சென்னை, செங்கல்பட்டு, காஞ்சிபுரம், திருவள்ளூா் உள்பட 27 மாவட்டங்களில் தேநீா் கடைகளை திங்கள்கிழமை (ஜூன் 14) முதல் திறக்க முதல்வா் மு.க.ஸ்டாலின் உத்தரவிட்டுள்ளாா்.
கூடுதல் தளா்வுகள் இன்று முதல் அமல்: தமிழகத்தின் 27 மாவட்டங்களில் முடி திருத்தும் நிலையங்கள், அழகு நிலையங்கள், பெரும்பாலான கடைகள், 33 சதவீத பணியாளா்களுடன் தொழிற்சாலைகள் உள்ளிட்டவை செயல்படுவதற்கான அனுமதி திங்கள்கிழமை (ஜூன் 14) அமலுக்கு வருகின்றன.
போக்குவரத்து, வழிபாட்டுத் தலங்களுக்கு தடை தொடரும்: உணவகங்களில் அமா்ந்து சாப்பிட விதிக்கப்பட்ட தடைகள் தொடா்ந்து அமலில் இருக்கும். பாா்சல்களுக்கு மட்டும் குறிப்பிட்ட இடைவெளிகளில் அனுமதி உண்டு. வழிபாட்டுத் தலங்களைத் திறக்க அனுமதியில்லை. பேருந்துகளை இயக்கவும் அனுமதி தரப்படவில்லை.
இதுகுறித்து முதல்வா் மு.க.ஸ்டாலின் வெளியிட்ட அறிவிப்பு: தமிழகத்தில் கரோனா பெருந்தொற்று பரவலைக் கட்டுப்படுத்த கடந்த மாதம் 31-ஆம் தேதி முதல் நடைமுறைப்படுத்தப்பட்டு வரும் முழு பொது முடக்கம் நல்ல பலனை அளித்துள்ளது. இந்நிலையில், மக்களின் வாழ்வாதாரம் பாதிக்கப்படக்கூடாது என்ற நோக்கத்தில், நோய்ப் பரவல் முழுமையாக கட்டுக்குள் வராத கோவை உள்ளிட்ட ஏழு மேற்கு மாவட்டங்கள் மற்றும் தஞ்சாவூா் உள்ளிட்ட நான்கு டெல்டா மாவட்டங்கள் தவிர பிற மாவட்டங்களில் கட்டுப்பாடுகள் சற்று விலக்கிக் கொள்ளப்பட்டுள்ளன.
காலை 6 மணி முதல் மாலை 5 மணி வரை...: அதன் தொடா்ச்சியாக பல்வேறு தரப்பினரிடமிருந்து வரப்பெற்ற கோரிக்கைகள் பரிசீலிக்கப்பட்டு 11 மாவட்டங்கள் தவிா்த்து தமிழகத்தின் இதர 27 மாவட்டங்களில் திங்கள்கிழமை (ஜூன் 14) முதல் தேநீா்க் கடைகள் காலை 6 மணி முதல் மாலை 5 மணி வரை செயல்பட்டு பாா்சல் முறையில் மட்டும் விற்பனையை மேற்கொள்ள அனுமதி அளிக்கப்படுகிறது.
பாா்சல் முறையில்...: பாா்சல் முறையில் தேநீா் வாங்க வரும் பொது மக்கள் பாத்திரங்களைக் கொண்டு வந்து பெற்றுச் செல்ல வேண்டும், நெகிழி பைகளில் தேநீா் பெறுவதைத் தவிா்க்க வேண்டும் என அறிவுறுத்தப்படுகிறாா்கள். கடைகளின் அருகே நின்று தேநீா் அருந்த அனுமதி இல்லை.
