தமிழகத்தில் அரசு உயா்நிலை, மேல்நிலைப் பள்ளிகளில் படிக்கும் 9 முதல் பிளஸ் 2 வரையிலான மாணவா்களுக்கு மதிப்பீட்டுத் தோ்வு நடத்த பள்ளிக்கல்வி ஆணையா் கே.நந்தகுமாா் உத்தரவிட்டுள்ளாா்.
இது தொடா்பாக முதன்மைக் கல்வி அதிகாரிகளுக்கு அவா் அனுப்பியுள்ள சுற்றறிக்கை: கரோனா பாதிப்பால் மாணவா்களுக்கு ஏற்பட்டுள்ள கற்றல் இடைவெளியைக் குறைக்கும் வகையில் மாநிலக் கல்வியியல் ஆராய்ச்சி மற்றும் பயிற்சி நிறுவனத்தின் மூலம் அரசு உயா்நிலை மற்றும் மேல்நிலைப் பள்ளிகளில் படிக்கும் 9 முதல் பிளஸ் 2 வகுப்பு வரையிலான மாணவா்களின் கற்றலை மேம்படுத்த புத்தாக்கப் பயிற்சிக் கட்டகம் தயாரிக்கப்பட்டுள்ளது.
முதல் கட்டமாக புத்தாக்கப் பயிற்சிக் கட்டகத்தில் 9, 10 வகுப்புகளுக்கு தமிழ், ஆங்கிலம், கணிதம், அறிவியல், சமூக அறிவியல் ஆகிய பாடங்களுக்கும் பிளஸ் 1, பிளஸ் 2 வகுப்புகளுக்கு தமிழ், ஆங்கிலம், கணிதம், இயற்பியல், வேதியியல், தாவரவியல், உயிரி தாவரவியல், விலங்கியல், உயிரி விலங்கியல், வரலாறு, பொருளியல், கணக்குப்பதிவியல், வணிகவியல், கணினி அறிவியல், கணினிபயன்பாடுகள் ஆகிய பாடங்களுக்கும் தலா 60 கொள்குறி மதிப்பீட்டு வினாக்கள் தயாரிக்கப்பட்டுள்ளன.
இதையடுத்து 9 முதல் பிளஸ் 2 வகுப்பு வரை படிக்கும் மாணவா்களுக்கு உயா்தொழில்நுட்ப ஆய்வகம் மூலம் மதிப்பீட்டுத் தோ்வு நடத்தத் திட்டமிடப்பட்டுள்ளது. அதன்படி அனைத்து தலைமை ஆசிரியா்களும் இந்த மதிப்பீட்டுத் தோ்வை அக்.12-ஆம் தேதி செவ்வாய்க்கிழமை காலை 9 மணிமுதல் மாலை 5 மணிக்குள் ஒருமணி நேரம் காலஅவகாசம் வழங்கி நடத்த வேண்டும். ஒவ்வொரு குழு மாணவா்களுக்கான மதிப்பீடு முடிந்த பின்னா் உடனுக்குடன் அடுத்தடுத்த குழு மாணவா்களை அமரவைத்து, ஆசிரியா்கள் இணைய வசதியைப் பயன்படுத்தியும் இந்த மதிப்பீட்டை சிறப்பாக மேற்கொள்ள வேண்டும் என அதில் தெரிவித்துள்ளாா்.