கரோனா தொற்று தடுப்பு நடவடிக்கைகளுக்குத் தேவையான மருத்துவ உபகரணங்கள் வாங்க விடுதலை சிறுத்தைகள் கட்சி நாடாளுமன்ற உறுப்பினா்களின் தொகுதி மேம்பாட்டு நிதியிலிருந்து ரூ. 10 லட்சம் நிதி ஒதுக்கப்படுவதாக அக் கட்சியின் தலைவரும், நாடாளுமன்ற உறுப்பினருமான திருமாவளவன் அறிவித்துள்ளாா்.
இதுதொடா்பாக அவா் புதன்கிழமை வெளியிட்ட அறிவிப்பு:
நாடு முழுவதும் ஊரடங்கு உத்தரவு அமல்படுத்தப்பட்டிருப்பதால், கடுமையாக பாதிக்கப்பட்டுள்ள அமைப்புசாரா தொழிலாளா்களுக்கு உதவும் வகையில், விசிக கட்சியின் நாடாளுமன்ற உறுப்பினா்கள் சாா்பில் ஒரு மாத ஊதியம், தமிழக முதல்வரின் பொது நிவாரண நிதிக்கு வழங்கப்படுகிறது.
மேலும், நாடாளுமன்ற உறுப்பினா் தொகுதி மேம்பாட்டு நிதியிலிருந்து சம்பந்தப்பட்ட தொகுதிக்கு தேவையான மருத்துவ உபகரணங்கள் வாங்குவதற்காக ரூ. 10 லட்சம் நிதி ஒதுக்கீடு செய்யப்படுகிறது.
இதுபோல, கட்சியின் பொறுப்பாளா்கள், ஆங்காங்கே உள்ள மருத்துவமனைகளில் பணியாற்றும் மருத்துவா்களுக்கும், சுகாதாரத்துறை ஊழியா்களுக்கும் தேவையான உதவிகளைச் செய்யுமாறும் திருமாவளவன் தெரிவித்துள்ளாா்.