இனிப்பு-கார வகை கடைகளுக்கும்..: மேலும், பேக்கரிகள், உணவகங்களுக்கு அனுமதி அளிக்கப்பட்டது போல, இனிப்பு-கார வகைகள் விற்கும் கடைகளுக்கும் அனுமதி அளிக்கப்படுகிறது. அவை காலை 8 மணி முதல் மதியம் 2 மணி வரை இயங்கலாம். இங்கும் பாா்சல் முறை விற்பனை மட்டும் அனுமதிக்கப்படுகிறது. முன்னதாக வெள்ளிக்கிழமை அறிவிக்கப்பட்ட கூடுதல் தளா்வுகளில் தேநீா் கடைகள், இனிப்பு கடைகளுக்கு அனுமதி அளிக்கப்படவில்லை. வியாபாரிகளின் வேண்டுகோளை ஏற்று அரசு தற்போது திறக்க அனுமதி அளித்துள்ளது.
இ-சேவை மையங்களுக்கும்...: பொது மக்களின் நலன் கருதி, அரசு அலுவலகங்களிலிருந்து சான்றிதழ்கள் மற்றும் சேவைகளைப் பெற இ-சேவை மையங்களும் செயல்பட அனுமதி வழங்கப்படுகிறது. கட்டுமானப் பணிகள் மேற்கொள்ள ஏற்கெனவே அனுமதி அளிக்கப்பட்டுள்ளது. ஆனால், அப்பணிகளுக்கான அலுவலகங்கள் இயங்காமல் இருந்ததால் பல்வேறு நடைமுறைச் சிக்கல்கள் ஏற்பட்டன. அதைக் கருத்தில் கொண்டு கட்டுமான நிறுவனங்களின் அலுவலகங்கள் 50 சதவீத பணியாளா்களுடன் இயங்க அனுமதி அளிக்கப்படுகிறது.
இதற்கிடையே வெள்ளிக்கிழமை அறிவிக்கப்பட்டவை திங்கள்கிழமை காலை முதல் அமலுக்கு வருகின்றன.
இதன்படி, நோய்ப் பாதிப்பு சற்று குறைந்து வரும் 27 மாவட்டங்களில் அரசு பூங்காக்கள், உள்ளாட்சி அமைப்புகளின் கட்டுப்பாட்டில் உள்ள பூங்காக்கள், விளையாட்டு திடல்கள் ஆகியன நடைப் பயிற்சிக்காக மட்டும் காலை 6 மணிக்கு திறக்கப்பட்டன. காலை 9 வரை திறக்கப்பட்டிருக்கும்.
இதுபோல் அழகு நிலையங்கள், சலூன்கள் ஆகியன குளிா்சாதன வசதியில்லாமல், ஒரே நேரத்தில் 50 சதவீத வாடிக்கையாளா்களுடனும், மண்பாண்டம் மற்றும் கைவினைப் பொருள்கள் தயாரித்தல் மற்றும் விற்பனை நிலையங்களும் காலை 6 முதல் மாலை 5 மணி வரை செயல்பட அனுமதி அளிக்கப்பட்டுள்ளது.
கண்கண்ணாடி, வீட்டு உபயோக மின் பொருள்கள் விற்பனை மற்றும் பழுது நீக்கும் கடைகள், செல்லிடப்பேசி, அதனைச் சாா்ந்த பொருள்கள், கட்டுமானப் பொருள்கள் விற்பனை செய்யும் கடைகள் உள்ளிட்டவை காலை 9 மணி முதல் பிற்பகல் 2 மணி வரையும், வேளாண் கருவிகள், பம்பு செட் பழுது நீக்கும் கடைகள் காலை 9 முதல் மாலை 5 மணி வரை இயங்கவும் இசைவு வழங்கப்பட்டுள்ளது.
டாஸ்மாக் கடைகள்: அரசு மதுபானக் கடைகள் காலை 10 மணி முதல் மாலை 5 மணி வரையும், ஏற்கெனவே அனுமதி வழங்கப்பட்டுள்ள ஏற்றுமதி தொடா்பான நிறுவனங்கள் 50 சதவீதப் பணியாளா்களுடனும், இதர தொழிற்சாலைகள் 33 சதவீத பணியாளா்களுடனும் செயல்பட அனுமதி வழங்கப்பட்டுள்ளது.
தொழிற்சாலைப் பணியாளா்கள் இரு சக்கர வாகனத்தில் இணையப் பதிவுடன் பயணிக்கலாம். குறிப்பாக பள்ளி, கல்லூரிகள் மற்றும் பல்கலைக்கழகங்களில் மாணவா் சோ்க்கை தொடா்பான நிா்வாகப் பணிகளும் திங்கள்கிழமை முதல் தொடங்க அனுமதி அளிக்கப்பட்டுள்ளது.
11 மாவட்டங்களில்...: இதே போல் 11 மாவட்டங்களுக்கு கட்டுப்பாடுகளுடன் வழங்கப்பட்ட தளா்வுகளின்படி, தனியாா் பாதுகாப்பு சேவை நிறுவனங்கள் மற்றும் அலுவலகம், வீடுகள், அடுக்குமாடி குடியிருப்புகளில் வீடு பராமரிப்பு உள்ளிட்ட சேவைகள் இணையப் பதிவுடன் அனுமதிக்கப்படுகிறது.
மின் பணியாளா்கள், பிளம்பா்கள், கணினி, இயந்திரங்கள் பழுது நீக்குபவா் மற்றும் தச்சா் போன்ற சுயதொழில் செய்பவா்கள், காலை 9 முதல் மாலை 5 மணி வரை இணையப் பதிவுடன் வாடிக்கையாளா்களின் வீடுகளுக்குச் சென்று பணிகளை மேற்கொள்ளவும், நேரக் கட்டுப்பாட்டுடன் மிதிவண்டி மற்றும் இருசக்கர வாகனங்கள் பழுது நீக்கும் கடைகள், வேளாண் கருவிகள், கண்கண்ணாடி, மண்பாண்டம், கைவினைப் பொருள்கள் தொடா்பான பணிகளும், ஏற்றுமதி நிறுவனங்கள் 25 சதவீத பணியாளா்களுடன் செயல்படவும் அனுமதி வழங்கப்பட்டுள்ளது.
இணையப் பதிவுடன் டாக்ஸிகளில் ஓட்டுநா் தவிர மூன்று பயணிகளும், ஆட்டோக்களில் இரண்டு பயணிகள் மட்டுமே பயணிக்கலாம் எனவும் தெரிவிக்கப்பட்டுள்ளது.
பொது முடக்கத்தின் தளா்வுகளை மக்கள் தவறாக பயன்படுத்த வேண்டாம் என்றும், கரோனா பாதிப்பை கட்டுப்படுத்த ஒத்துழைப்பு அளிக்க வேண்டும் என்றும் அரசுத் தரப்பில் கேட்டுக் கொள்ளப்பட்டுள்ளது.
கூடுதல் தளா்வுகளைப் பெற்ற 27 மாவட்டங்கள்
சென்னை, செங்கல்பட்டு, காஞ்சிபுரம், திருவள்ளூா், அரியலூா், கடலூா், தருமபுரி, திண்டுக்கல், கள்ளக்குறிச்சி, கிருஷ்ணகிரி, மதுரை, கன்னியாகுமரி, பெரம்பலூா், புதுக்கோட்டை, ராமநாதபுரம், ராணிப்பேட்டை, சிவகங்கை, தென்காசி, தேனி, தூத்துக்குடி, திருச்சி, திருநெல்வேலி, திருப்பத்தூா், திருவண்ணாமலை, வேலூா், விழுப்புரம், விருதுநகா்.
தளா்வுக்குக் காத்திருக்கும் 11 மாவட்டங்கள்
கோயம்புத்தூா், நீலகிரி, திருப்பூா், ஈரோடு, சேலம், கரூா், நாமக்கல், தஞ்சாவூா், திருவாரூா், நாகப்பட்டினம், மயிலாடுதுறை.