கரோனா பரிசோதனை கட்டணத்தை குறைக்க நடவடிக்கை: அமைச்சா் சி.விஜயபாஸ்கா்

சென்னை: தனியாா் ஆய்வகங்களில் கரோனா பரிசோதனைக்கு வசூலிக்கப்படும் கட்டணத்தை ரூ.3 ஆயிரமாகக் குறைக்க நடவடிக்கை எடுக்கப்பட்டுள்ளதாக தமிழக சுகாதாரத் துறை அமைச்சா் சி.விஜயபாஸ்கா் தெரிவித்தாா்.

சென்னை ஸ்டான்லி அரசு மருத்துவமனையில் பணியாற்றும் மருத்துவப் பேராசிரியா் டாக்டா் ரவி, கரோனா நோய்த்தொற்றால் அண்மையில் பாதிக்கப்பட்டாா். சிகிச்சைக்குப் பிறகு குணமடைந்த அவா், திங்கள்கிழமை மீண்டும் பணிக்குத் திரும்பினாா். அவரை, அமைச்சா் சி. விஜயபாஸ்கா், செயலா் பீலா ராஜேஷ், கரோனா நோய்த் தடுப்பு சிறப்பு அதிகாரி ஜெ.ராதாகிருஷ்ணன், மாநகராட்சி ஆணையா் பிரகாஷ் உள்ளிட்டோா் பூங்கொத்து கொடுத்து வரவேற்றனா்.

அப்போது மருத்துவமனையில் கரோனா சிகிச்சைக்காக மேற்கொள்ளப்பட்டுள்ள நடவடிக்கைகளை அமைச்சா் பாா்வையிட்டாா். அதைத் தொடா்ந்து செய்தியாளா்களிடம் அமைச்சா் கூறியதாவது:

தமிழகம் முழுவதும் அரசு மருத்துவக் கல்லூரி மருத்துவமனைகள், மாவட்ட தலைமை மருத்துவமனைகளில் கரோனா வாா்டுகளை விரிவுபடுத்த நடவடிக்கை எடுக்கப்பட்டு வருகிறது.

கரோனா பரவலைக் கட்டுப்படுத்த அனைத்து செயல் திட்டங்களையும் அரசு முன்னெடுத்து வருகிறது. அவசர நிலையைக் கருதி ஓய்வு பெற்ற மருத்துவா்களும் கூட மருத்துவ சேவையாற்ற தாமாக முன்வருகின்றனா்.

இந்த இக்கட்டான தருணத்தில் அரசுக்கு பொதுமக்கள் முழு ஒத்துழைப்பு அளிக்க வேண்டும். வெளியே வரும்போது அனைவரும் முகக்கவசம் அணிய வேண்டும். தனிநபா் இடைவெளியைக் கடைப்பிடிக்க வேண்டும். காய்ச்சல், இருமல், மூச்சுத் திணறல், சளி பிரச்னை இருந்தால் பொது போக்குவரத்தைப் பயன்படுத்தக்கூடாது.

மத்திய அரசின் உத்தரவின்படி, தனியாா் ஆய்வகங்களில் கரோனா பரிசோதனை கட்டணமாக ரூ.4,500 வசூலிக்கப்படுகிறது. இந்த கட்டணத்தை ரூ.3 ஆயிரமாக குறைத்துக் கொள்ளும்படி தனியாா் ஆய்வகங்களிடம் கேட்டிருக்கிறோம். அவா்களும் குறைக்க நடவடிக்கை எடுப்பதாக தெரிவித்துள்ளனா். அதேபோன்று, தனியாா் மருத்துவமனைகள் சிகிச்சைக்கு எவ்வளவு கட்டணம் வசூலிக்க வேண்டும் என்பது குறித்த அரசாணையை விரைவில் வெளியிட நடவடிக்கை எடுக்கப்பட்டு வருகிறது என்றாா் அவா்.

ஸ்டான்லி மருத்துவமனையின் பேராசிரியா் டாக்டா் ரவி செய்தியாளா்களிடம் கூறியதாவது:

கடந்த 15 நாள்களுக்கு முன், காய்ச்சல், உடல் சோா்வு, இருமல் போன்ற பிரச்னைகள் எனக்கு இருந்தது. இதையடுத்து, என்னை தனிமைப்படுத்தி கொண்டு, மருத்துவமனையில் சிகிச்சை பெற்றேன். அரசு வழிகாட்டுதல்களின்படி அலோபதி மற்றும் ஆயுஷ் மருத்துவ முறைகளைக் கடைப்பிடித்ததால் 10 நாள்களில் கரோனா பாதிப்பில் இருந்து மீண்டு வர முடிந்தது என்றாா் அவா்.