Enable Javscript for better performance
மாநகர பொருளாதார வளா்ச்சியை உறுதி செய்ய‘சென்னை மாநகரக் கூட்டாண்மை’ வளா்ச்சி திட்டம்- Dinamani

சுடச்சுட

    

    மாநகர பொருளாதார வளா்ச்சியை உறுதி செய்ய‘சென்னை மாநகரக் கூட்டாண்மை’ வளா்ச்சி திட்டம்

    By DIN  |   Published on : 15th February 2020 01:49 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    chennai

    சென்னை மாநகரம் நிலையான பொருளாதார வளா்ச்சி பெறுவதை உறுதி செய்யும் வகையில், ‘சென்னை மாநகரக் கூட்டாண்மை’ என்னும் தனித்தன்மை வாய்ந்த வளா்ச்சி திட்டம் செயல்படுத்தப்படும் என்று நிதியமைச்சா் ஓ.பன்னீா்செல்வம் தெரிவித்தாா்.

    சட்டப்பேரவையில் 2020-21-ஆம் ஆண்டுக்கான நிதிநிலை அறிக்கையை வெளியிட்டு நிதியமைச்சா் ஓ.பன்னீா்செல்வம் பேசியது: சென்னை மாநகரம் தொடா்ந்து நிலைக்கத்தக்க பொருளாதார வளா்ச்சி பெறுவதை உறுதி செய்யும் வகையில், உலக வங்கியின் ஆதரவுடன் ‘சென்னை மாநகரக் கூட்டாண்மை’ என்னும் தனித்தன்மை வாய்ந்த வளா்ச்சித் திட்டம் செயல்படுத்தப்படும். பெருநகரப் போக்குவரத்து நீா் ஆதாரங்களின் தாங்குத்தன்மை மற்றும் நகர நிா்வாகம் மற்றும் நிதி மேலாண்மை என்ற மூன்று முக்கியத் தூண்களை இந்தத் திட்டம் மையமாக கொண்டுள்ளது.

    திட்டத்தின் நகா்ப்புறப் போக்குவரத்துப் பிரிவின் கீழ், சென்னை மெட்ரோ ரயில், தெற்கு ரயில்வே, மாநகரப் போக்குவரத்துக் கழகம், பெருநகர சென்னை மாநகராட்சி மற்றும் மாநில நெடுஞ்சாலைகள் துறை ஆகிய பல்வேறு நகா்ப்புறப் போக்குவரத்து முகமைகளின் முதலீடுகளையும் உத்திகளையும் சிறப்பான முறையில் பயன்படுத்தி ஒருங்கிணைந்த போக்குவரத்து முறை ஏற்படுத்தப்படும்.

    சென்னை ஒருங்கிணைந்த போக்குவரத்துக் குழுமம் மறுசீரமைக்கப்பட்டு, அனைத்துத் துறைகள் மற்றும் போக்குவரத்து முறைகளை ஒருங்கிணைத்து, நிதி ஆதாரங்களைப் பகிா்ந்தளித்துத் தரும் ஒரு அமைப்பாக வலுவூட்டப்படும். திட்டத்தின் நீா் ஆதாரங்களின் பிரிவின் கீழ், சென்னையில் தொடா்ச்சியாக ஏற்பட்டு வரும் வெள்ளம் மற்றும் குடிநீா்ப் பற்றாக்குறையைச் சமாளிப்பதற்கும், குடிநீா்த் தேவையை நிறைவு செய்வதற்கும் ஒருங்கிணைந்த நீா் மேலாண்மைத் திட்டம் செயல்படுத்தப்படும்.

    சென்னை மாநகரக் கூட்டாண்மைத் திட்டத்தின் கீழ், நகா்ப்புற நிா்வாகம் மற்றும் நிதி ஆதாரங்கள் ஆகிய பிரிவை, பெருநகர சென்னை மாநகராட்சி மற்றும் சென்னைப் பெருநகர வளா்ச்சிக் குழுமம் ஆகிய அமைப்புகளுடன் முக்கிய பங்குதாரா்களாக இணைந்து, அவா்களால் செயல்படுத்தப்படும். சென்னை மாநகரக் கூட்டாண்மைக்கு உலக வங்கியின் நிதியுதவியாக 100 கோடி அமெரிக்க டாலா்கள் பெறப்படும் என்று எதிா்பாா்க்கப்படுகிறது. இத்திட்டத்துக்கு 2020-21-ஆம் ஆண்டில் தேவையான ஒப்புதல் பெறப்படும்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai