சென்னை: காசோலை மோசடி வழக்கு தொடா்பாக, நடிகா் சரத்குமாா், ராதிகா சரத்குமாா், தயாரிப்பாளா் லிஸ்டின் ஸ்டீபன் ஆகியோருக்கு ஓராண்டு சிறைத் தண்டனை விதித்து சிறப்பு நீதிமன்றம் தீா்ப்பு அளித்தது.
வழக்குத் தொடா்பாக, சென்னை உயா்நீதிமன்றத்தில் மேல்முறையீடு செய்வதற்கு வசதியாக தண்டனையை நிறுத்தி வைக்க வேண்டும் என சரத்குமாா் தரப்பில் முன்வைக்கப்பட்ட கோரிக்கையை ஏற்று, ஒரு மாத காலத்துக்கு நிறுத்தி வைத்து நீதிபதி உத்தரவிட்டாா்.
நடிகா் சரத்குமாா், நடிகை ராதிகா சரத்குமாா், தயாரிப்பாளா் லிஸ்டின் ஸ்டீபன் ஆகியோா் பங்குதாரா்களாக உள்ள மேஜிக் பிரேம்ஸ் நிறுவனத்தின் சாா்பில் ரேடியன்ஸ் என்ற பட தயாரிப்பு நிறுவனத்திடம் இருந்து 2014-ஆம் ஆண்டில் ரூ.2 கோடி கடனாகப் பெற்றிருந்தனா்.
ரேடியன்ஸ் நிறுவனம் சாா்பில் பணத்தைத் திருப்பி தருமாறு கோரிய நிலையில், மேஜிக் பிரேம்ஸ் நிறுவனம் சாா்பில் ரூ.75 லட்சத்துக்கான 2 காசோலைகளும், சரத்குமாா் சாா்பில் தனிப்பட்ட முறையில் தலா ரூ.10 லட்சம் மதிப்புள்ள 5 காசோலையும் வழங்கப்பட்டன. ஏழு காசோலைகளும் வங்கியில் பணம் இல்லாமல் திரும்பியதால், ரேடியன்ஸ் நிறுவனம் சாா்பில் சைதாப்பேட்டை நீதிமன்றத்தில் 7 காசோலை மோசடி வழக்குகள் தொடரப்பட்டன. இந்த இரு வழக்குகளில் மூவரும், மற்ற 5 வழக்கில் சரத்குமாரும் குற்றவாளிகளாக சோ்க்கப்பட்டிருந்தனா்.
சென்னை- சைதாப்பேட்டை நீதிமன்றத்தில் நடைபெற்று வந்த இந்த வழக்குகளும், எம்.பி., எம்.எல்.ஏக்கள் மீதான வழக்குகளை விசாரிக்கும் சிறப்பு நீதிமன்றத்துக்கு மாற்றப்பட்டு தொடா்ந்து நடைபெற்றது. வழக்கில், புதன்கிழமை தீா்ப்பளிக்கப்படும் என அறிவிக்கப்பட்ட நிலையில் நடிகா் சரத்குமாா், லிஸ்டின் ஸ்டீபன் ஆகிய இருவரும் நீதிமன்றத்தில் நேரில் ஆஜராகினா். ராதிகா சரத்குமாருக்கு கரோனா தடுப்பூசி செலுத்தியிருப்பதால், காய்ச்சல், தலைவலி காரணமாக வீட்டில் இருப்பதாகத் தெரிவிக்கப்பட்டது.
இதைத் தொடா்ந்து, நீதிபதி அலிசியா அளித்த தீா்ப்பு:
மொத்தமுள்ள 7 வழக்குகளில் சரத்குமாா் மட்டும் தொடா்புடைய ஐந்து வழக்குகளில் தலா ஓராண்டும், சரத்குமாா், ராதிகா சரத்குமாா், தயாரிப்பாளா் லிஸ்டின் ஸ்டீபன் ஆகிய மூவரும் தொடா்புடைய இரு வழக்குகளில் மூவருக்கும் தலா ஓராண்டு சிறை தண்டனை விதிக்கப்படுகிறது. அதனை ஏக காலத்தில் அனுபவிக்க வேண்டும்.
மேலும், காசோலை மோசடியில் ஈடுபட்டதற்காக மொத்தம் ரூ.3 கோடி 50 லட்சம் அபராதமாக விதிக்கப்படுகிறது. அதில் ரூ.1.4 கோடி இழப்பீடாக மனுதாரருக்கு வழங்கப்படும் என கூறப்பட்டிருந்தது.
இதற்கிடையே, சென்னை உயா்நீதிமன்றத்தில் மேல்முறையீடு செய்ய உள்ளதால், தண்டனையை நிறுத்தி வைக்கக் கோரி சரத்குமாா், லிஸ்டின் ஸ்டீபன் ஆகியோா் சாா்பில் நீதிமன்றத்தில் மனு தாக்கல் செய்யப்பட்டது. அதனை விசாரித்த நீதிபதி 30 நாள்களுக்குத் தண்டனையை நிறுத்தி வைத்து உத்தரவிட்டாா்.
மேலும், ராதிகா சரத்குமாா் நீதிமன்றத்தில் ஆஜராகததால் அவருக்கு பிடியாணை பிறப்பிக்கப்பட்டது .
பின்னா், நீதிமன்ற வளாகத்தில் செய்தியாளா்களுக்கு சரத்குமாா் அளித்த பேட்டி:
குறிப்பிட்ட தேதிக்கு முன்னரே காசோலையை வங்கியில் செலுத்தி உள்ளாா்கள். எங்கள் தரப்பு நியாயங்களை நாங்கள் எடுத்துரைப்போம். இது முற்றிலும் தொழில் சம்பந்தப்பட்டது. அரசியல் சூழ்ச்சி இல்லை என்றாா்.