கடந்த ஆட்சியில் தனியாரிடம் கொள்முதல் செய்வதற்காகவே, மின் உற்பத்தியைக் குறைத்துள்ளனா் என்று குற்றஞ்சாட்டினாா் தமிழக மின்சாரம், மதுவிலக்கு மற்றும் ஆயத்தீா்வைத் துறை அமைச்சா் வி.செந்தில்பாலாஜி.
தூய்மை கரூா் திட்டத்தின் கீழ், கரூா் பசுபதிபாளையம் பகுதியில் செவ்வாய்க்கிழமை நடைபெற்ற தூய்மைப் பணிகளை ஆய்வு செய்த பின்னா், அவா் கூறியது:
கடந்த அதிமுக ஆட்சியில் அனல் மின் நிலையங்களில் 58 சதவிகிதம் மின் உற்பத்தி செய்யப்பட்டது. தமிழகத்தில் அனல் மின் உற்பத்தி மூலம் 4320 மெகாவாட் மின்சாரம் உற்பத்தி செய்யும் திறன் இருந்தும், 1800 மெகாவாட் மின்சாரத்தை மட்டுமே உற்பத்தி செய்தனா். தனியாரிடம் மின்சாரம் கொள்முதல் செய்வதற்காகவே, அனல் மின் நிலையங்களை முறையாகப் பராமரிக்காமல் குறைவாக மின்சாரத்தை உற்பத்தி செய்துள்ளனா்.
தற்போது தமிழக முதல்வா் மு.க.ஸ்டாலின் உத்தரவின்படி, அனல் மின் உற்பத்தியை 3500 மெகாவாட்டாக (தற்போதுள்ளதைவிட 70 சதவிகிதம் அதிகம்) அதிகரிக்கும் வகையில் பூா்வாங்க நடவடிக்கைகள் மேற்கொள்ளப்பட்டுள்ளன. பருவமழைக் காலங்களில் ஏற்படும் பாதிப்புகளை சீா் செய்யும் வகையில், தமிழகத்தில் ஒரு லட்சம் மின்கம்பங்கள் தயாா் நிலையில் உள்ளன.
கரூா் நகராட்சியில் 11575 தெருவிளக்கு மின் கம்பங்கள் பயன்பாட்டில் உள்ளன. இதில் நீண்ட காலமாகப் பழுதடைந்து கிடந்த 3,550 மின் கம்பங்கள் கடந்த 4 மாதங்களில் மாற்றப்பட்டுள்ளன. 100 மீட்டருக்கு ஒரு மின்கம்பம் என்ற அடிப்படையில், கரூா் நகராட்சியில் 2300 புதிய மின் கம்பங்கள் அமைக்க நடவடிக்கை மேற்கொள்ளப்பட்டு வருகிறது என்றாா் அவா்.
ஆய்வின் போது, நகராட்சி அலுவலா்கள் உள்ளிட்டோா் உடனிருந்தனா்.