Enable Javscript for better performance
தமிழகத்தில் பள்ளிகள் திறப்பு ஒத்தி வைப்புதளா்வுகளுடன் பொது முடக்கம் அக். 31-வரை நீட்டிப்பு- Dinamani

சுடச்சுட

    

    தமிழகத்தில் பள்ளிகள் திறப்பு ஒத்தி வைப்பு: தளா்வுகளுடன் பொது முடக்கம் அக். 31-வரை நீட்டிப்பு

    By DIN  |   Published on : 30th September 2020 03:15 AM  |   அ+அ அ-   |    |  

    tmcm

    கரோனா நோய்த்தொற்றுத் தடுப்பு நடவடிக்கை தொடர்பாக மருத்துவக் குழுவினருடன், சென்னை தலைமைச் செயலகத்தில் இருந்து காணொலிக் காட்சி மூலமாக செவ்வாய்க்கிழமை ஆலோசனை நடத்திய முதல்வர் பழனிசாமி.

    தமிழகத்தில் அக்டோபா் 1-ஆம் தேதி முதல் 10, பிளஸ் 1, பிளஸ் 2 வகுப்புகள் செயல்படும் என்ற அரசாணை நிறுத்தி வைக்கப்படுவதாக முதல்வா் எடப்பாடி கே.பழனிசாமி அறிவித்துள்ளாா்.

    இதுகுறித்து மீண்டும் ஆய்வு செய்யப்பட்டு உரிய நேரத்தில் அனுமதி வழங்குவது பற்றி முடிவெடுக்கப்படும் என அவா் தெரிவித்துள்ளாா்.

    சென்னை தலைமைச் செயலகத்தில் இருந்து செவ்வாய்க்கிழமை காணொலி வழியாக, மாவட்ட ஆட்சியா்களுடன் முதல்வா் பழனிசாமி ஆலோசனை நடத்தினாா். அதைத் தொடா்ந்து, மருத்துவ நிபுணா்கள் குழுவுடன் நேரில் ஆலோசனை நடத்தினாா். இந்த ஆலோசனைகளைத் தொடா்ந்து, அவா் வெளியிட்ட முக்கிய அறிவிப்புகள்:

    கரோனா நோய்த் தொற்றைத் தடுப்பதற்காக தேசிய பேரிடா் மேலாண்மைச் சட்டத்தின் கீழ் அமல்படுத்தப்பட்ட பொது முடக்கமானது செப்டம்பா் 30-ஆம் தேதியுடன் நிறைவடைகிறது. ஏற்கெனவே நடைமுறையில் உள்ள பல்வேறு கட்டுப்பாடுகளுடனும், தளா்வுகளுடனும் அக்டோபா் 31-ஆம் தேதி வரை பொது முடக்கம் நீட்டிப்பு செய்யப்படுகிறது. பொருளாதாரத்தை மீட்டெடுக்க வேண்டிய அவசியத்தைக் கருத்தில் கொண்டும், நோய்த்தொற்றின் தன்மையை அறிந்தும், தமிழகம் முழுவதும் நோய் கட்டுப்பாட்டு பகுதி தவிர மற்ற பகுதிகளில் ஏற்கெனவே அனுமதிக்கப்பட்ட பல்வேறு தளா்வுகளுடன் முக்கிய பணிகளுக்கு தொடா்ந்து அனுமதி அளிக்கப்படுகிறது.

    அதன்படி, அரசால் ஏற்கெனவே வெளியிடப்பட்ட நிலையான வழிகாட்டு நடைமுறைகளைப் பின்பற்றி, உணவகங்கள், தேநீா் கடைகள் ஆகியன காலை 6 மணி முதல் இரவு 9 மணி வரை இயங்க அனுமதிக்கப்படுகிறது. பாா்சல் சேவையை இரவு 10 மணி வரை தொடரலாம். திரைப்படதே தொழிலுக்கான படப்பிடிப்புகளுக்கு உரிய வழிகாட்டி நெறிமுறைகள் பின்பற்றப்பட வேண்டும். ஒரே நேரத்தில் 100 பேருக்கு மிகாமல் பணி செய்ய அனுமதி அளிக்கப்படுகிறது. படப்பிடிப்பின்போது பாா்வையாளா்களுக்கு அனுமதி கிடையாது.

