Enable Javscript for better performance
தமிழக சிறைகளில் இருந்து 1,184 கைதிகள் பிணையில் விடுவிப்பு- Dinamani

சுடச்சுட

    

    தமிழக சிறைகளில் இருந்து 1,184 கைதிகள் பிணையில் விடுவிப்பு

    By DIN  |   Published on : 25th March 2020 03:42 AM  |   அ+அ அ-   |    |  

    jail

     

    கரோனா தொற்று பரவலை தடுக்கும் விதமாக தமிழக சிறைகளில் இருந்து 1,184 கைதிகள் பிணையில் விடுவிக்கப்பட்டனா்.

    தமிழக சிறைத்துறையின் கீழ் 9 மத்திய சிறைகள், 9 மாவட்ட சிறைகள், 95 துணை சிறைகள், 3 பெண்கள் சிறப்பு சிறைகள் உள்ளன. இந்த சிறைகளில் 22 ஆயிரம் கைதிகளை அடைப்பதற்குரிய கட்டமைப்புகள் உள்ளன. ஆனால், இப்போது இந்த சிறைகளில், சுமாா் 15 ஆயிரம் கைதிகள் அடைக்கப்பட்டுள்ளனா். சிறைகளில் உள்ளவா்களில் சுமாா் 70 சதவீதம் போ் விசாரணைக் கைதிகளே ஆவாா்கள். எஞ்சிய 30 சதவீதம் போ் தண்டனை கைதிகள் ஆவாா்கள்.

    கரோனா வைரஸ் பாதிப்பு சிறைகளில் ஏற்படாமல் இருப்பதற்கு சிறைத்துறை பல்வேறு முன்னெச்சரிக்கை நடவடிக்கைகளை எடுத்து வருகிறது. ஏனெனில் கரோனா தொற்றால் அதிகம் பாதிக்கப்பட்டிருக்கும் நாடுகளில் பாதுகாப்பு கருதி, சிறைகளில் இருந்து கைதிகள் விடுதலை செய்யப்பட்டு வருகின்றனா். முக்கியமாக ஈரான் நாட்டில் சிறைகளில் இருந்து 4 ஆயிரம் கைதிகள் தற்காலிகமாக விடுவிக்கப்பட்டனா். இதேபோல ஸ்பெயின், இத்தாலி ஆகிய நாடுகளிலும் கைதிகள் விடுவிக்கப்பட்டனா்.

    இதைத் தொடா்ந்து தமிழக சிறைத்துறை இரு வாரங்களுக்கு முன்பே கரோனா முன்னெச்சரிக்கை நடவடிக்கைகளை முடுக்கிவிட்டது. இதன் ஒரு பகுதியாக தமிழக சிறைத்துறை ஏடிஜிபி சுனில்குமாா் சிங் கடந்த வாரம் ஒரு உத்தரவு பிறப்பித்தாா்.

    அந்த உத்தரவில் முக்கியமாக, பாா்வையாளா்கள் கைதிகளை சந்திக்க இரு வாரங்கள் தடை விதிக்கப்பட்டது, வழக்குரைஞா்கள் மட்டும் சந்திக்க அனுமதிக்கப்பட்டனா், வழக்குரைஞா்கள் கைதிகளை சந்திக்க பல்வேறு கட்டுப்பாடுகள் விதிக்கப்பட்டன, கரோனா அறிகுறியுடன் இருக்கும் கைதிகளை தனிமைப்படுத்த வேண்டும் என குறிப்பிடப்பட்டிருந்தது.

    கைதிகளை குறைக்கத் திட்டம்: இதற்கிடையே சிறையில் கரோனா தொற்று பரவாமல்,கைதிகள் நெரிசலை கட்டுப்படுத்தும் வகையில் கைதிகளை எண்ணிக்கை குறைக்க திட்டமிடப்பட்டது. அதில், முதல் கட்டமாக சிறு குற்றங்களில் ஈடுபட்டு பிணை கிடைக்காமலும், பிணை கிடைப்பதில் தாமதம் ஏற்பட்டும், பிணை வழங்குவதற்கு அரசு மற்றும் பாதிக்கப்பட்டவா்கள் எதிா்ப்பு தெரிவித்த நிலையில் சிறைகளில் அடைக்கப்பட்டிருக்கும் கைதிகளை நீதிமன்றம் மூலம் பிணையில் விடுவிப்பது என முடிவு செய்யப்பட்டது. இது தொடா்பாக உச்சநீதிமன்றம், உயா்நீதிமன்றம் ஆகியவற்றில் தொடரப்பட்ட வழக்குகளிலும் கைதிகளை விடுவிப்பதற்கு அனுமதி கிடைத்தது.

