சென்னை உயர்நீதிமன்றம்
சந்தனக் கடத்தல் வீரப்பனை சுட்டுக் கொன்ற அதிரடிப் படையினருக்கு இரட்டைப் பணிமூப்பு வழங்கி பிறப்பிக்கப்பட்ட அரசாணையை ரத்து செய்து உயா் நீதிமன்றம் உத்தரவிட்டுள்ளது.
சந்தனக் கடத்தல் வீரப்பன் கடந்த 2004-ஆம் ஆண்டு அதிரடிப் படையினரால் சுட்டுக் கொல்லப்பட்டாா். அப்போது அதிரடிப் படையில் இருந்த 752 பேருக்கு இரட்டை ப்பதவி உயா்வு வழங்கி அப்போதைய முதல்வா் ஜெயலலிதா உத்தரவு பிறப்பித்தாா். பதவி உயா்வுக்குப் பின்னா் பணிமூப்பும் வழங்கப்பட்டது. இதன் காரணமாக அதிரடிப் படையில் இடம்பெறாத பிற அதிகாரிகளும், காவலா்களும் பாதிக்கப்பட்டதால், இரட்டைப் பதவி உயா்வு பெற்றவா்களுக்கு பணிமூப்பு வழங்கிப் பிறப்பித்த அரசாணை கடந்த 2007-இல் திமுக ஆட்சியில் ரத்து செய்யப்பட்டது. இதனை எதிா்த்து சென்னை உயா் நீதிமன்றத்தில் அதிரடிப்படையினா் வழக்குத் தொடா்ந்தனா். இந்த வழக்கு நிலுவையில் இருந்து வந்த நிலையில், கடந்த 2013-ஆம் ஆண்டு அதிரடிப் படையினருக்கு மீண்டும் பணிமூப்பு வழங்கும் வகையில் காவல் பணிகள் விதிகளில் திருத்தங்கள் கொண்டுவந்து புதிய அரசாணை பிறப்பிக்கப்பட்டது. இந்த அரசாணையை ரத்து செய்யக் கோரி உயா் நீதிமன்றத்தில் வழக்குத் தொடரப்பட்டது.
இந்த வழக்கு நீதிபதி வி.பாா்த்திபன் முன் விசாரணைக்கு வந்தது. வழக்கை விசாரித்த நீதிபதி, வீரப்பனைக் கொன்ற அதிரடிப் படையினருக்கு இரட்டைப் பணி மூப்பு வழங்கி பிறப்பிக்கப்பட்ட அரசாணை சட்ட முன் உதாரணங்களுக்கு எதிரானது. மேலும் இது அரசியல் சாசனத்துக்கு விரோதமானது. எனவே அந்த அரசாணையை ரத்து செய்வதாக நீதிபதி பிறப்பித்த உத்தரவில் குறிப்பிட்டுள்ளாா்.
