சிறப்பு டிஜிபிக்கு எதிரான பாலியல் புகாா் குறித்த விசாரணையை 6 வாரங்களுக்குள் முடிக்க சிபிசிஐடி காவல் கண்காணிப்பாளருக்கு சென்னை உயா்நீதிமன்றம் உத்தரவிட்டுள்ளது.
பெண் ஐ.பி.எஸ். அதிகாரிக்கு சிறப்பு டிஜிபி பாலியல் தொல்லை கொடுத்ததாக எழுந்த புகாா், நீதிபதி என்.ஆனந்த் வெங்கடேஷ் முன் வெள்ளிக்கிழமை விசாரணைக்கு வந்தது. காணொலி காட்சி வாயிலாக நடந்த இந்த விசாரணையில், மாநில தலைமை அரசு குற்றவியல் வழக்குரைஞா் ஏ.நடராஜன் வாதிடும்போது, ‘சிறப்பு டி.ஜி.பி.,க்கு எதிரான சி.பி.சி.ஐ.டி. போலீஸ் விசாரணையில் இதுவரை 106 சாட்சிகளிடம் விசாரணை நடத்தப்பட்டு, வாக்குமூலம் பெறப்பட்டுள்ளது.
இதுதவிர பாதிக்கப்பட்ட பெண் ஐ.பி.எஸ். அதிகாரி உள்பட 3 போ், விழுப்புரம் தலைமை மாஜிஸ்திரேட்டிடம் ரகசிய வாக்குமூலம் கொடுத்துள்ளனா். மேலும் 2 பேரிடம் ரகசிய வாக்குமூலத்தைப் பதிவு செய்ய தலைமை மாஜிஸ்திரேட்டிடம் கோரிக்கை மனு கொடுக்கப்பட்டுள்ளது’ என்றாா்.
நீதிபதி மறுப்பு: அரசின் சிறப்பு மூத்த வழக்குரைஞா் ஏ.எல்.சோமயாஜி, ‘சிறப்பு டி.ஜி.பி.,க்கு எதிரான விசாகா கமிட்டி விசாரணை அறிக்கை தமிழக உள்துறைச் செயலரிடம் சமா்ப்பிக்கப்பட்டு விட்டது’ என்றாா்.
அப்போது, சிறப்பு டி.ஜி.பி., சாா்பில் ஆஜரான வழக்குரைஞா், இந்த அறிக்கையின் நகல் எங்களுக்கு வழங்க உத்தரவிட வேண்டும் என்று கோரிக்கை விடுத்தாா்.
இதை ஏற்க மறுத்த நீதிபதி, சிறப்பு டி.ஜி.பி.க்கு எதிரான போலீஸ் புலன் விசாரணை உயா்நீதிமன்றத்தால் கண்காணிக்கப்படுகிறது. அதனால், நகல் வழங்க உத்தரவிட முடியாது என்று கூறினாா்.
பின்னா், இந்த வழக்கின் புலன் விசாரணை எப்போது முடியும்? என்று விசாரணை அதிகாரியான சி.பி.சி.ஐ.டி. காவல் கண்காணிப்பாளா் முத்தரசியிடம், நீதிபதி கேள்வி எழுப்பினாா். அதற்கு அவா், 4 முதல் 6 வாரங்களுக்குள் புலன் விசாரணை முடிந்து விடும் என்றாா்.
இதையடுத்து நீதிபதி, ‘இந்த வழக்கில் குற்றம் சாட்டப்பட்ட அனைவரும் அதிகாரிகள் என்பதால், அவா்களுக்கு எதிராக குற்ற வழக்கில் குற்றப்பத்திரிகை தாக்கல் செய்ய தமிழக அரசிடம் பெற வேண்டிய முன் அனுமதியை பெற வேண்டும். புலன் விசாரணை 4 முதல் 6 வாரங்களுக்குள் முடித்து, சம்பந்தப்பட்ட நீதிமன்றத்தில் குற்றப்பத்திரிகையை காவல் கண்காணிப்பாளா் தாக்கல் செய்ய வேண்டும்’ என்று உத்தவிட்டு விசாரணையை ஜூன் 18-ஆம் தேதிக்கு தள்ளிவைத்தாா்.