சென்னை: குமரிக்கடல் பகுதியில் உருவாகவுள்ள வளிமண்டல சுழற்சி காரணமாக, மேற்கு தொடா்ச்சி மலையையொட்டிய மாவட்டங்கள் மற்றும் தென்தமிழகத்தில் ஓரிரு இடங்களில் ஏப்ரல் 9-ஆம் தேதி முதல் ஏப்ரல் 11-ஆம் தேதி வரை லேசானது முதல் மிதமான மழை பெய்யக்கூடும்.
இது குறித்து சென்னை வானிலை ஆய்வு மைய இயக்குநா் நா.புவியரசன் புதன்கிழமை கூறியது:
தமிழகம், புதுச்சேரி, காரைக்காலில் பெரும்பாலான இடங்களில் வியாழக்கிழமை (ஏப்.8) வட வானிலையே நிலவும். நாமக்கல், கரூா் ஆகிய 2 மாவட்டங்களில் அதிகபட்ச வெப்பநிலையானது இயல்பைவிட 3 முதல் 4 டிகிரி செல்சியஸ் வரை உயரக்கூடும்.
சென்னையில்...: சென்னையைப் பொருத்தவரை வியாழக்கிழமை வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 35 டிகிரி செல்சியஸை ஒட்டியும், குறைந்தபட்ச வெப்பநிலை 26 டிகிரி செல்சியஸை ஒட்டியும் இருக்கும்.
மிதமான மழை: குமரிக்கடல் பகுதியில் வளிமண்டல சுழற்சி உருவாகவுள்ளது. இதன்காரணமாக, மேற்குத் தொடா்ச்சி மலையை ஒட்டிய மாவட்டங்கள் மற்றும் தென்தமிழகத்தில் ஓரிரு இடங்களில் ஏப்ரல் 9-ஆம் தேதி முதல் ஏப்ரல் 11-ஆம் தேதி வரை இடியுடன் கூடிய லேசானது முதல் மிதமான மழை பெய்யக்கூடும். ஏனைய மாவட்டங்கள் மற்றும் புதுச்சேரி, காரைக்காலில் பெரும்பாலும் வட வானிலை நிலவும்.