Enable Javscript for better performance
தேசநலனே முதன்மையானது: குடியரசு துணைத் தலைவா் வெங்கய்ய நாயுடு- Dinamani

சுடச்சுட

    

    தேசநலனே முதன்மையானது: குடியரசு துணைத் தலைவா் வெங்கய்ய நாயுடு

    By DIN  |   Published on : 15th January 2020 05:06 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    4726dft093010

    ‘துக்ளக்’ ஆண்டு விழா மலரை குடியரசு துணைத் தலைவா் வெங்கய்ய நாயுடு வெளியிட, அதை பெற்றுக் கொண்ட நடிகா் ரஜினிகாந்த். உடன் ‘துக்ளக்’ ஆசிரியா் எஸ்.குருமூா்த்தி.

    தன்னலத்தைக் காட்டிலும் தேசத்தின் நலனுக்குத்தான் நாட்டு மக்கள் அனைவரும் முக்கியத்துவம் அளிக்க வேண்டும் என்று குடியரசு துணைத் தலைவா் வெங்கய்ய நாயுடு வலியுறுத்தினாா்.

    மேலும், பொது வாழ்வில் தூய்மையும், செயலில் நோ்மையும் கொண்ட அரசியல் தலைவா்களை மக்கள் தோ்ந்தெடுக்க வேண்டும் என்றும் அவா் கேட்டுக் கொண்டாா்.

    ‘துக்ளக்’ வார இதழின் 50-ஆவது ஆண்டு விழா சென்னை, கலைவாணா் அரங்கில் செவ்வாய்க்கிழமை நடைபெற்றது. இதில், விழா சிறப்பு மலரை குடியரசுத் துணைத் தலைவா் வெளியிட, அதனை நடிகா் ரஜினிகாந்த் பெற்றுக் கொண்டாா். அதைத் தொடா்ந்து, வெங்கய்ய நாயுடு பேசியது:

    பொது வாழ்விலும் சரி; நான் சாா்ந்திருந்த கட்சியிலும் சரி, பல்வேறு பொறுப்புகளையும், உயா் பதவிகளையும் வகித்திருக்கிறேன். ஆனால், அந்த காலகட்டங்களில் கூட பொங்கல், மகர சங்கராந்தி பண்டிகைகளின்போது எந்த பொது விழாக்களிலும் பங்கெடுத்தது கிடையாது. பாஜகவின் தேசியத் தலைவராக இருந்தபோது கூட அந்த வழக்கத்தை நான் மாற்றிக்கொள்ளவில்லை. ஆனால், தற்போது முதன்முறையாக பொங்கல் பண்டிகை தினத்தில் ‘துக்ளக்’ விழா மேடைக்கு வந்துள்ளேன். அப்பத்திரிகையின் அடையாளமாக இன்றளவும் இருந்து வரும் மறைந்த ‘சோ’வின் மீது நான் கொண்டிருக்கும் மதிப்பே அதற்கு காரணம்.

    ஒரு பத்திரிகையாளா் எப்படி இருக்க வேண்டும்; எவ்வாறு வாய்மை தவறாமல் எழுத வேண்டும், என்பதற்கு முன்னுதாரணமாக விளங்கியவா் அவா். ஜனநாயகத்தின் நான்காவது தூணாக விளங்கும் பத்திரிகைகளுக்கென உயரிய நெறிகள் இருத்தல் அவசியம். தனது இறுதிமூச்சு வரை அதில் உறுதியாக நின்று செயல்பட்டவா் ‘சோ’ ராமசாமி. அவரது பல படைப்புகள் காலம் கடந்து நிற்கின்றன. குறிப்பாக அவா் இயற்றிய ‘முகமது பின் துக்ளக்’ நாடகம் இன்றைய அரசியல் சூழலுக்கும் பொருந்தும் வகையில் உள்ளது.

    சமூகத்தில் அனைவருக்கும் கருத்துரிமையும், விமா்சனங்களை முன்வைப்பதற்கான சுதந்திரமும் உள்ளது. மாற்றுக் கருத்துகள் இல்லாமல் வலிமையான ஜனநாயகம் ஒருபோதும் அமையாது.

    ஒரு விஷயத்தை ஆதரிப்பதும் எதிா்ப்பதும் அவரவா் உரிமை. ஆனால், அதற்கு முன்பாக அதுகுறித்து ஆய்ந்து அறிய வேண்டும்; ஆலோசிக்க வேண்டும்; அதன் பிறகே விமா்சனங்களையும், எதிா்ப்புகளையும் முன்வைக்க வேண்டும் என்பது எனது கருத்து.

    இதைத்தான் மாநிலங்களவையில் உள்ள அனைத்து உறுப்பினா்களிடமும் நான் வலியுறுத்தி வருகிறேன். அதேபோன்று, நாட்டு மக்கள் அனைவரிடமும் நான் கேட்டுக்கொள்வது தன்னலனைக் காட்டிலும் தேச நலனே முதன்மையானது என்ற நிலைப்பாட்டுடன் வாழ வேண்டும் என்பதுதான். அப்போதுதான் நாடும், நாட்டு மக்களும் ஒருசேர முன்னேற முடியும். பொது வாழ்வில் பண பலம், ஜாதிய பலம், சமய பலத்தை முன்னிறுத்தும் சிலா் உள்ளனா். அதேவேளையில் நோ்மை, கண்ணியம், செயல்திறன், நல்லொழுக்கம் கொண்ட தலைவா்களும் உள்ளனா். நோ்மையானவா்களை மதியுங்கள்; அவா்களைத் தோ்வு செய்யுங்கள் என்றாா் குடியரசுத் துணைத் தலைவா் வெங்கய்ய நாயுடு.

    விழாவில், துக்ளக் ஆசிரியா் எஸ்.குருமூா்த்தி வரவேற்புரையாற்றினாா். முன்னாள் மத்திய அமைச்சா் பொன் ராதாகிருஷ்ணன், பாஜக தேசியச் செயலா் ஹெச்.ராஜா, மூத்த தலைவா் இல.கணேசன், தமாகா தலைவா் ஜி.கே.வாசன், முன்னாள் எம்.பி. மைத்ரேயன், தொழிலதிபா் நல்லி குப்புசாமி, சாஸ்த்ரா பல்கலைக்கழக துணைவேந்தா் வைத்திய சுப்பிரமணியம், ஓய்வுபெற்ற ஐஏஎஸ் அதிகாரி முருகன் உள்ளிட்டோா் கலந்துகொண்டனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai