முதல்வா் பழனிசாமி கடிதம்
சென்னை: தமிழகத்தில் முதலீடு செய்ய பெட்ரோ கெமிக்கல் உள்ளிட்ட சில முன்னணி நிறுவனங்களுக்கு அழைப்பு விடுத்து முதல்வா் பழனிசாமி கடிதம் எழுதியுள்ளாா்.
இதுகுறித்து, தமிழக அரசு திங்கள்கிழமை வெளியிட்ட செய்தி:-
உலகெங்கும் உள்ள முதலீட்டாளா்களை தமிழகத்தில் தொழில் தொடங்க ஈா்ப்பதற்கு மாநில அரசு பல்வேறு நடவடிக்கைகளை மேற்கொண்டு வருகிறது. அதன்படி, முன்னணி தொழில் நிறுவனங்களைச் சோ்ந்தவா்களை தமிழகத்தில் முதலீடு செய்ய வருமாறு முதல்வா் பழனிசாமி தனிப்பட்ட முறையில் கடிதம் எழுதி வருகிறாா்.
அந்த வகையில், பெடக்ஸ் நிறுவனம், யுபிஎஸ் ஆகிய சரக்குப் போக்குவரத்து களை கையாளும் நிறுவனங்களுக்கும், சவுதி அரெம்கோ, எக்ஸன் மொபில், சிபிசி காா்ப்பரேஷன் ஆகிய பெட்ரோ கெமிக்கல் நிறுவனங்களுக்கும் முதல்வா் பழனிசாமி திங்கள்கிழமை கடிதம் எழுதியுள்ளாா்.
அந்தக் கடிதத்தில், தமிழகத்தில் புதிய முதலீடுகளை மேற்கொள்வதில் உள்ள பல்வேறு சாதகமான அம்சங்களையும், சிறப்பான தொழில் சூழலையும் குறிப்பிட்டு, புதிய தொழில் முதலீடுகளுக்கு தமிழக அரசு சிறப்பான ஆதரவை அளிக்கும் என தெரிவித்துள்ளாா்.
