நடிகா் அஜித் குமாா் நடிப்பில், இயக்குநா் எச்.வினோத் இயக்கி வரும் திரைப்படம் ‘வலிமை’. கரோனா பொதுமுடக்கம் காரணமாக நிறுத்தப்பட்டிருந்த படப்பிடிப்பு அண்மையில் மீண்டும் தொடங்கியது. எனினும், திரைப்படம் குறித்து நீண்ட நாள்களாக எந்தத் தகவலும் வெளியாகாமல் இருந்தது ரசிகா்களுக்கு ஏமாற்றத்தை அளித்தது.
இதனால் ரசிகா்களோ வலிமை அப்டேட்டை அனைவரிடமும் கேட்கத் தொடங்கினா். கிரிக்கெட் போட்டியிலும் இது எதிரொலித்தது. சென்னை சேப்பாக்கத்தில் நடைபெற்ற டெஸ்ட் போட்டியில் கிரிக்கெட் வீரா் மொய்ன் அலி முதல், தமிழகத்தில் நலத்திட்டங்களைத் தொடங்கி வைக்க வந்த பிரதமா் நரேந்திர மோடி வரை வெவ்வேறு துறையைச் சோ்ந்த பலரிடமும் வலிமை அப்டேட் கேட்கத் தொடங்கினா்.
இதை கேள்விப்பட்ட நடிகா் அஜித்குமாா், ரசிகா்களுக்கு அறிவுரை வழங்கி அறிக்கை ஒன்றையும் வெளியிட்டாா். இருந்தும் வலிமை அப்டேட் குறித்த ரசிகா்களின் தேடல் ஓய்ந்த பாடில்லை. தற்போது தோ்தல் களத்திலும் வலிமை அப்டேட் வலம் வருகிறது.
கோவை தெற்கு தொகுதியில் போட்டியிடும் பாஜக தேசிய மகளிா் அணி தலைவா் வானதி சீனிவாசனிடமும், சுட்டுரை மூலம் வலிமை அப்டேட் கேட்டுள்ளாா் ஒரு இளைஞா். ‘கோயம்புத்தூா்’ என்ற சுட்டுரைக் கணக்குப் பெயருடைய அந்த நபா், வானதியை டேக் செய்து, #valimaiupdate எப்போ எனப் பதிவிட்டிருந்தாா். இதற்கு வானதி சீனிவாசனோ, ‘நான் வெற்றி பெற்ற உடன் நிச்சயமாக வலிமை பட அப்டேட் கிடைக்கும் தம்பி’ என பதிவிட்டிருந்தாா்.
இந்த சுட்டுரைப் பதிவு அதிகளவு பகிரப்பட்டு வந்த நிலையில், மறுநாளே (திங்கள்கிழமை) வலிமை அப்டேட் மே 1-ஆம் தேதி கிடைக்கும் என அத்திரைப்படத்தின் தயாரிப்பாளா் போனி கபூா் தெரிவித்திருந்தாா்.
அவரது சுட்டுரைப் பதிவில், மே 1-ஆம் தேதி அஜித்குமாரின் 50-ஆவது பிறந்தநாளை முன்னிட்டு, வலிமை திரைப்படத்தின் முன்னோட்டம் (பா்ஸ்ட் லுக்) வெளியாகும் என அவா் கூறியிருந்தாா்.
இந்த சூழலில் ‘மனு தாக்கல் செய்த நாளிலே வலிமை அப்டேட் வாங்கிக் கொடுத்தாா் வானதி’ என நெட்டிசன்கள் சுட்டுரையில் பதிவிட்டு வருகின்றனா்.
தோ்தல் ஆணையத்தின் வலிமை அப்டேட்: இது போன்று திருப்பூா் மாவட்ட ஆட்சியரும் தோ்தல் அதிகாரியுமான காா்த்திகேயன், அண்மையில் வலிமை அப்டேட் கொடுத்திருந்தாா்.
அவரது சுட்டுரைப் பதிவில், இதோ ‘வலிமை அப்டேட்’ எனக் கூறி ஒரு படத்தையும் பதிவிட்டிருந்தாா். அதில், ‘ஜனநாயகத்தின் வலிமை உங்கள் ஒவ்வொரு ஓட்டிலும் உள்ளது. 100 சதவீத ஓட்டு இந்தியா்களின் பெருமை’ என வாக்காளா்களுக்கு விழிப்புணா்வு ஏற்படுத்தும் வாசகங்கள் இடம்பெற்றிருந்தன. இது சமூக வலைதளங்களில் கடந்த சில நாள்களாக அதிகளவு பகிரப்பட்டு வருகிறது.