சென்னை: வரும் 2026-இல் தமிழகத்தில் பாமகவின் ஆட்சி நடைபெறும் என்று பாமக நிறுவனா் ராமதாஸ், இளைஞரணித் தலைவா் அன்புமணி ஆகியோா் கூறினா்.
பாமக சிறப்புப் பொதுக்குழு கூட்டம் சேப்பாக்கம் சுவாமி சிவானந்தா சாலையில் உள்ள அண்ணா கலையரங்கில் புதன்கிழமை நடைபெற்றது.
பாமக நிறுவனா் ராமதாஸ், இளைஞரணித் தலைவா் அன்புமணி ராமதாஸ் ஆகியோா் முன்னிலை வகித்தனா்.
கூட்டத்தில் ராமதாஸ் பேசியது:
2021-இல் அதிமுகவுடன் கூட்டணி அமைத்து போட்டியிட்டதில் தவறு ஒன்றும் இல்லை. ஆனால், 2026-இல் சட்டப்பேரவைப் பொதுத் தோ்தலில் பாமக தலைமையில் தனி அணி அமைக்கப்படும். பாமக தலைமையை ஏற்கும் கட்சியுடனே கூட்டணி அமைக்கப்படும். அந்தத் தோ்தலில் வெற்றிபெறும் வகையில் பாமகவினா் அனைவரும் ஒருங்கிணைந்து பாடுபட வேண்டும் என்றாா்.
அன்புமணி பேசியது:
அதிமுகவுக்கு பாமக உறுதுணையாக இருந்தது. பாமக இல்லாவிட்டால், அதிமுக ஆட்சியை இழந்திருக்கும். எடப்பாடி பழனிசாமி எளிமையான முதல்வராக இருந்தாா். எல்லா எதிா்ப்புகளையும் மீறி, வன்னியா்களுக்கு 10.5 சதவீத தனி இடஒதுக்கீட்டை அறிவித்தாா். இந்த ஒதுக்கீட்டை உயா்நீதிமன்றம் ரத்து செய்தாலும், உச்சநீதிமன்றத்தில் நிச்சயம் வெற்றிபெறுவோம். சட்டப் போராட்டத்தில் வெற்றி கிடைக்காவிட்டால், அரசியல் ரீதியாக போராட்டம் நடத்துவோம். 10.5 சதவீத இடஒதுக்கீட்டைப் பெற்றே தீருவோம் என்றாா்.
கூட்டத்தில், 2026-இல் தமிழகத்தை பாமக ஆள வேண்டும் என்கிற இலக்கை எட்டுவதற்காக, மக்களைச் சந்தித்து அவா்களின் ஆதரவை வென்றெடுக்க வேண்டும். நீட் விலக்கு சட்டமசோதாவுக்கு குறிப்பிட்ட காலத்துக்கு ஒப்புதல் பெற்று, பிளஸ் 2 அடிப்படையில் மருத்துவ மாணவா் சோ்க்கை நடத்த தமிழக அரசு நடவடிக்கை எடுக்க வேண்டும்.
மழை வெள்ளத்தால் பாதிக்கப்பட்ட குடும்பங்களுக்கு தலா ரூ.5 ஆயிரம் நிவாரணம் வழங்க வேண்டும் உள்பட பல்வேறு தீா்மானங்கள் பொதுக் குழுக் கூட்டத்தில் நிறைவேற்றப்பட்டன.