சென்னை: வெப்பச்சலனம் மற்றும் வளிமண்டல மேலடுக்கு சுழற்சி காரணமாக, வட தமிழக கடலோர மாவட்டங்களில் ஓரிரு இடங்களில் செவ்வாய்க்கிழமை (ஜூன் 30) மிதமான மழை பெய்யக்கூடும் என்று வானிலை ஆய்வு மையம் தெரிவித்துள்ளது.
இது குறித்து சென்னை வானிலை ஆய்வு மைய அதிகாரி திங்கள்கிழமை கூறியது:
வெப்பச்சலனம் மற்றும் வளிமண்டல மேலடுக்கு சுழற்சி ஆகியவை காரணமாக, வட தமிழக கடலோர மாவட்டங்கள், கோவை, நீலகிரி, ஈரோடு, தருமபுரி, கிருஷ்ணகிரி, சேலம், வேலூர் ஆகிய மாவட்டங்களில் ஓரிரு இடங்களில் செவ்வாய்க்கிழமை (ஜூன் 30) லேசானது முதல் மிதமானது வரை மழை பெய்யக்கூடும். சென்னையில் வானம் பொதுவாக மேகமூட்டமாக இருக்கும். நகரின் சில பகுதிகளில் லேசானது முதல் மிதமானது வரை மழை பெய்யக்கூடும்.
மழை அளவு: தமிழகத்தில் திங்கள்கிழமை காலை 8.30 மணி நிலவரப்படி வரையிலான கடந்த 24 மணி நேரத்தில் பெரம்பலூர் மாவட்டம் அகரம் சீகூர், விழுப்புரம் மாவட்டம் வல்லத்தில் தலா 120 மி.மீ., விழுப்புரம் மாவட்டம் செஞ்சியில் 110 மி.மீ., சேலம் மாவட்டம் வீரகனூர், வேலூர் மாவட்டம் பெண்ணை அணை, திருவண்ணாமலை மாவட்டம் ஆரணி, கடலூர் மாவட்டம் கீழச்சேருவையில் தலா 70 மி.மீ., ராணிப்பேட்டை மாவட்டம் சோளிங்கரில் 60 மி.மீ. மழை பதிவாகியுள்ளது அவர்.
மீனவர்களுக்கு எச்சரிக்கை: மத்திய கிழக்கு, வடகிழக்கு வங்கக்கடல் மற்றும் மத்திய வங்கக்கடல் பகுதியில் மணிக்கு 40 கி.மீ. முதல் 50 கி.மீ. வேகத்தில் பலத்த காற்று வீசும் என்பதால், இந்தப் பகுதிகளுக்கு மீனவர்கள் ஜூலை 4}ஆம் தேதி வரை செல்ல வேண்டாம் என்று அறிவுறுத்தப்பட்டுள்ளது. இதுதவிர, தென் மேற்கு மற்றும் மத்திய மேற்கு அரபிக்கடல் பகுதிகளில் மணிக்கு 50 கி.மீ. முதல் 60 கி.மீ. வேகத்தில் சூறாவளி காற்று வீசும். எனவே, இந்தப் பகுதிகளுக்கு மீனவர்கள் ஜூலை 3}ஆம் தேதி வரை செல்ல வேண்டாம் என்று அறிவுறுத்தப்பட்டுள்ளது.