    இதையடுத்து, கொலை வழக்கு, கொலை முயற்சி வழக்கு, தமிழ்நாடு தடுப்புச் காவல் சட்டம், பாலியல் வழக்குகள், பெண்களுக்கு எதிரான குற்ற வழக்குகள், குழந்தைகளுக்கு எதிரான பாலியல் வன்கொடுமை வழக்குகள் ஆகியவற்றில் கைது செய்யப்பட்டவா்களை பிணையில் விடுவிக்கக் கூடாது என காவல்துறையினரும், சிறைத்துறையினரும் முடிவு செய்தனா். மேலும், அதேபோல ரெளடிகள், திருட்டு, வழிப்பறி உள்ளிட்ட வழக்குகளில் தொடா்புடையவா்களையும் பிணையில் விடுவிக்கக் கூடாது முடிவு செய்யப்பட்டது.

    அதேவேளையில், அடிதடி, கலாட்டா, சிறு காயங்களை ஏற்படுத்துதல், சந்தேக வழக்குகள், சிறு மோசடிகளில் ஈடுபடுதல், சிறிய அளவில் மது, கஞ்சா விற்ாக கைது செய்யப்பட்டவா்கள் ஆகியோரை விடுவிப்பது என காவல்துறையினரும், சிறைத்துறையினா் முடிவு செய்தனா். இதற்காக சிறைகளில் இருக்கும் விசாரணை கைதிகளையும், அவா்களது குற்ற வழக்குகளையும் ஆய்வு செய்து, தகுதியானவா்களை கண்டறியும் பணி சில நாள்களாக நடைபெற்று வந்தது.

    1,184 கைதிகள் விடுவிடுப்பு: இதில் சில நாள்களுக்கு முன்பு நீதிமன்றத்தின் மூலம் பிணை பெற்று மதுரை மத்திய சிறையில் இருந்து 2 பெண்கள் உட்பட 53 விசாரணைக் கைதிகளையும், சிவகங்கை, தேனி, அருப்புக்கோட்டை, திருப்பத்தூா் கிளைச் சிறைகளிலிருந்து 28 கைதிகள் என மொத்தம் 81 போ் விடுவிக்கப்பட்டனா். அடுத்தக் கட்டமாக கடந்த இரு நாள்களாக மாநிலம் முழுவதும் உள்ள மத்திய சிறைகள், மாவட்ட சிறைகள், கிளைச் சிறைகள் ஆகியவற்றில் அடைக்கப்பட்டிருக்கும் விசாரணைக் கைதிகள் படிப்படியாக நீதிமன்றத்தின் மூலம் பிணை பெறப்பட்டு விடுவிக்கப்பட்டு வருகின்றனா்.

    புழல் சிறை வளாகத்தில் உள்ள பெண்கள் சிறப்பு சிறையில் இருந்து 36 மகளிரும், விசாரணை சிறையில் இருந்து 226 போ், பாளையங்கோட்டை மத்திய சிறையில் இருந்து 62 போ், வேலூா் மத்திய சிறையிலிருந்து நூற்றுக்கும் மேற்பட்டோா் உள்பட மொத்தம் 1,184 கைதிகள் விடுவிக்கப்பட்டதாக சிறைத்துறையினா் தெரிவித்தனா்.

    4 ஆயிரம் கைதிகளுக்கு வாய்ப்பு: இது தொடா்பாக சிறைத்துறையைச் சோ்ந்த உயா் அதிகாரி கூறியது:

    கடந்த இரு நாள்களில் தமிழக சிறைகளில் இருந்து 1,184 கைதிகள் பிணைப் பெறப்பட்டு விடுவிக்கப்பட்டுள்ளனா். சிறு குற்றங்களில் ஈடுபட்டதாக, கைது செய்யப்பட்டு தமிழக சிறைகளில் அடைக்கப்பட்டிருக்கும் கைதிகள் இன்னும் 4 ஆயிரம் போ் உள்ளனா். அவா்களையும் விடுவிப்பது தொடா்பாக ஆலோசிக்கப்பட்டு வருகிறது. சூழ்நிலையைப்பொருத்து, இந்த கைதிகள் விடுவிக்கப்படுவாா்கள். பிணையில் விடுவிக்கப்படும் கைதிகள், ஏதேனும் சட்டவிரோத, சமூக விரோதச் செயலில் ஈடுபட்டால், அவா்களது பிணை ரத்து செய்யப்பட்டு, காவல்துறையினரால் மீண்டும் கைது செய்யப்பட்டு, சிறையில் அடைக்கப்படுவாா்கள் என்றாா் அவா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai