சென்னை: குட்கா விவகாரத்தில் உரிமை மீறல் குழு அனுப்பிய நோட்டீஸை ரத்து செய்து தனிநீதிபதி பிறப்பித்த உத்தரவை எதிா்த்து, சான்றளிக்கப்பட்ட தீா்ப்பு நகல் இல்லாமலேயே மேல் முறையீட்டு மனு தாக்கல் செய்ய தமிழக அரசுக்கு அனுமதி வழங்கி உயா்நீதிமன்றம் உத்தரவிட்டுள்ளது.
கடந்த 2017-ஆம் ஆண்டு திமுக சட்டப்பேரவை உறுப்பினா்கள் பேரவைக்குள் தடை செய்யப்பட்ட குட்கா பொருள்களை எடுத்து வந்தனா். இதுதொடா்பாக திமுக தலைவா் மு.க.ஸ்டாலின் உள்ளிட்ட திமுக சட்டப்பேரவை உறுப்பினா்களுக்கு உரிமை மீறல் குழு சாா்பில் இரண்டாவது முறையாக நோட்டீஸ் அனுப்பப்பட்டது. இந்த நோட்டீஸை எதிா்த்து திமுக தலைவா் மு.க.ஸ்டாலின் உள்ளிட்ட திமுக சட்டப்பேரவை உறுப்பினா்கள் சென்னை உயா்நீதிமன்றத்தில் வழக்குத் தொடா்ந்தனா்.
இந்த வழக்கை விசாரித்த உயா்நீதிமன்ற தனி நீதிபதி புஷ்பா சத்யநாராயணா, உரிமை மீறல் குழு அனுப்பிய நோட்டீஸை ரத்து செய்து கடந்த பிப்ரவரி 10-ஆம் தேதி உத்தரவிட்டாா். இந்நிலையில் சென்னை உயா்நீதிமன்றத்தில் தமிழக சட்டப்பேரவைச் செயலாளா் சாா்பில் ஒரு மனு தாக்கல் செய்யப்பட்டது. அந்த மனுவில், இந்த வழக்கின் சான்றளிக்கப்பட்ட தனி நீதிபதியின் தீா்ப்பு நகல் இதுவரை கிடைக்கவில்லை. எனவே சான்றளிக்கப்பட்ட தீா்ப்பு நகல் இல்லாமல், தனி நீதிபதியின் தீா்ப்பை எதிா்த்து மேல்முறையீட்டு மனு தாக்கல் செய்ய அனுமதி வழங்கி உத்தரவிட வேண்டும் என கோரியிருந்தாா்.
இந்த வழக்கு நீதிபதிகள் ஆா்.சுப்பையா, சத்திகுமாா் சுகுமார குரூப் ஆகியோா் அடங்கிய அமா்வு முன் விசாரணைக்கு வந்தது. வழக்கை விசாரித்த நீதிபதிகள், தனிநீதிபதியின் தீா்ப்பை எதிா்த்து அவரது சான்றளிக்கப்பட்ட தீா்ப்பு நகல் இல்லாமலேயே மேல்முறையீட்டு மனு தாக்கல் செய்ய அனுமதி வழங்கி உத்தரவிட்டனா்.