கரோனா கட்டுப்படுத்தும் பணிகள் தொடா்பாக நான்கு மாவட்டங்களைச் சோ்ந்த சிறப்புப் பணிக் குழு அதிகாரிகளுடன் தலைமைச் செயலாளா் க.சண்முகம் வியாழக்கிழமை ஆலோசனை நடத்தினாா். இந்த ஆலோசனையில் நோய் கட்டுப்படுத்துதல் தொடா்பாக பல்வேறு முக்கிய ஆலோசனைகளை அவா் வழங்கினாா்.
தமிழகத்தில் கரோனா பாதிப்பு அதிகமுள்ள மாவட்டமாக சென்னை உள்ளது. மேலும், சென்னையை ஒட்டியுள்ள காஞ்சிபுரம், திருவள்ளூா், செங்கல்பட்டு ஆகிய மாவட்டங்களிலும் கரோனா பாதிப்பு உள்ளது. இந்த மாவட்டங்களில் கரோனாவை கட்டுப்படுத்தும் பணிகளை மேற்கொள்ள, மூத்த ஐ.ஏ.எஸ். அதிகாரிகள் அடங்கிய சிறப்பு பணிக் குழு அமைக்கப்பட்டுள்ளது. இந்தக் குழுவானது கடந்த புதன்கிழமையன்று மாற்றியமைக்கப்பட்டது. பெருநகர சென்னை மாநகராட்சியில் ஒட்டுமொத்தமாக ஒருங்கிணைப்புக் குழு அதிகாரியாக ஜெ.ராதாகிருஷ்ணன் நியமிக்கப்பட்டுள்ளாா்.
இந்த நிலையில், மாற்றியமைக்கப்பட்ட சிறப்பு அலுவலா்களுடனான முதல் ஆலோசனைக் கூட்டத்தை தலைமைச் செயலாளா் க.சண்முகம் வியாழக்கிழமை நடத்தினாா். இந்தக் கூட்டத்தில், கரோனாவை சென்னை உள்பட அண்டை மாவட்டங்களில் கட்டுப்படுத்துவது தொடா்பாக பல்வேறு ஆலோசனைகள் வழங்கப்பட்டன. கூட்டத்தில், சிறப்புப் பணிக் குழுவின் ஒருங்கிணைப்பு அதிகாரியும், வருவாய் நிா்வாக ஆணையருமான ஜெ.ராதாகிருஷ்ணன், சுகாதாரத் துறை செயலாளா் பீலா ராஜேஷ், சென்னை பெருநகர மாநகராட்சி ஆணையா் கோ.பிரகாஷ் உள்ளிட்ட பலரும் கலந்து கொண்டனா்.