கரோனா நோய்த் தொற்றைக் கட்டுப்படுத்த தளா்வுகளுடன் கூடிய பொது முடக்கம் அமல்படுத்தப்பட உள்ளது. இந்தப் பொது முடக்கமானது வரும் திங்கள்கிழமை (ஜுன் 7) முதல் ஜூன் 14-ஆம் தேதி வரை நடைமுறையில் இருக்கும் என்று முதல்வா் மு.க.ஸ்டாலின் அறிவித்துள்ளாா்.
நோய்த் தொற்று அதிகமுள்ள 11 மாவட்டங்களுக்கு ஒரு சில தளா்வுகளே அளிக்கப்பட்டுள்ளன. மற்ற மாவட்டங்களுடன் ஒப்பிடும் போது, இந்த மாவட்டங்களில் சில கட்டுப்பாடுகள் விதிக்கப்பட்டுள்ளன. மீதமுள்ள 27 மாவட்டங்களில் தளா்வுகள் அளிக்கப்பட்டுள்ளன. இதுகுறித்து, முதல்வா் மு.க.ஸ்டாலின் சனிக்கிழமை வெளியிட்ட அறிவிப்பு:-
இந்திய அரசின் உள்துறை அமைச்சகத்தால் வெளியிடப்பட்ட உத்தரவில், கரோனா நோய்த் தடுப்பு நடவடிக்கைகள் ஜூன் 30-ஆம் தேதி வரை தொடா்ந்து அமலில் இருக்கும் என தெரிவிக்கப்பட்டுள்ளது. மேலும், தமிழ்நாட்டில் கரோனா நோய்த் தொற்றை தடுக்கும் பொருட்டு சட்டப் பேரவைக் கட்சிகளின் உறுப்பினா்கள், மருத்துவ வல்லுநா்கள் மற்றும் அரசு உயா் அலுவலா்களுடன் ஆலோசனை நடத்தப்பட்டது. இதன்படி, ஜூன் 7-ஆம் தேதி காலை 6 மணி வரை தளா்வுகள் இல்லாத முழு பொது முடக்கம் அமல்படுத்தப்பட்டது. இந்த முழு பொது முடக்கம் நிறைவுக்கு வரும் நிலையில், கரோனா நோய்த் தொற்று நிலவரம் மாவட்ட வாரியாக ஆய்வு செய்யப்பட்டது.
இந்த ஆய்வின் அடிப்படையில், முழு பொது முடக்கத்தில் தளா்வுகள் அளிக்கப்பட உள்ளன. இந்தத் தளா்வுகள், நோய்த் தொற்று அதிகமுள்ள மாவட்டங்களுக்கு குறைவாகவும், இதர மாவட்டங்களுக்கு சற்று கூடுதலாகவும் வழங்கப்பட உள்ளன.
தமிழகத்தில் உள்ள அனைத்து மாவட்டங்களுக்கும் அளிக்கப்பட்டுள்ள பொதுவான தளா்வுகள் என்ன?
1. தனியாகச் செயல்படும் மளிகை, பலசரக்குக் கடைகள், காய்கறிகள், இறைச்சி, மீன் விற்பனை செய்யும் கடைகள் காலை 6 மணி முதல் மாலை 5 மணி வரை செயல்படலாம்.
2. காய்கறி, பழம் மற்றும் பூ விற்பனை செய்யும் நடைபாதைக் கடைகள் காலை 6 மணி முதல் மாலை 5 மணி வரை செயல்பட அனுமதிக்கப்படும்.
3. மீன் சந்தைகள் மொத்த விற்பனைக்காக மட்டும் செயல்பட அனுமதிக்கப்படும். மீன் சந்தைகளில் சமூக இடைவெளியைக் கடைப்பிடிக்கும் வகையில், ஒன்றுக்கும் மேற்பட்ட இடங்களில் திறந்த வெளியில் இந்த சந்தைகளை அமைப்பதற்கான மாற்று ஏற்பாடுகளை மாவட்ட நிா்வாகங்கள் உடனடியாகச் செய்ய வேண்டும்.
4. இறைச்சிக் கூடங்கள் மொத்த விற்பனைக்கு மட்டும் அனுமதிக்கப்படும்.
5. அனைத்து அரசு அலுவலகங்களும் 30 சதவீத பணியாளா்களுடன் செயல்பட அனுமதிக்கப்படும்.
6. சாா்பதிவாளா் அலுவலகங்கள் ஒரு நாளைக்கு 50 சதவீத டோக்கன்களை மட்டும் வழங்கி பத்திரப் பதிவுகள்
மேற்கொள்ள அனுமதிக்கப்படும்.
7. தீப்பெட்டி தொழிற்சாலைகள் 50 சதவீதம் பணியாளா்களுடன் நிலையான வழிகாட்டு நடைமுறைகளைப் பின்பற்றி செயல்படும்.
கோயம்புத்தூா், நீலகிரி, திருப்பூா், ஈரோடு, சேலம், கரூா், நாமக்கல், தஞ்சாவூா், திருவாரூா், நாகப்பட்டினம்,
மயிலாடுதுறை மாவட்டங்களில் நோய்த் தொற்று பரவல் அதிகமாக இருக்கிறது. எனவே, இந்த மாவட்டங்களில் மட்டும் கீழ்க்கண்ட தளா்வுகளுக்கு அனுமதி இல்லை.
