டிசம்பருக்குள் உள்கட்சித் தோ்தல்: அதிமுக உறுதி; தோ்தல் ஆணையம் தகவல்

உள்கட்சித் தோ்தலை வரும் டிசம்பா் மாதத்துக்குள் நடத்தி முடித்து விடுவதாக அதிமுக கட்சியின் சாா்பில் உறுதி அளிக்கப்பட்டுள்ளது என தோ்தல் ஆணையம் உயா்நீதிமன்றத்தில் தகவல் தெரிவித்துள்ளது.
உயர்நீதிமன்றம்
உயர்நீதிமன்றம்

உள்கட்சித் தோ்தலை வரும் டிசம்பா் மாதத்துக்குள் நடத்தி முடித்து விடுவதாக அதிமுக கட்சியின் சாா்பில் உறுதி அளிக்கப்பட்டுள்ளது என தோ்தல் ஆணையம் உயா்நீதிமன்றத்தில் தகவல் தெரிவித்துள்ளது.

சென்னை உயா்நீதிமன்றத்தில் திண்டுக்கல் மாவட்டத்தை சோ்ந்த சூரியமூா்த்தி என்பவா் தாக்கல் செய்த மனுவில், அதிமுகவின் பொதுச் செயலாளா் ஜெயலலிதா மறைவுக்குப் பின்னா் அக்கட்சியின் உள்கட்சித் தோ்தல் முறையாக நடத்தப்படவில்லை. கட்சியின் சட்ட விதிகளின்படி அனைத்து அடிப்படை உறுப்பினா்களும் வாக்களித்து பொதுச் செயலாளரைத் தோ்ந்தெடுக்க வேண்டும். மக்கள் பிரதிநிதித்துவச் சட்டத்தின்படி தோ்தல் ஆணையத்தால் அங்கீகரிக்கப்பட்ட கட்சிகள் உள்கட்சித் தோ்தலை கட்டாயம் நடத்த வேண்டும்.

அதிமுகவில் கடந்த 2014-ஆம் ஆண்டுக்குப் பின்னா் உள்கட்சித் தோ்தல் நடத்தவில்லை. சா்வாதிகாரப் போக்குடன் கட்சியின் தலைமை, நிா்வாகிகளை நியமித்து வருகிறது. இது அங்கீகரிக்கப்பட்ட அரசியல் கட்சிகளின் விதிகளுக்கு எதிரானது. இதுதொடா்பாக இந்திய தோ்தல் ஆணையத்திடம் பலமுறை புகாா் அளித்தும் இதுவரை நடவடிக்கை எடுக்கவில்லை. எனவே, அதிமுகவில் உள்கட்சி தோ்தல் நடத்தாமல், நிா்வாகிகளை நியமிக்க தடை விதிக்க வேண்டும் என கோரியிருந்தாா்.

இந்த வழக்கு நீதிபதி ஆா்.மகாதேவன் முன் விசாரணைக்கு வந்தது. வழக்கை விசாரித்த நீதிபதி, இந்த வழக்கில் அதிமுகவை ஏன் எதிா் மனுதாரராக சோ்க்கவில்லை? என கேள்வி எழுப்பினாா். அப்போது இந்திய தோ்தல் ஆணையம் தரப்பில் ஆஜரான வழக்குரைஞா், அதிமுகவின் உள்கட்சித் தோ்தலை வரும் டிசம்பா் மாதத்துக்குள் நடத்தி முடித்து விடுவதாக அக்கட்சியின் சாா்பில் தோ்தல் ஆணையத்திடம் தெரிவிக்கப்பட்டுள்ளதாக கூறினாா். இதனையடுத்து, இந்த வழக்கில் அதிமுகவை எதிா் மனுதாரராக சோ்க்க உத்தரவிட்டு விசாரணையை ஒத்திவைத்தாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com