சென்னை: தமிழகத்தில் ரூ.517.39 கோடியில் அமைக்கப்பட்ட புதிய துணை மின் நிலையங்களின் செயல்பாடுகளை முதல்வா் மு.க.ஸ்டாலின், புதன்கிழமை காணொலிக் காட்சி வழியாக தொடக்கி வைத்தாா்.
இதுகுறித்து, தமிழக அரசு வெளியிட்ட செய்தி:
திருச்சி மாவட்டம் துவாக்குடி, சென்னை மாம்பலம், திருப்பத்தூா் ஆகிய இடங்களில் 230 கிலோ வோல்ட் துணை மின் நிலையங்களும், சென்னை புளியந்தோப்பு, செங்கல்பட்டு நல்லம்பாக்கம், கள்ளக்குறிச்சி மாவட்டம் ஈருடையாம்பட்டு, தூத்துக்குடி சன்னதுபுதுக்குடி, திருவண்ணாமலை மாவட்டம் வெம்பாக்கம், திருச்சி மேட்டுப்பட்டி, வேங்கைமண்டலம் ஆகிய இடங்களில் ஏழு 110 கிலோவோல்ட் துணை மின் நிலையங்கள் அமைக்கப்பட்டுள்ளன.
செங்கல்பட்டு மாவட்டம் வேதாச்சல நகா், காஞ்சிபுரம் மாவட்டம் காவனூா், திருமுடிவாக்கம், கிருஷ்ணகிரி மாவட்டம் மரிக்கம்பள்ளி, ராணிப்பேட்டை மாவட்டம் அரக்கோணம், சேலம் மாவட்டம் பூமனூா், தஞ்சாவூா் மாவட்டம் திருநீலக்குடி, திருவள்ளூா் அடையாளம்பட்டு, திருவண்ணாமலை அரட்டவாடி, பெரம்பலூா் மாவட்டம் கூடலூா் ஆகிய இடங்களில் 33 கிலோவோல்ட் துணை மின் நிலையங்கள் அமைக்கப்பட்டுள்ளன. மொத்தமாக ரூ.517.39 கோடி மதிப்பில் 20 துணை மின் நிலையங்களை முதல்வா் மு.க.ஸ்டாலின் திறந்து வைத்தாா்.
மேலும், பல்வேறு இடங்களில் அமைக்கப்பட்ட 39 துணை மின் நிலையங்களில் புதிய திறன் மின் மாற்றிகளின் செயல்பாடுகளையும் முதல்வா் தொடங்கி வைத்தாா்.
இந்த நிகழ்ச்சியில், மின்சாரம், மதுவிலக்கு மற்றும் ஆயத்தீா்வைத் துறை அமைச்சா் வி.செந்தில் பாலாஜி, தலைமைச் செயலாளா் வெ.இறையன்பு, எரிசக்தித் துறை முதன்மைச் செயலாளா் ரமேஷ் சந்த் மீனா, மின்வாரியத் தலைவா் ராஜேஷ் லக்கானி உள்ளிட்ட பலரும் கலந்து கொண்டனா்.