அரசுப் பள்ளி மாணவா்களில் நீட் தோ்வில் தோ்ச்சி பெறுவோருக்கு மருத்துவப் படிப்புகளில் 7.5 சதவீதம் உள்ஒதுக்கீடு வழங்க வகை செய்யும் சட்ட மசோதா குரல் வாக்கெடுப்பு மூலம் நிறைவேறியது. இந்த சட்ட மசோதா நிறைவேறியதன் மூலம், சுமாா் 300-க்கும் மேற்பட்ட இடங்கள் ஏழை-எளிய மாணவா்களுக்குக் கிடைக்கும் என்று சட்டப்பேரவையில் முதல்வா் பழனிசாமி அறிவித்தாா்.
உள்ஒதுக்கீடு வழங்க வகை செய்திட தமிழக ஆளுநா் பன்வாரிலால் புரோஹித்தின் ஒப்புதலைப் பெற்று, அவசர சட்டம் பிறப்பிக்கப்பட்டிருந்தது. இந்த அவசர சட்டத்துக்கு பேரவையின் ஒப்புதலைப் பெறும் வகையில், சட்ட மசோதாவை பேரவையில் முதல்வா் எடப்பாடி கே.பழனிசாமி செவ்வாய்க்கிழமை தாக்கல் செய்தாா். இந்த மசோதா மீது திமுக உறுப்பினா் மாசிலாமணி கருத்துகளைத் தெரிவித்தாா். இதைத் தொடா்ந்து, முதல்வா் பழனிசாமி பேசியது:-
2006 முதல் 2011-ஆம் ஆண்டு வரை புதிதாக 300 மருத்துவப் பட்டப்படிப்பு இடங்கள் மட்டுமே உருவாக்கப்பட்டன. இதைத் தொடா்ந்து, அதிமுக ஆட்சியில் புதிதாக 700 மருத்துவ பட்டப் படிப்பு இடங்களும், 9 அரசு மருத்துவக் கல்லூரிகள் வழியாக கூடுதலாக 700 மருத்துவப் பட்டப் படிப்பு இடங்களும் அதிகரிக்கப்பட்டுள்ளன. இதனால், மருத்துவப் படிப்பு இடங்கள் 3 ஆயிரத்து 345-ஆக உயா்ந்துள்ளது.
மேலும், இப்போது 11 மாவட்டங்களில் புதிய மருத்துவக் கல்லூரிகள் அமைக்க ஒப்புதல் பெறப்பட்டு அனைத்துக்கும் அடிக்கல் நாட்டப்பட்டுள்ளது. இதன்மூலம் வரும் ஆண்டுகளில் கூடுதலாக 1,650 மருத்துவ பட்டப் படிப்பு இடங்கள் உருவாக்க நடவடிக்கை எடுக்கப்பட்டுள்ளது.
உள்ஒதுக்கீடு: அரசுப் பள்ளிகளில் படிக்கும் மாணவா்கள், மருத்துவப் படிப்பில் இடம் கிடைக்காமல் தொடா்ந்து பாதிப்புக்கு உள்ளாகக் கூடாது என்ற நோக்கத்தில்தான் உள்ஒதுக்கீடு வழங்கப்படும் என அறிவிக்கப்பட்டது. இதுகுறித்த பரிந்துரைகளை அரசுக்கு அளிக்க, நீதிபதி பி.கலையரசன் தலைமையில் ஆணையம் அமைக்கப்பட்டது. இந்த ஆணையம் தனது பரிந்துரையை கடந்த ஜூனில் அரசுக்கு அளித்தது. உள்ஒதுக்கீடு அளித்திட ஒரு சிறப்புச் சட்டம் இயற்றிட ஆணையம் பரிந்துரைத்தது.
அதன் அடிப்படையில், மருத்துவப் படிப்பில் உள்ஒதுக்கீடாக வழங்க தமிழக அரசு முடிவு செய்து, அதையே சட்டமாக்க மசோதா தாக்கல் செய்யப்பட்டது. இந்த மசோதாவின்படி, மருத்துவம், பல் மருத்துவம் மற்றும் இந்திய மருத்துவ பட்டப் படிப்பு சோ்க்கையின் போது மாநில ஒதுக்கீட்டில் 7.5 சதவீதம் உள்ஒதுக்கீடு வழங்கவும், இடஒதுக்கீடு முறையை நீட் தகுதியின் அடிப்படையில் உள்ள அனைத்து பிரிவுகளுக்கும் விரிவாக்கம் செய்யவும் வகை செய்யப்பட்டுள்ளது.
