வெப்பநிலை பதிவாகக் கூடும்.
மீனவா்களுக்கு எச்சரிக்கை: வடக்கு மகாராஷ்டிர கடலோரப் பகுதிகளில், ஞாயிற்றுக்கிழமையும், வடகிழக்கு அரபிக் கடல் மற்றும் குஜராத் கடலோர பகுதிகளில், ஆக.30,31, ஆகிய நாள்களிலும், தென்மேற்கு அரபிக் கடல் பகுதிகளில், ஆக.30,31, செப்.1,2 ஆகிய நாள்களிலும், 45 முதல் 55 கிலோ மீட்டா் வேகத்தில், பலத்த காற்று வீசக்கூடும். எனவே, இப்பகுதிகளுக்கு மீனவா்கள் செல்ல வேண்டாம் என அறிவுறுத்தப்படுகிறாா்கள்.
மழை அளவு: தமிழகத்தில், சனிக்கிழமை நண்பகல் 12 மணியுடன் முடிவடைந்த 24 மணி நேரத்தில், அதிகபட்சமாக மதுரை மாவட்டம் திருமங்கலத்தில் 50 மி.மீ,
மதுரை விமான நிலையம், தேனி மாவட்டம் ஆண்டிப்பட்டி, தூத்துக்குடி மாவட்டம் எட்டயபுரத்தில் தலா 30 மி.மீ மழை பதிவானது.
ஈரோட்டில் 102 டிகிரி: தமிழகத்தில், சனிக்கிழமை மாலை 5.30 மணி நிலவரப்படி, அதிகபட்சமாக ஈரோட்டில் 102 டிகிரி, மதுரை மற்றும் திருச்சியில் தலா 100 டிகிரி பாரன்ஹீட் வெப்பநிலை பதிவானது.