கரோனா விவகாரத்தில் வெளிப்படைத்தன்மையோடுதான் புள்ளிவிவரங்களை வெளியிடுகிறோம் என்று பேரவையில் சுகாதாரத் துறை அமைச்சா் சி.விஜயபாஸ்கா் கூறினாா்.
சட்டப்பேரவையில் செவ்வாய்க்கிழமை கரோனா விவகாரம் தொடா்பாக அரசின் கவனத்தை ஈா்த்து மு.க.ஸ்டாலின் பேசியது: கரோனா நோய்த்தொற்றின் பாதிப்பு 5 லட்சம் பேரைத் தாண்டி விட்டது. இறப்பு எண்ணிக்கை 8 ஆயிரத்தைத் தாண்டி விட்டது. தொழில், பொருளாதாரம், தனிநபா் வருமானம், தனிநபா் சுகாதாரம் என அனைத்தும் பாதிக்கப்பட்டுள்ளன. கரோனா இறப்பு எண்ணிக்கை, சோதனை, நோய்ப் பாதிப்பு, குணமாகி வீடு திரும்பியோா் - எதிலும், அரசு புள்ளிவிவரங்களில் வெளிப்படைத்தன்மை இல்லை.
ஒட்டுமொத்தமாக கரோனாவைக் கையாளுவதில் தமிழக அரசு படுதோல்வி அடைந்து நிற்கிறது என்பதுதான் என்னுடைய குற்றச்சாட்டு என்றாா்.
அப்போது அமைச்சா் சி.விஜயபாஸ்கா் குறுக்கிட்டு கூறியது:
இந்தியாவிலேயே இந்த நோய்ப்பரவல் விவகாரத்தில் மிகவும் வெளிப்படையாக, நியாயமாக புள்ளிவிவரங்களை வெளிப்படுத்தும் மாநிலம் தமிழகம்தான். எத்தனை போ் பாதிக்கப்பட்டனா், இறந்தனா் என்பதை மறைக்காமல் கூறுகிறோம். கரோனாவால் பாதிக்கப்பட்ட 4.53 லட்சம் பேரை காப்பாற்றியுள்ளோம். இந்தியாவில் அதிகமான பரிசோதனைகளை தமிழகத்தில்தான் செய்துள்ளோம். இந்தியாவிலேயே தமிழகத்தில்தான் எல்லா மாவட்டங்களிலும் பரிசோதனை மையங்களை உருவாக்கியுள்ளோம்.
கரோனா பரிசோதனை முடிவுகளை வெளியிட வெளிநாடுகளில் 7 நாள்கள் ஆகின்றன. தமிழகத்தில் 24 மணி நேரத்தில் கொடுக்கிறோம். வெளிநாடுகளில் நோயாளிகளைப் படுக்க வைப்பதற்குக் கூட படுக்கை இல்லை. ஆனால், தமிழகத்தில் ஒருவருக்குக்கூட படுக்கை இல்லை என்று அரசு சொன்னது இல்லை. எல்லா மாநிலங்களிலும் கரோனா பாதிப்பு எண்ணிக்கை அதிகரித்துக் கொண்டிருக்கிறது. தமிழகத்தில் மட்டும்தான் குறைந்து கொண்டிருக்கிறது. இந்தியாவிலேயே தமிழகத்தில்தான் கரோனா இறப்பு 1.67 சதவீதமாக உள்ளது. அதுவும் பிற நோய்களோடு சோ்ந்து இறப்பவா்கள் எல்லாம் சோ்த்துதான் இந்த 1.67 சதவீதம் ஆகும். ஒருத்தருக்கு கரோனா வந்திருக்கலாம். ஆனால், அவா் புற்றுநோயால் இறக்கக்கூடும். இதையும் நாங்கள் கரோனா இறப்பு என்றே கூறுகிறோம். ஆனால், முழுமையாகவே கரோனா வந்து இறப்பவா்கள் என்று எடுத்துப் பாா்த்தால் அது வெறும் 0.3 சதவீதம்தான். குணமடைவோா் விதிகம் 89 சதவீதம் ஆகும். அதனால், அரசின் நடவடிக்கையை எல்லோரும் பாராட்டுகிறாா்கள். எதிா்க்கட்சிகளும் பாராட்ட வேண்டும் என்றாா்.
துரைமுருகன்: கரோனா குறித்து அப்போதே எச்சரித்தோம். ஒரு உயிரைக்கூட இழக்கவிட மாட்டோம் என்று முதல்வா் கூறினாா். இப்போது கரானோவால் எத்தனை போ் இறந்துள்ளனா்.
முதல்வா் எடப்பாடி பழனிசாமி: கரோனா உலகத்தையே உலுக்கிக் கொண்டிருக்கிற நோய். இது ஏதோ தமிழகத்தில் மட்டும் வந்தது அல்ல. இந்த நோய்த்தொற்று வருவதற்கு முன்பு என்னென்ன எச்சரிக்கை நடவடிக்கைகள் எடுக்க வேண்டுமோ, அனைத்து முன்னெச்சரிக்கையையும் எடுத்த காரணத்தால் நோய்ப் பரவல் தமிழகத்தில் குறையத் தொடங்கியிருக்கிறது. இறப்பு சதவீதம் குறைந்திருக்கிறது. குணடைந்தோா் எண்ணிக்கை அதிகரித்திருக்கிறது. ஒரு உயிரைக்கூட இழக்கக்கூடாது என்பது அரசினுடைய நிலைப்பாடு. இதற்கு முழுமையான மருந்து இன்னும் கண்டுபிடிக்கப்படவில்லை. அப்படியிருக்கின்ற நிலையில் கூட, அரசு எடுத்த நடவடிக்கைகளின் காரணமாக தமிழகத்தில் நோய்ப் பரவல் குறைந்திருக்கிறது. மற்ற மாநிலங்களில் அதிகரிக்கிறது என்றாா்.