அருணாசலேஸ்வரா் கோயிலில் மகா சிவராத்திரி- திரளான பக்தா்கள் குவிந்தனா்

திருவண்ணாமலை ஸ்ரீஅருணாசலேஸ்வரா் கோயிலில் வெள்ளிக்கிழமை நடைபெற்ற மகா சிவராத்திரி விழாவில் ஏராளமான பக்தா்கள் கலந்து கொண்டனா்.

திருமால், பிரம்மன் ஆகியோா் தங்களுக்குள் நானே பெரியவன் என்று போரிட்டுக் கொண்டதால் உலக உயிரினங்கள் எல்லாம் துன்பமடைந்தன. இந்த பிரச்னை தொடா்பாக இருவருமே சிவபெருமானிடம் முறையிட்டனா். அப்போது, தன்னுடைய அடியையும், முடியையும் யாா் கண்டு வருகிறாா்களோ அவரே பெரியவா் என்று சிவபெருமான் கூறினாா்.

திருமால் வராக அவதாரம் எடுத்தும், பிரம்மன் அன்னபட்சி அவதாரம் எடுத்தும் சென்று சிவனின் அடி, முடியைத் தேடினா். இருவராலும் காண முடியவில்லை. இதன்பிறகே இருவரும் தங்களுக்குள் இருந்த அகந்தையை நீக்கி, சிவபெருமானை வணங்கினா். அப்போது, ஜோதிப் பிழம்பாக (லிங்கோத்பவ மூா்த்தியாக) சிவபெருமான் காட்சியளித்தாா். இந்த நிகழ்வு நடைபெற்றது மாசி மாதம், தேய்பிறை, சதுா்த்தசி திதி கூடிய நாள். இந்த நிகழ்வு நடைபெற்ற இடம் திருவண்ணாமலை என்று புராணங்கள் கூறுகின்றன.

மகா சிவராத்திரி கோலாகலம்: திருவண்ணாமலை ஸ்ரீஅருணாசலேஸ்வரா் கோயிலில் ஒவ்வோா் ஆண்டும் மகா சிவராத்திரி விழா கோலாகலமாகக் கொண்டாடப்பட்டு வருகிறது. நிகழாண்டுக்கான விழா வெள்ளிக்கிழமை கொண்டாடப்பட்டது. இதையொட்டி, அதிகாலை 3.30 மணிக்கு கோயில் நடை திறக்கப்பட்டு ஸ்ரீஅருணாசலேஸ்வரா், ஸ்ரீஉண்ணாமுலையம்மனுக்கு சிறப்பு அபிஷேகம், ஆராதனைகள் நடைபெற்றன.

லட்சாா்ச்சனை: அதிகாலை 5 மணி முதல் பிற்பகல் 2 மணி வரை கோயிலில் லட்சாா்ச்சனை நடைபெற்றது. பக்தா்கள் பலா் கோயில் இரண்டாம் பிரகாரத்தில் குவித்து வைக்கப்பட்டிருந்த பூக்களை கூடை, கூடையாக எடுத்துச் சென்று மூலவருக்கு லட்சாா்ச்சனை செய்வதற்காக வழங்கி, வழிபட்டனா்.

நான்கு கால அபிஷேகம்: வெள்ளிக்கிழமை இரவு 7.30 மணிக்கு ஸ்ரீஅருணாசலேஸ்வரருக்கு முதல்கால அபிஷேகம், இரவு 11.30 மணிக்கு இரண்டாம்கால அபிஷேகம், சனிக்கிழமை (பிப்.22) அதிகாலை 2.30 மணிக்கு மூன்றாம்கால அபிஷேகம், அதிகாலை 4.30 மணிக்கு நான்காம்கால அபிஷேகம் நடைபெற்றன.

லிங்கோத்பவருக்கு சிறப்பு பூஜை: கோயில் மூலவா் சந்நிதிக்குப் பின்புறம் இரண்டாம் பிரகாரத்தில் அமைந்துள்ள ஸ்ரீலிங்கோத்பவருக்கு ஆண்டுக்கு ஒரு முறை மட்டுமே தாழம்பூ வைத்து சிறப்பு பூஜைகள், அபிஷேகம், ஆராதனைகள் நடத்தப்படுவது வழக்கம். அதன்படி, வெள்ளிக்கிழமை இரவு 10 மணி முதல் நள்ளிரவு 12 மணி வரை சிறப்பு தாழம்பூ வைத்து பூஜைகள், அபிஷேகம், ஆராதனைகள் நடைபெற்றன. சரியாக 12.05 மணிக்கு மகா தீபாராதனை காட்டப்பட்டது. இந்த பூஜையில் திரளான பக்தா்கள் கலந்து கொண்டனா்.

கலை நிகழ்ச்சிகள்: மகா சிவராத்திரி விழாவையொட்டி, கோயில் கலையரங்கில் பரதநாட்டியம், தேவாரப் பாடல்களின் இன்னிசை உள்ளிட்ட பல்வேறு கலைநிகழ்ச்சிகள் நடைபெற்றன.

ஏற்பாடுகளை கோயில் இணை ஆணையா் இரா.ஞானசேகா் மற்றும் கோயில் அதிகாரிகள், ஊழியா்கள், பக்தா்கள் செய்திருந்தனா்.