    சென்னை விமான நிலையத்தில் வெளி மாநிலங்களில் இருந்து நாள்தோறும் 50 விமானங்கள் தரையிறங்க அனுமதி அளிக்கப்பட்டிருந்தது. இனி 100 விமானங்கள் வரை தரையிறங்கலாம். கோவை, திருச்சி, மதுரை, தூத்துக்குடி, சேலம் ஆகிய விமான நிலையங்களில் விமானங்கள் தரையிறங்க இப்போது அனுமதிக்கப்பட்டுள்ள நிலை தொடரும். ஊரக மற்றும் நகா்ப்புறப் பகுதிகளில் உள்ள வாரச் சந்தைகள் மட்டும் உரிய நிலையான வழிகாட்டு நெறிமுறைகளைக் கடைப்பிடித்து செயல்பட அனுமதிக்கப்படுகிறது.

    பள்ளிகள் திறப்பு எப்போது?: தமிழகத்தில் 10, பிளஸ் 1 மற்றும் பிளஸ் 2 வகுப்பு மாணவா்கள் சுய விருப்பத்தின் அடிப்படையில் அக்டோபா் 1 முதல் பள்ளிகளுக்கு வரலாம் என அரசாணை பிறப்பிக்கப்பட்டிருந்தது. கரோனா நோய்ப் பரவலின் தன்மையைக் கருத்தில் கொண்டும், மாணவா்களின் பாதுகாப்பு காரணமாகவும் அவா்கள் பள்ளிகள் வர அனுமதிப்பட்டு வெளியான அரசாணை தற்சமயம் நிறுத்தி வைக்கப்படுகிறது. இதுகுறித்து மீண்டும் ஆய்வு செய்யப்பட்டு, உரிய நேரத்தில் அனுமதி வழங்குவது பற்றி முடிவெடுக்கப்படும்.

    தொடரும் தடைகள்: பள்ளிகள், கல்லூரிகள், ஆராய்ச்சி நிறுவனங்கள் மற்றும் அனைத்துக் கல்வி நிறுவனங்களின் செயல்பாட்டுக்கான தடை தொடரும். திரையரங்குகள், நீச்சல் குளங்கள், பொழுதுபோக்கு பூங்காக்கள், பெரிய அரங்குகள், கூட்ட அரங்குகள், கடற்கரை, உயிரியல் பூங்காக்கள், அருங்காட்சியகங்கள், சுற்றுலாத் தலங்கள் போன்ற பொதுமக்கள் அதிகம் கூடும் இடங்களில் தடை நீடிக்கும்.

    புறநகா் ரயில்களுக்கு அனுமதி இல்லை: மத்திய உள்துறை அமைச்சகத்தால் அனுமதிக்கப்பட்ட வழித்தடங்களைத் தவிர சா்வதேச விமான போக்குவரத்துக்குத் தடை நீடிக்கும். புறநகா் மின்சார ரயில் போக்குவரத்து, மதம் சாா்ந்த கூட்டங்கள், சமுதாய, அரசியல், பொழுதுபோக்கு, கலாசார நிகழ்வுகள், கல்வி விழாக்கள், பிற கூட்டங்கள், ஊா்வலங்கள் நடத்த விதிக்கப்பட்ட தடைகள் தொடரும் என முதல்வா் பழனிசாமி அறிவித்துள்ளாா்.

    கரோனா தடுப்பு நடவடிக்கைகள் மற்றும் பொது முடக்க தளா்வுகள் தொடா்பாக மாவட்ட ஆட்சியா்களுடனான கூட்டத்தில் துணை முதல்வா் ஓ. பன்னீா்செல்வம் பங்கேற்கவில்லை.

    ஒத்துழைப்பு அளியுங்கள்

    நோய்ப் பரவலை கட்டுப்படுத்த பொது மக்கள் முழு ஒத்துழைப்பு அளிக்க வேண்டுமென முதல்வா் பழனிசாமி வேண்டுகோள் விடுத்தாா். இதுகுறித்து, அவா் செவ்வாய்க்கிழமை வெளியிட்ட செய்தி:

    பொது மக்கள் வெளியில் செல்லும் போதும், பொது இடங்களிலும் முகக் கவசம் அணிவது கட்டாயமாக்கப்பட்டுள்ளது. பொது மக்கள் வீட்டிலும், பணிபுரியும் இடங்களிலும் அடிக்கடி சோப்பை பயன்படுத்தி கை கழுவ வேண்டும்.

    வெளியிடங்களில் முகக் கவசத்தை அணிந்து செல்வதையும், சமூக இடைவெளியை தவறாமல் கடைப்பிடித்தும், அவசியத் தேவை இல்லாமல் வெளியில் செல்வதைத் தவிா்த்தும், அரசுக்கு முழு ஒத்துழைப்பு அளித்தால்தான், நோய்த் தொற்றுப் பரவலை கட்டுப்படுத்த முடியும் என்று முதல்வா் பழனிசாமி தெரிவித்தாா்.

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    flipboard facebook twitter whatsapp