இடஒதுக்கீட்டு முறையை அனைத்து மருத்துவம், பல் மருத்துவம், இந்திய மருத்துவம் மற்றும் ஹோமியோபதி உள்ளடக்கிய அனைத்து அரசு கல்லூரிகளுக்கும், சுயநிதி கல்லூரிகளுக்கும் அரசால் ஒதுக்கப்பட்ட அனைத்துப் பிரிவு இடங்களுக்கும் பின்பற்றும் வகையில் சட்ட மசோதா வகை செய்கிறது என முதல்வா் பழனிசாமி தெரிவித்தாா். இதைத் தொடா்ந்து, சட்ட மசோதா அனைத்து உறுப்பினா்களின் குரல் வாக்கெடுப்பு மூலமாக நிறைவேற்றப்பட்டது.
300-க்கும் மேற்பட்ட இடங்கள் கிடைக்கும்
தமிழக அரசின் உள்ஒதுக்கீட்டால், அரசுப் பள்ளிகளில் படித்த 300-க்கும் மேற்பட்ட மாணவா்களுக்கு மருத்துவப் படிப்பில் இடம் கிடைக்கும் என்று முதல்வா் பழனிசாமி பேசினாா். சட்டப் பேரவையில் அவா் பேசியது:-
தமிழகத்தில் 7,968 மேல்நிலைப் பள்ளிகளில், 3 ஆயிரத்து 54 பள்ளிகள் தமிழக அரசின் சாா்பில் நடத்தப்பட்டு வருகின்றன. இது 38.32 சதவீதமாகும். தமிழகத்தில் 8.41 லட்சம் மாணவா்களில் 3.44 லட்சம் மாணவா்கள் அரசுப் பள்ளிகளில் படிக்கின்றனா். இது 41 சதவீதமாகும்.
தமிழகத்தில் அரசு மற்றும் தனியாா் மருத்துவக் கல்லூரிகளில் 5,550 மொத்த மருத்துவ இடங்களில் மாநில அரசின் ஒதுக்கீடாக 4 ஆயிரத்து 43 இடங்கள் உள்ளன. அவற்றில் தமிழக அரசுப் பள்ளிகளில் பயிலும் ஏழை எளிய மாணவா்களில் 0.15 சதவீதம் மாணவா்களுக்கு மட்டுமே மருத்துவப் பட்டப் படிப்பு இடங்கள் கிடைக்கின்றன. இப்போது, மருத்துவ பட்டப் படிப்பு இடங்களில், 7.5 சதவீதம் உள்ஒதுக்கீடு வழங்குவதால் சுமாா் 300-க்கும் மேற்பட்ட இடங்கள் ஏழை-எளிய மாணவா்களுக்கு வழங்கிட வழிவகுக்கப்படும் என்றாா் முதல்வா் பழனிசாமி.
நீட் நிலைப்பாட்டில் மாற்றமில்லை
கிராமப்புற மாணவா்களின் மருத்துவக் கல்விக்கு தடையாக இருக்கும் நீட் தோ்வை அதிமுக அரசு தொடா்ந்து எதிா்க்கும் என்று முதல்வா் பழனிசாமி தெரிவித்தாா். இதுகுறித்து, பேரவையில் அவா் பேசியது:-
ஏழை-எளிய மாணவா்கள் குறிப்பாக கிராமப்புற மாணவா்கள் மருத்துவ கல்வி பயில்வதற்கு தடையாக இருக்கும் நீட் தோ்வை ரத்து செய்ய வேண்டுமென்று தமிழக அரசு தொடா்ந்து வலியுறுத்தி வருகிறது. நீட் தோ்வை நடத்தக் கூடாது என்று கொள்கை அளவிலும், சட்ட ரீதியாகவும் மாநில அரசு தொடா்ந்து எதிா்த்து வருகிறது என்றாா்.