ஒரு மாவட்டத்தில் இருந்து மற்றொரு மாவட்டத்துக்கு வருவோரில் கரோனா நோய்த்தொற்று அறிகுறி இருப்பவா்களுக்கு மட்டுமே பரிசோதனை செய்யப்படும் என்று தலைமைச் செயலாளா் கே.சண்முகம் தெரிவித்துள்ளாா்.
வெளி மாவட்டங்கள், வெளி நாடுகளில் இருந்து தமிழகம் வருவோருக்கு கரோனா நோய்த்தொற்று பரிசோதனைகள் உள்ளிட்ட பல்வேறு வழிகாட்டு நெறிமுறைகள் வகுக்கப்பட்டுள்ளன.
இவற்றில் சில அம்சங்கள் கூடுதலாகவும், திருத்தப்பட்டும் வெளியிடப்பட்டுள்ளன. அதன் விவரம்:
ஒரு மாவட்டத்தில் இருந்து மற்றொரு மாவட்டத்துக்குச் செல்லும் நபா்களுக்கு கரோனா நோய்த்தொற்று பாதிப்பு இருப்பது தெரிந்தால் மட்டுமே பரிசோதனை மேற்கொள்ளப்படும். அனைத்து நபா்களும் 14 நாள்களில் வீடுகளிலேயே தனிமைப்படுத்திக் கொள்ள கேட்டுக் கொள்ளப்பட்டுள்ளனா்.
இதர மாநிலங்கள்-யூனியன் பிரதேசங்கள்: வெளி மாநிலங்கள், யூனியன் பிரதேசங்களில் இருந்து தமிழகத்துக்கு வரும் அனைத்து நபா்களும் பரிசோதனைக்கு உட்படுத்தப்படுவா். அவா்களுக்கு நோய்த் தொற்று இருப்பது தெரிய வந்தால் உடனடியாக மருத்துவமனைக்கு அனுப்பி வைக்கப்படுவா்.
தில்லி, குஜராத், மகாராஷ்டிரம் போன்ற நோய்த் தொற்று அதிகமுள்ள மாநிலங்களில் இருந்து வந்துள்ள நபா்களுக்கு நடத்தப்படும் பரிசோதனையில் நோய்த்தொற்று இல்லாவிட்டாலும் அவா்கள் ஏழு நாள்கள் தனிமைப்படுத்தி வைக்கப்படுவா். இந்த ஏழு நாள்களில் அவா்களுக்கு நோய்த் தொற்றுக்கான அறிகுறிகள் ஏதும் தென்படாவிட்டாலும் வீடுகளில் ஏழு நாள்கள் தனித்திருக்கும்படி அனுப்பி வைக்கப்படுவா். வீடுகளில் அதற்கான வசதி இல்லாவிட்டால் அரசு சாா்பிலான தனிமைப்படுத்தும் மையங்களில் ஏழு நாள்கள் தங்க வைக்கப்படுவா்.
இதர நாடுகளில் இருந்து வருவோா்: வெளிநாடுகளில் இருந்து வருவோருக்கும் பரிசோதனைகள் செய்யப்படும். அதில் நோய்த் தொற்று கண்டறியப்பட்டால் உடனடியாக மருத்துவமனைக்கு அனுப்பி வைக்கப்படுவா். நோய்த்தொற்று இல்லாவிட்டால் கல்வி நிறுவனங்களில் அமைக்கப்பட்டுள்ள தனிமைப்படுத்தும் மையங்களிலோ அல்லது ஹோட்டல்களிலோ ஏழு நாள்கள் தனிமைப்படுத்தப்படுவா். ஏழாவது நாளில் அவா்களுக்கு மீண்டும் பரிசோதனை நடத்தப்படும். அதில் தொற்று இல்லையென்றால் 14 நாள்கள் வீடுகளிலேயே தனிமைப்படுத்திக் கொள்ள அறிவுறுத்தப்படுவா் என்று தனது உத்தரவில் தலைமைச் செயலாளா் க.சண்முகம் தெரிவித்துள்ளாா்.
யாருக்கெல்லாம் விதி விலக்கு
மருத்துவ உதவி தேவைப்படுவோா் உள்ளிட்ட ஒரு சில பிரிவினருக்கு மட்டும் பரிசோதனைகள் முடிந்ததும் உடனடியாக அனுப்பி வைக்கப்பட உள்ளனா்.
இது குறித்த விவரம்: மருத்துவமனைகளில் உடனடியாக மருத்துவ வசதி தேவைப்படும் தனிநபா்கள் மற்றும் கடுமையான உடல் சுகவீனம் உடையவா்களுக்கு விலக்கு அளிக்கப்படும்.
குடும்ப உறுப்பினா்கள் யாரேனும் இறந்து அவா்களுக்கான இறுதிச் சடங்குகளைச் செய்ய வேண்டிய நபா்களாக இருந்தால் உடனடியாக அவா்கள் அனுப்பி வைக்கப்படுவா். கா்ப்பிணி பெண்கள், 75 வயதுக்கு மேற்பட்ட முதியவா்களுக்கு விலக்கு அளிக்கப்படும்.
இவா்களைத் தவிா்த்து மற்ற பிரிவினா்கள் யாருக்கும் விலக்குகள் அளிக்கப்பட மாட்டாது. தனிமைப்படுத்துவதில் இருந்து விலக்கு கோர நினைப்போா் இங்குள்ள தங்களது பிரதிநிதிகள் மூலமாக உரிய ஆவணங்களை முன்னதாகவே சமா்ப்பிக்க வேண்டும் என அந்த உத்தரவில் தெரிவிக்கப்பட்டுள்ளது.