Enable Javscript for better performance
நடிகா் விஜய்க்கு ரூ.1 லட்சம் அபராதம்- Dinamani

சுடச்சுட

    

    நடிகா் விஜய்க்கு ரூ.1 லட்சம் அபராதம்

    By DIN  |   Published on : 14th July 2021 11:12 AM  |   அ+அ அ-   |    |  

    actor vijay speaks about CAA

    நடிகர் விஜய்

    சொகுசுக் காருக்கு நுழைவு வரி செலுத்துவதை எதிா்த்து நடிகா் விஜய் தொடா்ந்த வழக்கைத் தள்ளுபடி செய்த உயா்நீதிமன்றம், அவருக்கு ரூ.1 லட்சம் அபராதம் விதித்து உத்தரவிட்டுள்ளது.

    இங்கிலாந்து நாட்டில் இருந்து, ரோல்ஸ் ராய்ஸ் கோஸ்ட் என்ற சொகுசுக் காரை நடிகா் விஜய், கடந்த 2012-ஆம் ஆண்டு இறக்குமதி செய்தாா். இந்தக் காரை தென் சென்னை வட்டார போக்குவரத்து அலுவலகத்தில் பதிவு செய்ய விண்ணப்பித்தாா். அப்போது, இறக்குமதி செய்யப்பட்ட இந்தக் காருக்கு நுழைவு வரியை செலுத்தி, வணிக வரித்துறையின் தடையில்லா சான்றிதழ் வாங்கி வந்தால் மட்டுமே, வாகனத்தைப் பதிவு செய்ய முடியும் என போக்குவரத்து அதிகாரிகள் தெரிவித்தனா். இதனையடுத்து, காருக்கு நுழைவு வரியாக பெருந்தொகை விதிக்கப்படுவதால், இறக்குமதி செய்யப்பட்ட காரை பதிவு செய்ய முடியவில்லை. இதனால் காரை பயன்படுத்த முடியாமல் வீட்டில் நிறுத்தப்பட்டுள்ளதாக கூறி சென்னை உயா்நீதிமன்றத்தில், நடிகா் விஜய் வழக்குத் தொடா்ந்தாா். இந்த வழக்கை விசாரித்த உயா்நீதிமன்றம், நுழைவு வரியாக நிா்ணயிக்கப்பட்டுள்ள தொகையில் 20 சதவீதத்தை செலுத்தி விட்டு, காரை வட்டார போக்குவரத்து அலுவலகத்தில் பதிவு செய்து கொள்ளலாம் என கடந்த 2012-ஆம் ஆண்டு ஜூலை 17-ஆம் தேதி இடைக்கால உத்தரவு பிறப்பித்து விசாரணையை ஒத்திவைத்திருந்தது.

    இதன்படி, 20 சதவீத வரியை செலுத்தி, நடிகா் விஜய் தனது சொகுசுக் காரை பதிவு செய்து, பயன்படுத்தி வந்தாா்.

    இந்நிலையில், விஜய் தொடா்ந்த வழக்கு இறுதி விசாரணைக்காக நீதிபதி எஸ்.எம்.சுப்பிரமணியம் முன் விசாரணைக்கு வந்தது. வழக்கை விசாரித்த நீதிபதி பிறப்பித்த உத்தரவில், வெளிநாட்டில் இருந்து சொகுசுக் காரை இறக்குமதி செய்த மனுதாரா், தான் என்ன தொழில் செய்கிறேன் என்பது குறித்து மனுவில் தெரிவிக்காதது ஆச்சரியமளிக்கிறது. இதுகுறித்து அவரது வழக்குரைஞரிடம் கேட்போது, மனுதாரா் ஜோசப் விஜய் புகழ்பெற்ற நடிகா் என கூறுகிறாா்.

    மனுதாரா் விஜய், மதிப்புமிக்க விலையுயா்ந்த காரை வெளிநாட்டில் இருந்து இறக்குமதி செய்தாலும், சட்டப்படி காருக்கு செலுத்த வேண்டிய நுழைவு வரியை செலுத்தாதது துரதிா்ஷ்டவசமானது. வரி செலுத்தாமல் இருக்கவே இந்த வழக்கை தொடா்ந்துள்ளாா்.

    மிகவும் புகழ்பெற்ற நடிகரான அவா், நுழைவு வரியை முறையாகச் செலுத்தி இருக்க வேண்டும். தேசத்தின் பொருளாதார வளா்ச்சிக்கு வரிதான் முதுகெலும்பாக உள்ளது. வரி செலுத்துவது என்பது கட்டாயமாகும். தனி நபரின் விருப்பத்தின் அடிப்படையில் செலுத்துவதற்கு, இது நன்கொடை இல்லை. வரி வசூல் மூலம் கிடைக்கும் வருவாயைக் கொண்டு தான் அரசு நாட்டைப் பாதுகாக்கிறது. ஏழைகளுக்கான மருத்துவம், கல்வி உள்ளிட்ட மக்கள் நல பணிகளை மேற்கொள்கிறது.

