நாடாளுமன்றம், சட்டப்பேரவைகளுக்கு இணையான அதிகாரம் கொண்டவை கிராம ஊராட்சிகள் என்று பேரூராதீனம் திருப்பெருந்திரு சாந்தலிங்க மருதாசல அடிகளார் பேசினார்.
ஊராட்சித் தலைவர்களுக்கான பாராட்டு விழாவில் அவரது ஆசியுரை:
ஊராட்சி மன்றத் தலைவர்களாகத் தேர்வு செய்யப்பட்டவர்களுக்குப் பல்வேறு அமைப்புகளும் பாராட்டு விழா நடத்தி வரும் நிலையில், பேரூராதீனம் ஏன் இந்தப் பணியை முன்னெடுத்திருக்கிறது என்ற கேள்வி அனைவருக்கும் எழலாம்.
இந்தப் பேரூர் மண்ணில் அருளாட்சி புரிந்த சாந்தலிங்க பெருமான் காலத்தில், கன்னட நாட்டை ஆண்டுவந்த குமாரதேவர் என்ற மகாராஜா, சாந்தலிங்க பெருமானிடம் வந்து அருளாசி பெற்று அவரது சீடராக இருந்து பல காலம் தொண்டாற்றினார்.
அந்த மரபில் இப்போது ஊராட்சித் தலைவர்களாகி இருப்பவர்கள் சிறப்பாகப் பணியாற்றுவதற்கு, பட்டீசுவரர் அருள் நிறைந்த இந்த இடத்தில் ஒரு வழிகாட்டுதல் கருத்தரங்கை நடத்த வேண்டும் என்பதே எமது நோக்கம்.
இந்தியாவில் சட்டமியற்றும் இடங்களாக நாடாளுமன்றமும், சட்டப்பேரவையும் உள்ளன. ஆனால், இவற்றின் அடித்தளத்தில் முதன்மையாக இருப்பது ஊராட்சிகள்தான். சட்டப் பேரவையும், நாடாளுமன்றமும் பிற்கால அரசியல் வறட்சி காரணமாகத் தோன்றியவை.
ஆனால் சங்க காலம் தொட்டு உள்ளாட்சி நிர்வாக அமைப்பு தமிழகத்தில் உள்ளது. ஐம்பெரும் குழு, எண்பேராயம் போன்ற அமைப்புகள் உள்ளாட்சிகளின் வளர்ச்சிக்குத் துணை நின்றன.
இந்தியாவின் மூன்றடுக்கு நிர்வாகத்தில் உன்னதமானது கிராம ஊராட்சி நிர்வாகம்.
இது சட்டப்பேரவை, நாடாளுமன்றத்துக்கு இணையான அதிகாரம் கொண்டது. காந்தியடிகள் காலத்தில் கிராம சுயராஜ்ய சிந்தனை வலுப்பெறத் தொடங்கியது.
நகரத்தில் இருப்பவர்கள் கிராமங்களை நோக்கி வரும் வகையில் ஒவ்வொரு கிராமமும் தற்சார்பு பொருளாதாரம் உடையதாக இருக்க வேண்டும் என்பதே காந்தியடிகளின் கனவாக இருந்தது. ஊராட்சித் தலைவர் பதவி என்பது ஒருபக்கம் பெருமிதம் கொண்டதாக இருந்தாலும் மறுபக்கம் அதிகமான கடமை உணர்ச்சி கொண்டது.
மரம் வளர்ப்பு, சுற்றுச்சூழல் பாதுகாப்பு, நீர்நிலைகள் பாதுகாப்பு, கிராமப்புற பள்ளிகள், குறிப்பாக தமிழ் வழிப் பள்ளிகளில் மாணவர் சேர்க்கை குறைந்து வருவது போன்றவற்றுக்காக நல்ல செயல்திட்டங்களைக் கொண்டு வர வேண்டும். அரசுப் பள்ளிகளை கோயில்களாக நினைத்து அவற்றை வளப்படுத்த வேண்டும் என்றார்.