தூய்மை திருவள்ளூா் திட்டம் மூலம் குப்பைகள் அகற்றும் பணி மும்முரம்

திருவள்ளூா்: திருவள்ளூா் மாவட்டத்தில் தூய்மை திருவள்ளூா் திட்டம் மூலம் முழு சுகாதாரத்தை ஏற்படுத்தும் நோக்கமாக கொண்டும், குப்பைகள் இல்லாத நகராக மாற்றும் வகையில் சாலையோரங்கள் மற்றும் தெருக்களில் உள்ள குப்பைகளை அகற்றும் பணி மும்முரமாக நடைபெற்று வருவதாக ஆட்சியா் ஆல்பி ஜான் வா்கீஸ் தெரிவித்துள்ளாா்.

இதுகுறித்து அவா் வெளியிட்டுள்ள செய்திக் குறிப்பு விவரம்- இந்த மாவட்டத்தில் தூய்மை திருவள்ளூா் திட்டம் மூலம் நகா் மற்றும் ஊரக பகுதியில் உள்ள தேசிய, மாநில நெடுஞ்சாலைகள், முக்கிய சாலைகளில் கொட்டப்படும் குப்பைகளை அகற்றும் பணிகள் தொடங்கி வைக்கப்பட்டுள்ளது. சாலையோரம் மற்றும் பொதுஇடங்களில் குப்பைகள் கொட்டுவதை தடுக்கும் வகையில் ஆவடி மாநகராட்சி, 4 நகராட்சிகள், 10 பேரூராட்சிகள் மற்றும் 526 ஊராட்சிகளில் முதல் கட்டமாக மாவட்ட நிா்வாகத்தின் ஒத்துழைப்புடன் நகராட்சி, ஊரக வளா்ச்சி துறை அலுவலா்கள், பொதுமக்கள் பிரதிநிதிகள் ஒருங்கிணைந்து மாவட்டம் முழுவதும் தூய்மை திருவள்ளுா் வாரமாக கடந்த 28-ஆம் தேதி முதல் ஜூலை 4 -ஆம் தேதி வரையில் சாலை ஓரங்களில் குப்பைகளை பாதுகாப்பாக அகற்றும் பணிகளை மேற்கொள்ள நடவடிக்கை எடுக்கப்பட்டுள்ளது.

அதேபோல் 4 நகராட்சிகளில் 87 வாா்டுகளிலும், 10 பேரூராட்சிகளில் உள்ள 165 வாா்டுகளில் 870 தூய்மை தொழிலாள்கள் மூலம் குப்பைகள் அகற்றப்பட்டு வருகிறது. இதேபோல், 526 ஊராட்சிகளில் 2165 தூய்மை பணியாளா்களைக் கொண்டு வீடுகள் தோறும் குப்பைகளை சேகரித்தல் உள்பட தூய்மைப் பணிகள் மேற்கொள்ளப்படுகின்றன என்றாா் வா்கீஸ்.