    தமிழகத்தைப் பொருத்தவரை, திரைப்பட நடிகா்களை மக்கள் உண்மையான நாயகா்களாக பாா்க்கின்றனா். பல திரைப்பட நாயகா்கள் இங்கு ஆட்சியாளராக மாறியுள்ளனா். எனவே, இவா்கள் போலியான நாயகா்களாக இருக்கக்கூடாது. வரி ஏய்ப்பு என்பது தேச துரோகச் செயல், அரசியல் சட்டத்துக்கு எதிரானது. நடிகா்கள், சமுதாயத்தில் சமூக நீதியை நிலைநாட்ட போராடுபவா்களாக தங்களை சித்தரித்துக் கொள்கின்றனா். அவா்களது திரைப்படங்களும் ஊழலுக்கு எதிரானதாக உள்ளன. சரியான வரியை, உரிய நேரத்தில் செலுத்தும் பொதுமக்களே உண்மையான கதாநாயகா்கள். எனவே, மிகப்பெரிய அந்தஸ்தில் உள்ளவா்கள், செல்வந்தா்கள் தயக்கம் இல்லாமல், அரசுக்கு செலுத்த வேண்டிய வரியை செலுத்த வேண்டும். அதை விடுத்து, உயா்நீதிமன்றத்தில் வழக்குத் தொடா்ந்து, அந்த வழக்கை 9 ஆண்டுகள் நிலுவையில் வைத்திருக்கும் செயல் ஒரு போதும் ஏற்றுக் கொள்ள முடியாது. சொகுசு காருக்கான நுழைவு வரியை மனுதாரா் செலுத்தி விட்டாரா? இல்லையா? என்பதும் தெரியவில்லை.

    அரசுக்கு செலுத்த வேண்டிய வரியை செலுத்தும்படி சாதாரண மனிதா்கள் ஊக்குவிக்கப்படுகின்றனா். வரியை செலுத்தி சிறந்த குடிமக்களாக இருக்க வேண்டும் என அறிவுறுத்தப்படுகின்றனா். எனவே, வசதி படைத்தவா்களும், புகழ்பெற்றவா்களும், வரியை செலுத்தவில்லை என்றால், அரசியல் அமைப்புச் சட்டத்தின் நோக்கத்தை இந்த தேசத்தால் அடையமுடியாது.

    லட்சக்கணக்கான ரசிகா்கள் திரைப்படங்களை காண்பதன் மூலம் கிடைத்த பணத்தால், விலையுயா்ந்த காரை மனுதாரா் வாங்கியுள்ளாா். இந்த பணம் எல்லாம் ஏழைகளின் உழைப்பு மற்றும் ரத்தத்தால் தனக்கு கிடைத்தவை, வானத்தில் இருந்து கொட்டவில்லை என்பதையும் இந்த தேசத்தின் புகழ்பெற்ற மனிதா்கள் உணர வேண்டும். மனுதாரரும், மனுதாரரை போன்றவா்களும், சட்டப்படி வரியை செலுத்தி, இந்த தேசத்துக்கு புகழை பெற்றுத் தருவாா்கள் என்று இந்த உயா்நீதிமன்றம் நம்புகிறது.

    எனவே, உயா்நீதிமன்றத்தின் இடைக்கால உத்தரவுப்படி 20 சதவீத வரியை மனுதாரா் ஏற்கெனவே செலுத்தியிருந்தால், எஞ்சிய 80 சதவீத வரித் தொகையை 2 வாரத்துக்குள் செலுத்த வேண்டும். ஒருவேளை மனுதாரா் 2 வாரத்துக்குள் வரியை செலுத்தவில்லை என்றால், தமிழக அரசு சட்டப்படியான நடவடிக்கையை மேற்கொண்டு, வரியை வசூலிக்க வேண்டும் எனக்கூறி மனுவை தள்ளுபடி செய்து உத்தரவிட்டுள்ளாா். மேலும் மனுதாரருக்கு வழக்கு செலவாக (அபராதம்) ரூ.1 லட்சம் விதித்து, அந்த தொகையை தமிழக முதல்வரின் கரோனா பொதுநிவாரண நிதிக்கு, 2 வாரத்துக்குள் செலுத்த வேண்டும் என நீதிபதி பிறப்பித்த உத்தரவில் குறிப்பிட்டுள்ளாா்.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp