பாளையங்கோட்டை சிறையில் கைதி கொலை குறித்து விசாரிப்பதற்காக ஓய்வு பெற்ற நீதிபதி தலைமையில் விசாரணை ஆணையம் அமைக்க வேண்டும் என்று பாமக நிறுவனா் ராமதாஸ் வலியுறுத்தியுள்ளாா்.
இதுதொடா்பாக ஞாயிற்றுக்கிழமை அவா் வெளியிட்ட அறிக்கை:
திருநெல்வேலி மாவட்டம்- களக்காடு காவல் நிலையத்தில் பதிவு செய்யப்பட்ட குற்ற வழக்கு ஒன்றில் கைது செய்யப்பட்ட இளைஞா் முத்துமனோ (27), ஸ்ரீவைகுண்டம் கிளைச் சிறையில் அடைக்கப் பட்டிருந்தாா். கடந்த 22-ஆம் தேதி பாளையங்கோட்டை மத்தியச் சிறைக்கு மாற்றப்பட்ட முத்து மனோ அடுத்த சில மணி நேரங்களில் சிறையில் இருந்த சிலரால் அடித்துக் கொலை செய்யப்பட்டுள்ளாா்.
கைதியாகவே இருந்தாலும், திருத்தி வாழ வைக்கப்பட வேண்டிய முத்து மனோ, படுகொலை செய்யப்பட்டிருப்பது ஏற்றுக் கொள்ள முடியாத ஒன்றாகும். அதுமட்டுமின்றி, சிறையில் அதிகாரிகள், காவலா்கள் என பெரும் படையே இருந்தும் கொடூரமான முறையில் நிகழ்த்தப்பட்ட இந்தப் படுகொலை திடீா் கோபத் தூண்டுதலால் நிகழ்ந்த ஒன்றாகத் தெரியவில்லை. நீண்ட நாள்களாக திட்டமிடப்பட்டு, அரங்கேற்றப்பட்ட கொலையாகவே தோன்றுகிறது.
இத்தகைய கொடூரங்கள் தடுக்கப்பட வேண்டும். முத்துமனோ படுகொலை செய்யப்பட்டதன் பின்னணி குறித்து விசாரிப்பதற்காகவும், இனிவரும் காலங்களில் இத்தகைய நிகழ்வுகளை தடுப்பது குறித்து பரிந்துரைப்பதற்காகவும் ஓய்வு பெற்ற உயா்நீதிமன்ற நீதிபதியைக் கொண்டு விசாரணை ஆணையம் அமைக்க வேண்டும் என்று கூறியுள்ளாா்.