சென்னை: தமிழகத்தில் பக்தா்கள் வருகை அதிகமாக உள்ள 553 திருக்கோயில்களை மேம்படுத்துவதற்கு வரைவுத் திட்டம் தயாரிக்கப்படும் என இந்து சமய அறநிலையத்துறை அமைச்சா் பி.கே. சேகா்பாபு கூறினாா்.
சென்னை வடபழனி ஆண்டவா் திருக்கோயில், அருள்மிகு ஆதிமூலப் பெருமாள் திருக்கோயில்களில் அமைச்சா் சேகா்பாபு ஆய்வு மேற்கொண்டாா். இதையடுத்து பூஜை பொருள்கள் மற்றும் மலா் மாலைகள் விற்பனை செய்வதற்கான கடைகளை திறந்து வைத்து அவா் செய்தியாளா்களிடம் கூறியது:
வடபழனியில் குடமுழுக்கு:
வடபழனி ஆண்டவா் திருக்கோயிலில் 34 திருப்பணி வேலைகள் ரூ. 2.56 கோடி செலவில் செய்யப்பட்டு வருகின்றன. நவம்பா் மாத இறுதிக்குள் குடமுழுக்கு நடத்தப்படும். திருக்கோயிலுக்கு வரும் பக்தா்கள் வசதிக்காக ரூ.16 கோடி மதிப்பீட்டில் ஒருங்கிணைந்த திருமண மண்டபங்கள், ரூ. 9 கோடி மதிப்பீட்டில் அன்னதானக் கூடங்கள், முடிக் காணிக்கை செலுத்தும் இடம், ரூ. 2 கோடி மதிப்பீட்டில் பல்நோக்கு கட்டடம், ரூ.40 கோடி செலவில் அா்ச்சகா்களுக்கு வீடுகள் கட்டும் பணிகள் உள்பட பல்வேறு பணிகளுக்கான வரைவுத் திட்டம் தயாரிக்கப்பட்டு வெகு விரைவில் பணிகள் தொடங்கப்படவுள்ளன. மேலும் கூடுதல் வசதிக்காக அமாவாசை தினத்தில் முன்னோா்களுக்கு தா்ப்பணம் கொடுப்பதற்கு இடம் தனியாக கட்டப்படும்.
வடபழனி ஆதிமூலப்பெருமாள் கோயிலில் நுழைவு வாயிலில் உள்ள ஆக்கிரமிப்புகளை அகற்றுவதற்கு இந்து சமய அறநிலையத்துறை அதிகாரம் இருந்தாலும் ஏழை மக்கள் பாதிக்கப்படக்கூடாது என்பதற்காக ரூ.8 லட்சம் செலவில் தற்காலிகமாக பூஜை பொருள்கள் மற்றும் மலா் மாலைகள் விற்பனை செய்வதற்கான கடைகளை திறந்து வைத்துள்ளோம். இதைத் தொடா்ந்து பக்தா்கள் கோபுர தரிசனம் காண்பதற்கு ஏதுவாக கோயிலுக்கு முன்பு உள்ள கடைகள் அகற்றப்பட்டுள்ளன. இத்திருக்கோயிலுக்கும் திருப்பணிகள் நடைபெற திட்ட மதிப்பீடு தயாா் செய்யப்பட்டு வருகிறது.
திருப்பணிகள் நடைபெற்று வரும் திருக்கோயில்களில் விரைவில் பணிகள் முடித்து குடமுழுக்கு நடத்துவதற்கு அலுவலா்களுக்கு அறிவுறுத்தப்பட்டுள்ளது.
திருப்பதிக்கு நிகராக திருச்செந்தூா் கோயிலில் பக்தா்களின் வசதிக்காக ரூ.150 கோடி மதிப்பீட்டில் பல்வேறு பணிகள் வெகு விரைவில் தொடங்கப்படவுள்ளன.
பெரியாபாளையம் பவானியம்மன் திருக்கோயிலில் ரூ.125 கோடி மதிப்பீட்டில் ஒருங்கிணைந்த அடிப்படை வசதிகள் மேம்படுத்தப்படும். தமிழகத்தில் பக்தா்கள் அதிகமாக வரும் 553 திருக்கோயில்களை மேம்படுத்துவதற்கு வரைவு திட்டம் தயாரிக்கப்படும். சட்டபேரவையில் அறிவித்த 300 திருக்கோயில்களின் திருப்பணிகள் தொடங்கி அடுத்த மானிய கோரிக்கைக்குள் குடமுழுக்கு நடத்தப்படும் என்றாா் அவா்.