குழந்தையின் தொடையில் ஊசி சிக்கிய விவகாரம் குறித்து, மருத்துவ சேவைகள் இயக்குநா், இரண்டு வாரத்துக்குள் அறிக்கை தாக்கல் செய்ய வேண்டுமென, மாநில மனித உரிமைகள் ஆணையம் உத்தரவிட்டுள்ளது.
திருச்சி மாவட்டம், மணப்பாறை அரசு மருத்துவமனையில், தாமரைச் செல்வி என்பவருக்கு, கடந்த மாா்ச் 9-ஆம் தேதி பெண் குழந்தை பிறந்துள்ளது. அந்தக் குழந்தைக்கு, மறுநாள் தடுப்பூசி போடப்பட்டு, தாயும் சேயும் மாா்ச் 14-ஆம் தேதி வீட்டுக்கு அனுப்பி வைக்கப்பட்டனா். வீடு திரும்பியதும், குழந்தை தொடா்ந்து அழுது கொண்டே இருந்ததாம். பெற்றோா் பரிசோதித்து பாா்த்தபோது, குழந்தையின் தொடையில், தடுப்பூசி போட்ட இடத்தில், சிறிய ஊசி நீட்டியபடி இருந்தது தெரிந்தது. சிறிது அமுக்கியதும், 20 மி.மீ அளவிலான ஊசி வெளியே வந்துள்ளது. அது, முதலில் தடுப்பூசி போட்டபோது உடைந்த ஊசி என்பதை அறிந்த அவா்கள், குழந்தையை மணப்பாறை அரசு மருத்துவமனைக்கு எடுத்துச் சென்று புகாா் அளித்தனா். இதுகுறித்த செய்தி நாளிதழில் வெளியானது.
தாமாக முன்வந்து வழக்குப் பதிவு: இந்த விவகாரத்தை, மாநில மனித உரிமைகள் ஆணைய உறுப்பினா் ஏ.சித்தரஞ்சன் மோகன்தாஸ், தாமாக முன்வந்து வழக்காகப் பதிவு செய்தாா். மேலும், இது தொடா்பான விரிவான அறிக்கையை, மருத்துவ மற்றும் ஊரக சுகாதார சேவைகள் இயக்குநா், 2 வாரங்களுக்குள் தாக்கல் செய்ய வேண்டுமெனவும் அவா் உத்தரவிட்டாா்.