வக்ஃபு வாரிய உறுப்பினா் தோ்தல்: இன்று வரைவு வாக்காளா் பட்டியல்

வக்ஃபு வாரிய உறுப்பினா்களுக்கான வரைவு வாக்காளா் பட்டியல் புதன்கிழமை வெளியிடப்பட உள்ளது. இதற்கான அறிவிப்பை தோ்தல் நடத்தும் அதிகாரியும், பிற்படுத்தப்பட்டோா், மிகவும் பிற்படுத்தப்பட்டோா் மற்றும் சிறுபான்மையினா் நலத் துறை முதன்மைச் செயலாளா் வெளியிட்டுள்ளாா். அவரது அறிவிப்பு விவரம்:-

தமிழகத்தைச் சோ்ந்த இஸ்லாமிய சட்டப் பேரவை உறுப்பினா்களின் பட்டியல் பேரவைச் செயலகத்தில் இருந்து பெறப்பட்டுள்ளது. இதைக் கொண்டு வரைவு வாக்காளா் பட்டியல் தயாா் செய்யப்பட்டுள்ளது. இந்த வரைவு வாக்காளா் பட்டியல் நகல் புதன்கிழமை வெளியிடப்படும். சென்னை தலைமைச் செயலகம் நாமக்கல் கவிஞா் மாளிகையின் இரண்டாவது தளம், வக்ஃபு வாரியத்தின் முதன்மைச் செயல் அலுவலா் அலுவலகம், அனைத்து மண்டல வக்ஃபு கண்காணிப்பாளா்களின் அலுவலகங்கள் ஆகியவற்றில் வெளியிடப்படும். இதில் ஏதேனும் ஆட்சேபணைகள் இருந்தால், வரும் 20-ஆம் தேதி மாலை 3 மணிக்குள் தெரிவிக்கலாம். தோ்தல் நடத்துவது தொடா்பான கால அட்டவணை தனியாக வெளியிடப்படும் என்று அறிவிக்கப்பட்டுள்ளது.