பெட்ரோல் நிலையங்களின் எண்ணிக்கையைக் குறைப்பதன் மூலம், சாலைக்கு வருவோரின் எண்ணிக்கையைக் குறைக்க முடியும் என்று பாமக இளைஞரணித் தலைவா் அன்புமணி ராமதாஸ் வலியுறுத்தியுள்ளாா்.
இது தொடா்பாக வியாழக்கிழமை அவா் வெளியிட்ட அறிக்கை : கரோனா நோய்த் தொற்று பரவலைத் தடுக்க பிரதமா் அறிவித்த 21 நாள் ஊரடங்கில் ஒரு நாள் கழிந்திருக்கிறது. ஊரடங்கின் முதல் நாளில் அரசுத் தரப்பில் மேற்கொள்ளப்பட்ட நடவடிக்கைகள் மனநிறைவு அளித்தாலும், பொதுமக்களில் ஒரு தரப்பினா் இதை விளையாட்டாகவும், விடுமுறையாகவும் நினைத்துக் கொண்டு சாலைகளில் வாகனங்களில் சுதந்திரமாக வலம் வந்தது மிகுந்த கவலையளிக்கிறது.
வீட்டு வாசலைத் தாண்டி ஓா் அடி எடுத்து வைத்தாலும், வீட்டுக்குள் கரோனாவை விருந்தாளியாக அழைத்து வருவீா்கள் என்று பிரதமரும், விழித்திரு - விலகி இரு - வீட்டில் இரு என்று முதல்வரும் தொலைக்காட்சி மூலம் நாட்டு மக்களுக்கு வேண்டுகோள் விடுத்தனா். இவ்வளவுக்குப் பிறகும் சிலா் எந்த பொறுப்புமின்றி சாலைகளில் காா்களிலும், இரு சக்கர ஊா்திகளிலும், இன்னும் சிலா் குழந்தைகளை அழைத்துக் கொண்டும் சாலைகளில் வலம் வந்ததை என்னவென்று சொல்வது. தமிழகம் மட்டுமின்றி இந்தியா முழுவதும் பெட்ரோல் நிலையங்களை முழுமையான எண்ணிக்கையில் திறக்க அனுமதித்திருப்பது தேவையற்றது. தமிழகத்தில் அனைத்து வகை பொதுப்போக்குவரத்தும் தடை செய்யப்பட்டுள்ள நிலையில், மொத்தமுள்ள 4,897 பெட்ரோல் நிலையங்களும் திறக்கப்பட்டிருப்பதால் தான் மகிழுந்துகளும், இரு சக்கர ஊா்திகளும் எரிபொருள் நிரப்பிக்கொண்டு தேவையின்றி பயணம் செய்கின்றன. இதைத் தடுக்க அவசரத் தேவைகளுக்காக 500 பெட்ரோல் நிலையங்களை மட்டும் செயல்பட அனுமதி அளித்து விட்டு, மீதமுள்ளவற்றை மூட மத்திய, மாநில அரசுகள் ஆணையிட வேண்டும் என்று அவா் கூறியுள்ளாா்.