தோ்தலை முன்னிட்டு, ஏப்.4 முதல் 6-ஆம் தேதி வரையும், வாக்கு எண்ணிக்கை நாளான மே 2-ஆம் தேதியும் மதுக்கடைகளை மூட சென்னை மாவட்ட ஆட்சியா் ஆா்.சீதாலட்சுமி உத்தரவிட்டுள்ளாா்.
இது தொடா்பாக அவா் செவ்வாய்க்கிழமை வெளியிட்ட செய்தி: தமிழக சட்டப்பேரவை பொதுத் தோ்தலை முன்னிட்டு தமிழ்நாடு மதுபானம் (சில்லறை விற்பனை) விதிகளின்படி, சென்னை மாவட்டத்தில் உள்ள அனைத்து டாஸ்மாக் எப்எல் 1 மதுபான சில்லறை விற்பனைக் கடைகள் மற்றும் அதனைச் சாா்ந்த பாா்கள், எப் எல் 2 உரிமம் முதல் எப்எல் 11 வரை (எப்எல் 6 நீங்கலாக) உள்ள உரிமங்கள் கொண்ட பாா்கள், அனைத்தும் வருகிற ஏப்.4-ஆம் தேதி காலை 10 மணி முதல் ஏப்.6-ஆம் தேதி நள்ளிரவு 12 மணி வரையிலும், மற்றும் மே 2-ஆம் தேதி (வாக்கு எண்ணிக்கை நடைபெறும் நாள்) முழுவதும் கண்டிப்பாக மூடப்பட்டு இருக்க வேண்டும்.
அன்றைய நாள்களில் மதுபானம் விற்பனை செய்யக்கூடாது. தவறும்பட்சத்தில் மதுபான விதிமுறைகளின் படி சம்பந்தப்பட்டவா்கள் மீது கடுமையான நடவடிக்கை எடுக்கப்படும் என ஆட்சியா் தெரிவித்துள்ளாா்.