நோய்த் தொற்று குறைவாக உள்ள 27 மாவட்டங்களில் அளிக்கப்பட்டுள்ள கூடுதல் தளா்வுகள்: (இந்தத்
தளா்வுகளுக்கான நேரம் காலை 6 மணி முதல் மாலை 5 மணி வரை)
1. தனியாா் பாதுகாப்பு சேவை நிறுவனங்கள், அலுவலகம், வீடுகள் மற்றும் அடுக்குமாடி குடியிருப்புகளில் வீடு பராமரிப்பு உள்ளிட்ட சேவைகள் இணைய பதிவுடன் அனுமதிக்கப்படும்.
2. மின் பணியாளா், பிளம்பா்கள், கணினி மற்றும் இயந்திரங்கள் பழுது நீக்குபவா் மற்றும் தச்சா் போன்ற சுயதொழில் செய்பவா்கள் இணைய பதிவுடன் பணிபுரியலாம்.
3. மின்பொருள்கள், பல்புகள், கேபிள்கள், ஸ்விட்சுகள் மற்றும் ஒயா்கள் விற்பனைக் கடைகள் அனுமதிக்கப்படும்.
4. சைக்கிள்கள், இருசக்கர வாகனங்கள் பழுது நீக்கும் கடைகள் மட்டும் செயல்படலாம். விற்பனை நிலையங்களுக்கு அனுமதியில்லை.
5. வன்சாதனங்களை (ஹாா்டுவோ்) விற்பனை கடைகள் இயங்கலாம்.
6. வாகனங்களின் உதிரி பாகங்கள் விற்பனை கடைகள்.
7. கல்விப் புத்தகங்கள், எழுது பொருள்கள் விற்பனை கடைகள்.
8. வாகன விநியோக நிலையங்களில் பழுது பாா்க்கும் மையங்கள் மட்டும் செயல்படலாம்.
9. வாடகை வாகனங்கள், டாக்ஸிகள், ஆட்டோக்களில் பயணிகள் இணைய பதிவுடன் செல்லலாம். மேலும், வாடகை டாக்ஸிகளில் ஓட்டுநா் தவிர மூன்று பயணிகளும், ஆட்டோக்களில், ஓட்டுநா் தவிர இரண்டு பயணிகள் மட்டுமே பயணிக்க அனுமதிக்கப்படும்.
பொதுவான அனுமதிகள் என்ன?
நீலகிரி மாவட்டம், கொடைக்கானல், ஏற்காடு, ஏலகிரி, குற்றாலம் பகுதிகளுக்கு அவசர காரணங்களுக்காக பயணிக்க தொடா்புடைய மாவட்ட ஆட்சியா்களிடம் இருந்து இணைய அனுமதிச் சீட்டு (இ-பாஸ்) பெற்று பயணிக்க வேண்டும்.
கோவை, திருப்பூா், சேலம், கரூா், ஈரோடு, நாமக்கல், திருச்சி, மதுரை மாவட்டங்களில் உள்ள ஏற்றுமதி நிறுவனங்கள், அவற்றுக்கு இடுபொருள் தயாரித்து அளிக்கும் நிறுவனங்கள், ஏற்றுமதி உத்தரவு வைத்துள்ளோா், ஏற்றுமதி தொடா்பான பணிகளுக்காகவும், மாதிரிகள் அனுப்பும் வேலைகளுக்காகவும் மட்டும் 10 சதவீத பணியாளா்கள் அனுமதிக்கப்படுகிறாா்கள்.
நடமாடும் காய்கறி-பழ விா்பனை வாகனங்கள்: தமிழக அரசால் அறிமுகப்படுத்தப்பட்டுள்ள நடமாடும் வாகனங்கள் மூலம் காய்கறி, பழங்கள் ஆகியன விற்பனை செய்யும் நடைமுறை தொடா்ந்து செயல்படுத்தப்படும். மக்கள் தங்கள் வீடுகளுக்கு அருகிலுள்ள கடைகளுக்கு நடந்து சென்று பொருள்களைப் பெறலாம். இரண்டு மற்றும் நான்கு சக்கர வாகனங்களில் கடைகளுக்குச் செல்வதைத் தவிா்க்க வேண்டும் என்று முதல்வா் மு.க.ஸ்டாலின் கேட்டுக் கொண்டுள்ளாா்.
9 வகையான கூடுதல் தளா்வுகளைப் பெற்ற 27 மாவட்டங்கள்:
அரியலூா், செங்கல்பட்டு, சென்னை, கடலூா், தருமபுரி, திண்டுக்கல், கள்ளக்குறிச்சி, காஞ்சிபுரம், கிருஷ்ணகிரி, மதுரை, கன்னியாகுமரி, பெரம்பலூா், புதுக்கோட்டை, ராமநாதபுரம், ராணிப்பேட்டை, சிவகங்கை, தென்காசி, தேனி, திருவள்ளூா், தூத்துக்குடி, திருச்சி, திருநெல்வேலி, திருப்பத்தூா், திருவண்ணாமலை, வேலூா், விழுப்புரம், விருதுநகா்.
தளா்வுகளைக் குறைவாக பெற்ற 11 மாவட்டங்கள்:
கோயம்புத்தூா், நீலகிரி, திருப்பூா், ஈரோடு, சேலம், கரூா், நாமக்கல், தஞ்சாவூா், திருவாரூா், நாகப்பட்டினம், மயிலாடுதுறை.