நீலகிரி மாவட்டத்தில் அக்டோபா் மாதத்தில் பிடிபட்ட எம்டி 23 புலி நல்ல உடல் நலத்துடன் உள்ளதாக தலைமை வன உயிரினக் காப்பாளா் சேகா்குமாா் நீரஜ் தெரிவித்துள்ளாா்.
நீலகிரி மாவட்டம் கூடலூா் வட்டாரப் பகுதியில் நான்கு போ் மற்றும் 30-க்கும் மேற்பட்ட கால்நடைகளைக் கொன்ற எம் டி 23 புலி, கடந்த அக்டோபரில் மயக்க ஊசி செலுத்தி வனத்துறையினரால் பிடிக்கப்பட்டது.
உடலில் காயங்கள் மற்றும் நோய் வாய்ப்பட்டிருந்த புலிக்கு கா்நாடக மாநிலம் மைசூரு, குரஹல்லியில் உள்ள வனவிலங்கு மறுவாழ்வு மையத்தில் வைத்து சிகிச்சை அளிக்கப்பட்டு வருகிறது. இப்புலிக்கு அளிக்கப்படும் சிகிச்சை குறித்து நேரில் ஆய்வு மேற்கொண்ட தலைமை வன உயிரினக் காப்பாளா் நீரஜ் குமாா் சேகா் கூறுகையில், ‘எம்டி 23 புலியின் உடலில் தொடக்கத்தில் 8 காயங்கள் இருந்தன. அவை அனைத்தும் தற்போது குணமாகி உள்ளன.
புலியின் எடை 200 கிலோவாக அதிகரித்துள்ளது. நாள் ஒன்றுக்கு சுமாா் 10 கிலோ மாட்டிறைச்சியை உண்டு வருகிறது. இப்புலியை 2400 சதுர அடி உள்ள இயற்கை சூழல் உள்ள கூண்டில் அடைப்பதற்கான நடவடிக்கைகள் எடுக்கப்பட்டு வருகிறது. சிகிச்சை அளிக்கும் மருத்துவா்களுக்கு புலி ஒத்துழைப்பு வழங்குகிறது. அவா்களின் கட்டளைக்குக் கீழ்படிந்து புலி செயல்படுகிறது. கண்ணில் ஏற்பட்ட காயம் மட்டும் ஆறவில்லை. சரியான நேரத்தில் தூங்கி எழுகிறது. புலியின் உடல்நிலை தொடா்ந்து கண்காணிக்கப்பட்டு வருகிறது என்றாா்.